Кӑҫал чӑваш халӑх поэчӗ, Максим Горький тата Константин Иванов ячӗллӗ патшалӑх премийӗсен лауреачӗ, Чӑваш Республикин тава тивӗҫлӗ ӳнер ӗҫченӗ Ухсай Яккӑвӗ ҫуралнӑранпа 100 ҫул ҫитет. Ӑна халалласа Шупашкарта палӑк лартма йышӑннӑ.

Палӑк эскизӗсен конкурсне ирттерес пирки Чӑваш республикин культура министерствипе тӗп хула администрацийӗ ҫӗртме уйӑхӗнчех пӗлтернӗччӗ. Палӑка ӑҫта вырнаҫтарасси паллӑ ӗнтӗ. Чӑваш патшалӑх педагогика университечӗн 5-мӗш вӗренӳ ҫурчӗ умӗнче Ухсай Яккӑвӗ ячӗллӗ сквер пулӗ. Чӑваш халӑх поэчӗн кӳлепи вара шӑп ҫавӑнта, хӑй ячӗллӗ культура керменӗ патӗнче пулӗ. Эскизсен прекчӗсене йышӑнса пӗтернӗ, халӗ вара вӗсене Чӑваш патшалӑх ӳнер музейӗнче суйлама тӑратнӑ. Кунта Владимир Нагорнов, Владислав Немцев тата Петр Пупин ӗҫӗсемпе паллашма пулать.

Эскиз суйласа илме уйрӑм комиссии йӗркеленӗ. Курава килекенсем те хӑйсен шухӑшне ятарлӑ кӗнекере ҫырса хӑвараҫҫӗ. Ҫӗнтерӳҫӗне суйланӑ чухне вӗсен кӑмӑлне те шута илӗҫ. Хаклава Яков Гавриловичӑн хӗрӗ те ҫитнӗ, вӑл кашни эскиза тӗплӗн сӑнаса ашшӗпе танлаштарчӗ, пахалӑхӗпе ҫитменлӗхӗсене палӑртса, хӑйне ытларах кӑмӑла каякан скульптурӑна кӑтартрӗ.

«Пулас палӑкӑн эскизӗсем хальлӗхе вӗҫленнӗ тӗслӗхсем мар-ха», — терӗ Ольга Яковлевна. Хӑшне-пӗрне улӑштармалла пулӗ.

Хальлӗхе камӑн ӗҫне суйласа илни паллӑ мар-ха. Конкурс пӗтӗмлетӗвӗсене чӳкӗн 7-мӗшӗнче пӗлтерӗҫ. Мала тухаканӗ патшалӑх пулӑшӗвӗпе Ухсай палӑкне «ура ҫине тӑратӗ». Ыттисем те парнесӗр юлмӗҫ, вӗсене хавхалантарма 50 пин тенкӗ уйӑрма палӑртнӑ.

#Шупашкар, #Яков Ухсай, #палӑксем, #ӳнер музейӗ