Лауреатӑн кӑкӑр ҫине ҫакмалли палли

Трак Енти Нестер Янкас ячӗллӗ литературӑпа ӳнер тата культура пӗрлӗхӗн правленийӗн черетлӗ ларӑвӗ иртрӗ. Унта 2012 ҫулшӑн Нестер Янкас премине парас ыйтӑва пӑхса тухрӗҫ.

Чӑваш литературипе ӳнерне тата культурине аталантарас енӗпе уйрӑмах палӑрнӑшӑн, 2012 ҫулхи пултарулӑх ӗҫӗнче ҫитӗнӳсем тунӑшӑн Нестер Янкас ячӗллӗ преми лауреачӗн хисеплӗ ятне 2 ҫын тивӗҫрӗ.

1. Чӑвашсен хальхи вӑхӑтри паллӑ ҫыравҫи — Раҫҫей Писателӗсен Союзӗн членӗ, Чӑваш Республикин тава тивӗҫлӗ культура ӗҫченӗ, Ҫеҫпӗл Мишши ячӗллӗ преми лауреачӗ Николай Петрович Ишентей — 2012 ҫулта Чӑваш кӗнеке издательствинче пичетленсе тухнӑ «Планетӑпа чӗре» ятлӑ сӑвӑсен кӗнекишӗн.

Вӑл 1953 ҫулхи нарӑсӑн 14-мӗшӗнче Красноармейски районне кӗрекен Тури Шурҫырма ялӗнче (халӗ Ҫӗрпӳ районӗ) ҫуралнӑ. Унтах пурӑнать. Красноармейски вӑтам шкулӗ хыҫҫӑн икӗ аслӑ пӗлӳ илнӗ. Ял хуҫалӑхӗнче, вӗрентес ӗҫре, журналистикӑра вӑй хунӑ. Халӗ — «Капкӑн» журнал редакторӗ. Нумай кӗнеке авторӗ.

Преми илме ӑна районти Нестер Янкас ячӗллӗ пӗрлӗх правленийӗ тӑратнӑ.

2. Районти тата республикӑри хаҫатсен активлӑ публицисчӗ, хурт-хӑмӑр ӗрчетес енӗпе ҫырнӑ нумай наука ӗҫӗсен авторӗ Анатолий Иванович Скворцов 2012 ҫулта пичетленнӗ статьясемшӗн.

Вӑл 1948 ҫулхи юпан 3-мӗшӗнче районти Ҫӗньял Шетмӗ ялӗнче ҫуралнӑ, Вӑрманкас Шетмӗ ялӗнче пурӑнать. Мӑн Шетмӗри вӑтам шкул хыҫҫӑн, ӗҫленӗ хушӑрах, Чӑваш ял хуҫалӑх институчӗн зоотехниксем хатӗрлекен факультетри хурт-хӑмӑрҫӑсен уйрӑмӗнчен вӗренсе тухнӑ, чылай ҫул хушши хӑйӗн специальноҫӗпе тӑрӑшнӑ. Халӗ те «Пчеловодческое» ТМЯО директорӗ пулса ӗҫлет. Ку таранччен хурт-хӑмӑр ӗҫӗн темисемпе тӗрлӗ хаҫат-журналсенче, ӑслӑх ӗҫӗсен пуххисен кӗнекисенче 41 пысӑк ӗҫ пичетленӗ.

Преми илме ӑна Чӑваш Республикинчи «Красноармейски районӗнчи «Ял пурнӑҫӗ» хаҫат редакцийӗ» автономлӑ учрежденийӗн ӗҫ ушкӑнӗ тӑратнӑ.

#Красноармейски районӗ, #Красноармейски, #Тури Шуршырма, #Ҫӗрпӳ районӗ, #Вӑрманкас Шетмӗ, #Ҫӗньял Шетмӗ, #премисем, #чыславсем