Уявра / О. Цыпленков тунӑ сӑн

Эрнекун, нарӑсӑн 21-мӗшӗнче, Муркаш районӗнчи Оринин ял клубӗ ҫумӗнчи «Шуракӑш» ансамбле йӗркеленӗренпе 25 ҫул ҫитнине палӑртрӗҫ.

«Шуракӑш» ансамбль 1988 ҫулхи авӑнӑн 10-мӗшӗнче пӗрремӗш хут пухӑннӑ, ӑна йӗркелесе яраканӗ тата ертсе пыраканӗ Владимир Михайлович Александров шутланать. Ҫав ҫулах, 1988 ҫулхи чӳкӗн 5-мӗшӗнче ҫӗнӗ ансамбль пӗрремӗш концертне лартнӑ. «Шуракӑш» районта кӑна мар, республикӑра та паллӑ ушкӑн. Хӑйӗн концерчӗсемпе вӑл Раҫҫейри ытти тӑрахсенче те пулса курнӑ. Чикӗ леш енче те пӗрре мар концерт лартнӑ: Турцире, Белоруссире, Молдовӑра (Гагаузинче). Дагестанра, Алтайра, Липецкра тата ытти тӑрахсенче вал пулса курнӑ.

«Шуракӑш» коллектива саламлама район администрацийӗн пуҫлӑхӗ Тимофеев Ростислав Николаевич, Оринин ял тӑрӑхӗн пуҫлӑхӗ Волков Александр Сергеевич, Муркаш районӗн культуӑпа архив ӗҫӗн пай начальникӗ Чернова Елена Геннадьевна тата ыттисем ҫитрӗҫ. Уява видео ӳкерсе хутшӑннӑ Олег Михайлович Цыпленков каласа панӑ тӑрӑх ансамбле саламланӑ май пурте тенӗ пекех чӑвашла тухса калаҫрӗҫ, пӗр Чернова Елена Геннадьевна кӑна — вырӑсла.

Елена Геннадьевна пирки сӑмах хушас пулсан районти культурӑпа архив ӗҫӗсен пайӗн пуҫлӑхне ларас умӗн вӑл вулавӑшсенче вӑй хунӑ. 1991–1993 ҫулсенче районти ача-пӑчасен тӗп вулавӑшӗнче методист пулса, 1993–1995 ҫулсенче Муркашри тӗп район вулавӑшӗнче аслӑ библиотекарь вырӑнӗнче, 1995 ҫултанпа — завудующий тата директор вырӑнӗсене йышӑннӑ. 2008 ҫулхи юпа уйӑхӗнче Елена Геннадьевна администрацинче ӗҫлет. Хальхи вырӑна 2012 ҫулхи ҫӗртме уйӑхӗнчен йышӑнать. Елена Чернова уйрӑмах «Шуракӑш» ансамбле хӑруш ура хунипе палӑрса тӑрать. Ӑна пула коллектив тӗрлӗ тӑрӑхсене йывӑрлӑхсемпе лекет. Каяс умӗн кӑна мар, ансамбль концертсем ӑнӑҫлӑ парса таврӑнсан та кайран «хӑйне итлемен ушкӑна» тавӑрас тесе самай тӑрӑшать. Ҫавӑнпах пулӗ «Шуракӑш» ансамблӗн юбилейӗ пирки информаци ял тӑрӑхӗн сайтӗнче кӑна пур, район сайтӗнче вара — ҫук.

Эпир «Шуракӑша» ӑнӑҫусем сунатпӑр, малашне тата та пысӑкран ҫитӗнӳсем пуласса шанатпӑр.

Сӑнсем (О. Цыпленков, «Пӗркласрисем» тетел, 202)

#Муркаш районӗ, #юбилейсем, #Шуракӑш, #Оринин, #Оринин ял тӑрӑхӗ, #концертсем, #уявсем