Чӑваш Енре пурӑнакан пӗр хӗрарӑма коллекторсем шӑнкӑравласа йӑлӑхтарсах ҫитернӗ. Вӗсем парӑма татма ыйтнӑ.

3 эрнере коллекторсем хӗрарӑм патне 51 хутчен шӑнкӑравланӑ. Саккунпа килӗшӳллӗн вара вӗсен ҫакна эрнере 8 хут кӑна тума юрать. Кун хыҫҫӑн хӗрарӑм суд приставӗсен службинчен пулӑшу ыйтнӑ.

Ӗҫе ЧР Арбитраж судӗнче пӑхса тухнӑ. Коллекторсем ларӑва пыман. Суд приставӗсем административлӑ протокол ҫырса лару-тӑрӑва уҫӑмлатнӑ. Коллектор организацийӗ парӑмҫӑн тӑванӗсем, пӗлӗшӗсем патне те шӑнкӑравланӑ.

Тепӗр суд ларӑвӗ нарӑс уйӑхӗн 25-мӗшӗнче пулӗ. Палӑртмалла: кунашкал тӗслӗх Чӑваш Енре тата пулнӑ. Кӑҫал кӑрлач уйӑхӗнче кӑна 15 ҫын коллекторсем тапӑнни пирки суд приставӗсен службине заявлени ҫырнӑ.

#коллекторсем, #приставсем, #судсем