Хальхи вӑхӑтра информаципе тивӗҫтересси пысӑк пӗлтерӗшлӗ. Уйрӑмах, хыпар-хӑнара чӑвашла вулама май туса парасси питӗ кирлӗ. Унччен эпир «Хыпарла» проект пуҫланӑччӗ, анчах вӑл эпир шаннӑ пек ӗҫлесе каймарӗ. Ытларах хӑйсен ӗҫӗ-хӗлӗ пирки каласа парасшӑнскерсем пулчӗҫ. Тата пӗлтӗр Admin-ӑн укҫа-тенкӗрен тӑкаксем тупӑннӑран вӑхӑтра тӳлесе тӑрасси те йывӑр пулчӗ. Ҫак ҫитменлӗхсене тӗпе хурса эпир проекта ҫӗнӗлле хута ярас терӗмӗр — уйрӑм ҫынна тытас терӗмӗр.

Эпир шыратпӑр: чӑвашла лайӑх пӗлекен, политика тӗлӗшӗнчен ирӗклӗ, хӑйӗн шухӑшне уҫҫӑн калама пултаракан ҫынна. Пире республикӑпа ун тулашӗнче пулса иртекен ырӑ пулӑмсене палӑртакан, япӑххине сивлеме пултаракан ҫын кирлӗ. Студент-и вӑл, тивӗҫле канӑва тухнӑскер-и — пӗлтерӗшлӗ мар.

Пӗр кун хушшинче 10 хыпар ҫырмалла. Укҫине те ытларах уйӑрӑпӑр — уйӑхне 10 пин тенкӗ. Енчен те 10 хыпар ҫырма йывӑртарах пулсан — икӗ ҫынна явӑҫтарма тивӗ: пӗри 5 ҫырать, тепри 5. Уйӑхне ҫапла май 300 хыпартан кая мар пулмалла. Район хаҫачӗсенче ӗҫ укҫи 10 пин патнелле пулнӑран кирлӗ ҫын тупӑнасса шансах тӑратпӑр.

Мӗнле хыпарсене ҫутатмалла: республикӑра пулса иртекен мӗнпур пӗлтерӗшлисене. Ҫав шутра районсенче, ял тӑрӑхӗсенче, уйрӑм ялсенче пулса иртекен вырӑнти пӗлтерӗшлисене те манмалла мар (кунне унашкалли 1-2 хыпар кӗртме пулать тейӗпӗр). Хыпарта автор пӗтӗмлетӗвӗ, автор шухӑшӗ курӑнмалла. Культура, политика, спорт, вӗренӳ, ҫутҫанталӑк, ял хуҫалӑхӗ, экономика — хыпарсенче кашни пай валли вырӑн пулмалла.

Хальхи вӑхӑтра эпир кирлӗ ҫынна шыратпӑр. Енчен те сирӗн ҫак ӗҫе туса пырас кӑмӑл пур пулсан np@chuvash.org адреспа ҫыру ярӑр. Эпир сире хыпарсем тӑрӑх хаклӑпӑр, ҫавӑнпа та малтан вӗсене сайта кӗртмелле пулӗ (асӑрхарӑр пулӗ, Angelnas1992@mail.ru ятпа хыпарсем нумайланнине — ҫак студентка пӗр кандидатсенчен пӗри). Хамӑра кирлӗ журналиста тупиччен эпир вӗсемшӗн «Хыпарла» проектри пек тӳлетпӗр: сӑмахран, вырӑсларан куҫарнӑ хыпаршӑн 100, эксклюзивлишӗн — 200 тенкӗ. Концерт, спектакль е мероприяти пуласси пирки пӗлтерекен хыпарсем шутланмаҫҫӗ. Пӗр-пӗр ыйту сиксе тухсан ҫӳлерех асӑннӑ адреспа ҫырӑр, хуравлӑпӑр.

Сӑмах май, «Хыпарла» проектшӑн тӳлеме шантарнӑ укҫана майӗпен куҫарса пыма пуҫларӑмӑр (пӗлтӗрхи пуш тата ака уйӑхӗсемшӗн парса). Хальлӗхе ҫапла шут тытса: авторӑн 300 тенкӗ пухӑнмасӑр укҫа куҫармастпӑр. Ҫӗнӗ проектра укҫа ҫӑлкуҫӗ валли тепӗр спонсор тупса, ҫапла май 5 пин Админтан пулӗ, тата 5 пин — тепӗр спонстортан.

#Хыпарла, #сайтсем