Пӗлтӗрхи уявра

Штанаш ял тӑрӑхӗ 6 яла пӗрлештерсе тӑрать. Ҫӗнтерӳ кунне халалланӑ тӗп уяв ку таранччен яланах Штанашри пӗрремӗш ракетчик Иван Николаевич Коннов ӑсталанӑ палӑк умӗнче иртнӗ. Кӑҫал та вӑл чуна хумхантармалла иртрӗ.

Совет Союзӗн Паттӑрӗ Алексей Романович Логинов (1903-1943) кӳршӗ ялта — Упӑкушкӑнь ялӗнче ҫуралса ӳснӗ. Днепр юханшывӗ урлӑ каҫнӑ чухне хастар офицер вилмеллех аманать. 1944 ҫулхи кӑрлачӑн 15-мӗшӗнче ӑна Совет Союзӗн Паттарӗ ят парса чысланӑ.

Вӑл ҫуралса ӳснӗ ҫурт ҫинче асӑну хӑми ҫакӑнса тӑрать. Пирӗнтен инҫех мар ҫитӗнекен вӑрманта Логинов кати ятлӑ вырӑн пур. Кунти йывӑҫсене ӑна хисеплесе лартса чӗртнӗ. Иртнӗ ҫул Упӑкушкӑнь ялӗнче Романовсен ҫемьи ертсе пынипе Логинов ячӗллӗ парк лартса хӑварчӗҫ, Ҫӗнтерӳ кунӗнче кунта вӑрҫӑра тата вӑрҫӑ хыҫҫӑн ҫӗре кӗнӗ паттӑрсене халалласа обелиск уҫрӗҫ. Постамент ҫинче 89 ят.

Кӑҫал Романовсем Ирина Михайловнӑпа Владимир Геннадьевич каллех вырӑнти салтак арӑмӗсемпе вӑрҫӑ нушисене ыттисемпе танах тӳссе ирттернӗ (вӑрҫӑ умӗн е вӑрҫӑ хыҫҫӑн ҫуралнисене) уяв йӗркелесе пачӗҫ. Уява Упӑкушкӑнь ял халӑхӗпе танах кӳршӗ ялсенчен те чылайӑн пуҫтарӑннӑ.

Уява «Вояж» ушкӑн юрӑҫисем килме кӑмӑл тунӑ (продюссер Петров Вячеслав Анатольевич). Людмила Васильева (Ҫуткӳл) тата Екатерина Сандюкова чуна тивмелли юрӑсем шӑрантарчӗҫ, ватӑсен куҫӗсенчен куҫҫуль кӑларчӗҫ. Халӑх та вӗсемпе пӗрле пӗлнӗ юрӑсене юрласа савӑнчӗ.

Салтак яшки, асӑнмалӑх парнесем пурне те тивӗҫрӗҫ. Уява тухайман ватӑсене парнесем килӗсене кайса пачӗҫ.

Монумент умне кӑҫал нумай ҫул ӳсекен чечексем , ҫавӑн пекех Упӑкушкӑнь ялӗнчен ҫӑва патне каякан ҫул хӗррипе ял халӑхӗ пулӑшнипе пин ытла йывӑҫ тӗмми лартса хӑварнӑ.

«Хитре йывӑҫ тӗммисем те илсе килсе лартса хӑварасшӑн-ха», — тет Упӑкушкӑнь ялӗнче ҫуралса ӳснӗ, халӗ Шупашкарта тӗпленнӗ Ирина Михайловна.

#Упӑкушкӑнь, #Штанаш ял тӑрӑхӗ, #Штанаш, #Ҫӗнтерӳ Кунӗ, #Хӗрлӗ Чутай районӗ