Нарӑсӑн 27-28-мӗшӗсенче Шупашкарти Чӑваш патшалӑх гуманитари ӑслӑлӑхӗсен институтӗнче пӗтӗм тӗнчери «Чӑваш чӗлхи тата алтаистикӑн хальхи ҫивӗч ыйтӑвӗсем» ӑслӑлӑх конференцийӗ иртӗ. Ӑна М.Р. Федотов ҫуралнӑранпа 90 ҫул, Н.И. Егоров ҫуралнӑранпа 60 ҫул ҫитнине халалласа ирттереҫҫӗ.

Конференцине инҫетрен килекен ӑсчахсем нумай пулӗҫ. Турцирен турккӑ чӗлхе пӗлӗвӗн обществин президенчӗ Акалын Шюкрю Халюк, тата ытти ӑсчах килӗ. Польшӑран Варшава университечӗн профессорӗ Пазымиес Анна ҫитӗ. Мускавран пысӑк ушкӑн пулӗ — Олег Мудрак, Анна Дыбо, Ирина Самарина, Светлана Бритова, Алий Чеченов профессорсем килӗҫ.

Конференци нарӑсӑн 27-мӗшӗнче 10 сехетре уҫӑлӗ.

М.Р. Федотов — паллӑ чӑваш ӑсчахӗ, профессор. Вӑл 1919 ҫулхи кӑрлачӑн 20-мӗшӗнче Шӑмӑршӑ районне кӗрекен Пуянкасси ялӗнче ҫуралнӑ. Михаил Романович Чӑваш Республикин патшалӑх премине, Чӑваш Республикин тава тивӗҫлӗ ӑслӑлӑх ӗҫченӗ ята тивӗҫнӗ. Вӑл пурӗ 200 ытла ӑслӑлӑх ӗҫӗ ҫырнӑ. Паллӑраххисем: «Словарь чувашских нехристианских личных имен» (Шупашкар, 1998), «Этимологический словарь чувашского языка» (Шупашкар, 1997).

Н.И. Егоров — М.Р. Федотов вӗренекенӗ. Филологи ӑслӑлӑхӗсен тухтӑрӗ, профессор. 1949 ҫулхи нарӑсӑн 20-мӗшӗнче Вӑрмар районне кӗрекен Тури Кинчерте ҫуралнӑ.

Николай Иванович паллӑ тюрколог, культуролог.

#Польша, #Мускав, #Чӑваш патшалӑх гуманитари ӑслӑлӑхӗсен институчӗ, #Турци, #чӑваш чӗлхи, #конференцисем, #Шупашкар