Конференцире

2011 ҫулхи кӑрлачӑн 14-мӗшӗнче чӑваш чӗлхи тӗпчевҫи, журналист, патшалӑх служащийӗ, парти ӗҫченӗ В.П. Семенов ҫуралнӑранпа 85 ҫул ҫитнине халалланӑ «Паянхи чӗлхе пӗлӗвӗн кӑткӑс ыйтӑвӗсем» ӑслӑлӑхпа ӗҫлӗх конференцийӗ пулчӗ. Ӑслӑлӑх мероприятийӗ Елчӗк районӗнчи Кивӗ Эйпеҫ ялӗн вӑтам шкулӗнче иртрӗ. Конференци ӗҫне Елчӗк район администрацийӗ пуҫлӑхӗн пӗрремӗш ҫумӗ — вӗрентӳпе ҫамрӑксен политики пайӗн пуҫлӑхӗ Л.В. Левый, Аслӑ Пӑла Тимеш ял тӑрӑхӗн пуҫлӑхӗ В.М. Рыбкин, пичет ӗҫӗн ветеранӗ И.П. Иноходов, Кивӗ Эйпеҫри пӗтӗмӗшле пӗлӳ паракан тӗп шкулӑн директорӗ А.Н. Чермаков, директор ҫумӗ Р.А. Федорова, Аслӑ Елчӗк шкулӗн директорӗ Н.Ф. Малышкин, «Елчӗк Ен» район хаҫачӗн корреспонденчӗ В.А. Кириллова тата Чӑваш Республикин тӗп хулинчи Чӑваш патшалӑх гуманитари ӑслӑлӑхӗсен институтӗнчен килнӗ ушкӑн — директор ҫумӗ Э.К. Бахмисов, чӗлхе пӗлӗвӗ пайӗн пуҫлӑхӗ Н.И. Егоров профессор, чӗлхӗ пӗлӗвӗ пайӗн ӑслӑлӑх аслӑ ӗҫтешӗ А.В. Кузнецов — хутшӑнчӗҫ. Конференци ӗҫне Аслӑ Елчӗк шкулӗн директорӗ Н.Ф. Малышкин ертсе пычӗ.

Конференцине хутшӑнакансем пуҫтарӑннисене В.П. Семенов пурнӑҫӗпе тата ӗҫӗ-хӗлӗпе, Эйпеҫ тата ун таврашӗнчи ялсен кӗске историйӗпе паллаштарчӗҫ. Чӑваш патшалӑх гуманитари ӑслӑлӑхӗсен институтӗнче ӗҫлекен Э.К. Бахмисов, Н.И. Егоров тата А.В. Кузнецов хӑйсем вӑй хуракан институт ӗҫӗ-хӗлӗпе кӗскен паллаштарчӗҫ, Кивӗ Эйпеҫ шкулне малашне те аталанса, ҫитӗнӳсем туса пыма сунчӗҫ, В.П. Семенов пек пултаруллӑ ҫамрӑксене вӗрентсе кӑларассине шаннине пӗлтерчӗҫ, вӑтам шкул вулавӑшне Чӑваш патшалӑх гуманитари ӑслӑлӑхӗсен институчӗ кӑларнӑ кӗнекесем парнелерӗҫ.

#конференцисем, #Кивӗ Эйпӗҫ, #Елчӗк районӗ, #шкулсем, #Аслӑ Пӑла Тимеш ял тӑрӑхӗ, #Аслӑ Елчӗк