forum.na-svyazi.ru сайтри ҫӑнӳкерчӗксемпе усӑ курнӑ

Чӑваш ЕН Элтеперӗн суйлавӗ ҫывхарса килет. Унта хутшӑнма хальлӗхе Олег Николаев ҫеҫ заявлени панине Чӑваш халӑх сайчӗ пӗлтернӗччӗ-ха.

Суйлава паянхи кун тӗлне илсен тата тепӗр тӑватӑ кандидат хутшӑнасси паллӑ. Вӗсене пурне те политика партийӗсем сӗннӗ.

Чи паллӑрах кандидат — Чӑваш Енӗн Патшалӑх Канашӗн депутачӗ Константин Степанов, вӑл ЛДПРӑн регионти уйрӑмне ертсе пырать.

«Пенисонерсен партийӗ» хӑйӗн ҫӗнӗ ертӳҫине Владимир Ильина сӗннӗ. Вӑл — «Чувашлифт» предприятин учредителӗ тата гендиректорӗ.

Симӗссисен партийӗ регионти канашӑн пердседательне Владимир Савинова суйлава хутшӑнтарасшӑн. Вӑл ӑслӑлӑх экспертизисен бюровне ертсе пырать.

Унсӑр пуҫне суйлава «Ҫӗнӗ ҫынсем» партирен Максим Морозов хутшӑнма пултарӗ. Вӑл тӗрлӗ компани учредителӗ, ҫав шутра Ҫӗнӗ Шупашкарти аш-какай комбиначӗн, Сӗнтӗрвӑрринчи аш-какай комбиначӗн; «Агротранс», «Центр Авто», «Модуль» обществӑсен.

Суйлава хутшӑнас кӑмӑллисен документсене утӑ уйӑхӗн 25-мӗшӗнчи 18 сехетчен парса ӗлкермелле.

#политика, #суйлавсем, #Элтепер, #Ҫӗнӗ Шупашкар, #Сӗнтӗрвӑрри