Валерий Важоров

Раштавӑн 24-мӗшӗнче «Хӗрлӗ Чутай районӗн культурӑпа кану центрӗ» автономлӑ учрежденире Чӑваш Республикипе Раҫҫей Федерацийӗн тава тивӗҫлӗ культура ӗҫченӗн, К.Иванов ячӗллӗ Патшалӑх преми лауриачӗн, хӑй вӑхӑтӗнче Чӑваш Республикин Патшалах камерлӑ оркестрӑн тӗп дирижёрӑн Валерий Важоровӑн (1940-2000) асӑну каҫне ирттерчӗҫ. Вӑл 15 сехетре пуҫланчӗ.

Меропритине ентешӗсем, район администрацийӗн ӗҫченӗсем, тӗрлӗ хӑнасем пулчӗҫ. Курма килнисен умӗнче Раҫҫей халӑх артисчӗ Морис Моклашкин ертсе пыракан Чӑваш патшалӑх симфониллӗ академи капелли кӗвӗ шӑрантарчӗ, юрӑҫсем юрӑсемпе савӑнтарчӗҫ.

Важоров Валерий Афанасьевич 1940 ҫулхи кӑрлачӑн 1-мӗшӗнче Хӗрлӗ Чутайра ҫуралнӑ. Шупашкарти музыка училищинче, Хусанти консерваторинче вӗреннӗ. Тутарстанри патшалах симфониллӗ оркестрта малтан солист пулнӑ, кайран пӗрремӗш флейтист, унтан — тӗп режиссёрӑн пулӑшаканӗ. Чӑваш музыка театрӗн (халӗ Чӑваш патшалӑх оперӑпа балет театрӗ) тӗп режиссёрӗ пулнӑ, И.Я. Яковлев ячӗллӗ Чӑваш патшалӑх педагогика институтӗнче вӗрентнӗ, И.Н. Ульянов ячӗллӗ Чӑваш патшалӑх университечӗн ӳнер кафедрин ертӳҫи пулнӑ. Чӑваш кӗвӗҫисен пӗрлӗхӗ пулӑшнипе Чӑваш Республикин камерлӑ оркестрне йӗркеленӗ. Вӑл ерсе пынипе чӑваш кӗвӗҫисен А. Токаревӑн, Г. Фандеевӑн, А. Петровӑн, А.Асламасӑн, Ф.Васильевӑн, А.Васильевӑн симфониллӗ хайлавӗсем янранӑ.

Чӑваш Республикипе Раҫҫей Федерацийӗн тава тивӗҫлӗ культура ӗҫченӗн пурнӑҫӗ 2000 ҫулта татӑлнӑ.

#Хӗрлӗ Чутай, #Хӗрлӗ Чутай районӗ, #асӑну каҫӗсем