Татьянӑсен кунӗнче Хӗрлӗ Чутайри тӗп вулавӑшра ҫак районти Калкасси ялӗнче ҫуралнӑ Анатолий Алексеевич Тихоновӑн «Ӗмӗтӗм ман малалла…» кӗнеке хӑтлавӗ пулчӗ. Анатолий Алексеевич хӑй вӑхӑтӗнче бухгалтер пулса районти тӗрлӗ организацисенче ӗҫленӗ, ҫав вӑхӑтрах 3-мӗш ушкӑн инваличӗ пушӑ вӑхӑтра поэзипе интересленнӗ. 2013 ҫулта унӑн пӗрремӗш кӗнеки — «Ӗмӗтленнӗ, ӗмӗтленетӗп-ха...» сӑвӑсен пуххи — вулавшӑн ача-пӑча уйрӑмӗнче кун ҫути курнӑ. Зоя Спиридонова поэт-композитор Анатолий Ӗмӗтӗн сӑввипе «Мӑшӑрӑм» ятлӑ юрӑ кӗвӗленӗ. Автор ӑна хӑйӗн мӑшӑрне — Лидия Федоровнӑна — халалланӑ.

Литература ҫулталӑкӗнче, раштав уйӑхӗнче кун ҫути курнӑ ҫӗнӗ кӗнекере ытларах юрату ҫинчен хайланӑ сӑвӑсем. Кӗнеке хуплашки те, тӳрех вулакана хӑй патне туртать, сӑвӑсем чуна тыткӑнлаҫҫӗ. Хӑтлава Елена Чубайкина библиотекарь ертсе пычӗ. Пухӑннисем малтанах «Мӑшӑрӑм» юрӑ итлесе киленчӗҫ. Анатолий Ӗмӗт районти «Пирӗн пурнӑҫ» хаҫатпа, республикӑра тухса тӑракан «Ҫамрӑксен хаҫачӗ» хаҫатпа, «Капкӑн» журналпа туслӑ ҫыхӑну тытать. Кунта унӑн сӑввисем час-часах пичетленеҫҫӗ.

Нина Романова поэтӑн малтанхи кӗнекине еплерех кӑларнине каласа кӑтартрӗ. «Пирӗн пурнӑҫ» хаҫат редакцийӗ, тӗп

вулавӑш ертӳҫин ӗҫӗсене туса пыракан Валентина Таллерова тата ыттисем Анатолий Ӗмӗте пултарулӑхра татах та ытларах ҫитӗнӳсем тума, вулакансене хитре сӑвӑсемпе савӑнтарма вӑй-халпа ҫирӗп сывлӑх сунчӗҫ.

«Шухӑш-ӗмӗт ман сӑвӑра,

Пулатӑп-и ӗҫре е вӑйӑра.

Кӑмӑл, вӑй-хӑватӑм ҫӗкленет,

Сӑвӑсем шӑрҫалассӑм килет».

#кӗнекесем, #хӑтлавсем, #Хӗрлӗ Чутай, #Хӗрлӗ Чутай районӗ, #Калкасси, #культура, #вулавӑшсем