Сцена ҫинче — сумлӑ хӑнасем

Нумаях пулмасть Кушар Юнтапа ялӗнчи культура ҫурчӗ умне халӑх йышлан пухӑннӑ. Сӑлтавӗ те пулнӑ. Ярмушка ял тӑрӑхӗ ҫултан ҫула куҫакан йӑлине — ял уявне паллӑ тӑвассине — кӑҫал та ирттернӗ.

Уявра чи малтанах Ярмушка ял тӑрӑхӗн пуҫлӑхӗ Алексей Петров тухса калаҫнӑ, ентешӗсене саламланӑ май маттуррисене тав хучӗсемпе тата ҫырӑвӗсемпе чысланӑ.

Уявра алӗҫӗсен, сӑнӳкерчӗксен куравне йӗркеленӗ. Кушар Юнтапара ҫуралса ӳснӗ В.И.Перепелкин пушӑ алӑпа килмен. Вӑл ялти клуба сарлака экранлӑ монитор парнеленӗ.

Концерт Ярмушкари ветерансен ушкӑнӗ «Алран кайми аки-сухи» юрра шӑрантарнипе пуҫланнӑ. Ӑна халӑх ура ҫине тӑрсах итленӗ. Унтан «Шурӑмпуҫ», «Чашма» вырӑнти халӑх фольклор ушкӑнӗсем, Уйкас Юнтапа, Кушар Юнтапа ялӗсенчи ӳнер пултарулӑх ушкӑнӗсем, Авшак Элмен, Кивҫурт Мӑрат ялӗсенчи шкул ачисем сцена ҫине хӑпарнӑ. Ҫӗмӗрле, Элӗк районӗсенчен, Канаш хулинчен килнӗ ансамбльсем концерт программине тата пуянлатнӑ. Шупашкартан килнӗ эстрада ҫӑлтӑрӗсене халӑх хапӑлласах йышӑннӑ.

Пӗрисем концертпа киленнӗ вӑхӑтра теприсем спорт ӑмӑртӑвӗсенче вӑй виҫнӗ. Армрестлингра, кире пуканӗ йӑтассинче, вӗрен туртассинче, шашкӑлла выляссинче, михӗпе сикессинче тупӑшнӑ. Сӗтел ҫинче вӗри шӳрпе, шашлӑк пӑсланнӑ.

Сӑнсем (86)

#Ярмушка ял тӑрӑхӗ, #Кушар Юнтапа, #Вӑрнар районӗ, #Уйкас Юнтапа, #Кивҫурт Мӑрат, #Элӗк районӗ, #Ҫӗмӗрле районӗ, #Авшак Элмен, #Шупашкар