HeadHunter ирттернӗ рейтинг кӑтартӑвӗсем

Хулара пурӑнакансем хушшинче 64% лайӑх ӗҫ тупасишӗн Шупашкартан тухса кайма хатӗр имӗш. Кун ҫинчен HeadHunter компанийӗ ӑнӑҫлӑ ӗҫ вырӑнӗсене тӗпчес тӗлӗшпе ирттернӗ рейтингран паллӑ.

Шупашкарта пурӑнакансен 24,16% Мускава пурӑнма, ӗҫлеме кайма хирӗҫ мар. Вӗсен шучӗпе Раҫҫей тӗп хулинче ӗҫпе аталанма та майсем пур, шалу укҫи те самай пысӑк. Иккемӗшпе виҫҫемӗш вырӑна вара Шупашкар ҫыннисем Питӗрпе (9,10% ) Хусана (6,49%) хулисене суйланӑ.

Республикӑн тӗп хуламӑрӑн ҫыннисен шучӗпе ӗҫ вырӑнӗ Чулхулара (4,29%), Йошкар-Олара (1,04%) е Самарта (0,83%) лайӑхрах пулнине шанакансен йышӗ те пӗчӗк мар. Ҫиччӗмӗш вырӑнта Сочи вырнаҫнӑ, ун проценчӗ — 0,8%, саккӑрмӗш вырӑн Чӗмпӗр хулин — 0,7%. Рейтинг кӑтартӑвӗсене Екатеринбургпа (0,63%) Краснодар (0,58%) вӗҫлеҫҫӗ.

Шупашкарта пурӑнакансен 36% вара республика тӗп хулинех кӑмӑллать, вӗсем малашне те тӑван кӗтесре пурӑнма ӗҫлеме хатӗр. Тем тесессӗн те тӑван кӗтесӗмӗр те хакли нимӗн те ҫук. Ахальтен ваттисем «Ӑҫта ҫуралнӑ — ҫавӑнта кирлӗ пулнӑ» тесе каламаҫҫӗ ӗнтӗ. Республика тӗп хулинче те лайӑх ӗҫ вырӑнӗ тупасси те ӗмӗтре кӑна мар. Сӑмахран Чулхула облаҫӗнче пурӑнакансен пӗр йышӗ Питӗрпе Хусана куҫиччен Шупашкара суйласа илнӗ пулӗччӗ.

#Йошкар-Ола, #ӗҫ, #Шупашкар, #кӳршӗсенче, #Хусан, #Чулхула, #Чӗмпӗр