Нумаях пулмасть Шупашкарти Ф.М.Лукин ячӗллӗ 5-мӗш ача-пӑча музыка шкулӗнче наци музыкин, поэзийӗн, ӳнер ӑсталӑхӗн «Тӑван ен» республика фестивалӗ иртнӗ. Вӑл — асӑннӑ шкулӑн проекчӗсенчен пӗри.

Ӑна ҫулсерен нарӑсра ирттереҫҫӗ. Проекта 2009 ҫулта пуҫарнӑ. Пилӗк ҫулта унта Шупашкарти, Ҫӗнӗ Шупашкарти, Улатӑрти, Етӗрнери музыка шкулӗсем, ача-пӑча ӳнер шкулӗсем шкулӗсем хутшӑннӑ. Концерт программине Шупашкарти Ф.П. Павлов ячӗллӗ училищӗре вӗренекен студентсем те пуянлатнӑ. Хальччен ирттернӗ фестивальсене Ф.М.Лукин, Г.Я.Хирпӳ композиторсем, Я.Г.Ухсай поэт 100 ҫулт тултарнисене халалланӑ.

2013 ҫултанпа «Тӑван ен» проект анлӑланнӑ. Халӗ ун ҫумне республикӑра инҫет мелӗпе ирттерекен чӑваш музыка литературин олимпиади тата ҫамрӑк музыка тата ӳнер тӗпчӗвҫисен, экскурсоведсен «Музӑсемпе калаҫни» республика конкурсӗ хутшӑннӑ.

Пиллӗкмӗш юбилейлӑ фестивале Г.С.Лебедев ҫуралнӑранпа 100 ҫул ҫитнине халлалланӑ. Унта Канаш, Ҫӗрпӳ хулисенчи, Вӑрмар тата Ҫӗнӗ Лапсар поселокӗсенчи вӗренекенсемпе вӗрентекенсем хутшӑннӑ. Ҫавӑн пекех Шупашкарти Ф.П.Павлов ячӗллӗ музыка училищин, И.Я.Яковлев ячӗллӗ ЧППУн ӳнер факультечӗн, Чӑваш патшалӑх культурӑпа ӳнер институчӗн студенчӗсем сцена ҫине тухнӑ. Концертра чӑвашсен паллӑ ӳнерҫисен картинисен электронлӑ хӑтлавӗ пулнӑ. Ҫӗнтерӳҫӗсен йышӗнче — Шупашкар, Ҫӗнӗ Шупашкар, Етӗрне, Канаш хулисенчи, Муркаш салинчи, Вӑрмар поселокӗнчи вӗренекенсем.

#Етӗрне, #Улатӑр, #Ҫӗнӗ Шупашкар, #музыка шкулӗсем, #Шупашкар, #фестивальсем, #Ҫӗрпӳ, #Вӑрмар, #Ҫӗнӗ Лапсар, #ача-пӑча