Пушкӑрт Республикинчи Авӑркас районне кӗрекен Треппелте ялӑн 240 ҫулхине паллӑ тунӑ. Ӑна «Сывлӑх сунатпӑр, хамӑр ялсем» ятпа ирттернӗ.

Кунти ламран лама пыракан йӑхсен шутне Виноградовсен, Умовсен, Григорьевсен, Волковсен, Даниловсен, Захаровсен, Колпаковсен тата Федоровсен ҫемйисене кӗртмелле.

Ҫавӑн йышши кирек мӗнле уяври евӗрех унта та вырӑнти ал ӗҫ ӑстисен пултарулӑхне кӑтартса паракан курав йӗркеленӗ. Халӑхӗ вара, чӑнах та, пултаруллӑ. Хӑшӗсем палассем тӗртеҫҫӗ, теприсем тӑмран савӑт-сапа ӑсталаҫҫӗ, йывӑҫран касса тӑвакансем те пур. «Тӗрлӗ ҫулсенчи Треппел ялӗ», «Треппел ялне пуҫарса яни», «Пирӗн ҫитӗнӳсем», «Ҫутҫанталӑка упрар» стендсем хатӗрленӗ.

Уява Авӑркас район администрацийӗн пуҫлӑхӗ М.Б. Ишемгулов та пырса ҫитнӗ. Ял халӑхне вӑл саламланӑ. Виталий Васильевичпа Таисия Романовна Волковсене вара «Юратупа шанчӑклӑхшӑн» медальпе чысланӑ. Ял тӑрӑхӗн пуҫлӑхӗ И.С. Захарова уҫнӑ. Вӑл вырӑнти пурнӑҫ пикри каласа кӑтартнӑ: шкул тата Культура ҫурчӗн ҫивиттине улӑштарни, асфальт сарни, кӗпер юсани тата ытти пирки.

Ялти чылай ҫын ҫав кун тӗрлӗ парнепе чыслава тивӗҫнӗ. Тӑван ҫӗршывӑн аслӑ врӑҫин ветеранӗсем А.П. Антоновпа А.И. Умов, вӑрӑм ӗмӗрлӗ К.Я. Захарова, М.М. Волкова, М.Т. Григорьева тата О.Я. Тимофеева (вӗсем тӑхӑр теҫетке ҫул тултарнӑ) кун-ҫула алла аллӑн тытӑнса 50 ҫул ӗнтӗ пӗрле пурӑнакан Мирон Кузьмичпа Василиса Харитоновна Андреевсене, Леонид Александровичпа Вера Кондратеьвна Умовсене тата ыттисене саламланӑ. Ҫав шутра нумай ачаллисем те, механизаторсен династийӗ те пур.

Уява, паллах, юрӑ-ташӑ ӑстисем те хутшӑннӑ. Стерлӗ хулинчен, акӑ, «Тавах» вокал, Ӗпхӳрен «Элем» юрӑпа ташӑ ансамблӗсем килсе ҫитнӗ.

#ял уявӗсем, #Пушкӑртстан, #Авӑркаса районӗ, #Треппел, #уявсем