Уявра

Нумаях пулмасть Ярмушка ял тӑрӑхӗнче пысӑк уяв кӗрленӗ: Авшак Элмен ялӗн кунне тата Турӑ Амӑшӗн Хусанти турӑшӗн чиркӗвне никӗсленӗренпе 265 ҫул ҫитнине паллӑ тунӑ.

Уява район администрацийӗн капиталлӑ строительство пайӗн пуҫлӑхӗ В. Ильин уҫнӑ. Сумлӑ уявпа Ярмушка ял тӑрӑхӗн пуҫлӑхӗн тивӗҫӗсене пурнӑҫласа пыракан Г. Афанасьев, район депутачӗ В.Анисимов саламланӑ.

Авшак Элмен ялӗ мӗнле пуҫланса кайни ҫинчен Чӑваш ен таврапӗлӳҫисен пӗрлӗхӗн пайташӗ С. Отрыванов каласа панӑ. Раҫҫей Федерацийӗн журналистсен тата ҫыравҫӑсем союзӗсен членӗ О. Куликова (Улькка Элмен) шкул историйӗпе паллаштарнӑ. Вырӑнти чиркӗве мӗнле никӗслени те кӑсӑклӑ. Кун пирки Раҫҫей Федерацийӗн вӗрентӗвӗн тава тивӗҫлӗ ӗҫченӗ, нумай кӗнеке авторӗ Н.Иванова доцент каласа кӑтартнӑ.

Ят-сума тӳрӗ кӑмӑлпа ӗҫлесе тивӗҫнисем яланах хисепре. Авшак Элменти паллӑ ҫынсен ӗҫӗ-хӗлӗпе А.Немилов вӗрентекен паллаштарнӑ.

Ял уявӗнчен ачасем те пӑрӑнса юлманнине ырламалла. Акӑ 8-мӗш класри М. Муракова Авшак Элменти вӑрҫӑпа ӗҫ ветеранӗсем ҫинчен каласа кӑтартнӑ.

Н. Ивановӑн пуҫарулӑхне пула хӑнасен кӗнеки уҫӑлнӑ. Ӑна алла тытсассӑн сумлӑ хӑнасем уява пысӑк хак панине тӳрех куратӑн. Вӗсем кӗнекере хӑйсемпе ҫыхӑнмалли телефон номерӗсене те ҫырса хӑварнӑ.

Уяв юрӑ-ташӑсӑр пулмасть. Авшак Элменти «Хунав» ача-пӑча фольклор коллективӗ, Пуканкассинчи «Чашма» халӑх ансамблӗ, Шупашкарти чӑваш эстрада ҫӑлтӑрӗсем — Григорий Вакку, Катя Петрова, Алина Федорова пысӑк концерт кӑтартса халӑха савӑнтарнӑ.

Ял халӑхӗ уява йӗркелекенсене, спонсорсене — Г.Егорова, Н.Иванована, В.Милютина, П.Тымарлана, Л.Трифонова, Ольгӑпа Иван Куликовсене, О.Фомина, Р. Яковлева, А.Яковлева, Г.Сорокина — чун-чӗререн тав тӑвать.

#Вӑрнар районӗ, #Ярмушка ял тӑрӑхӗ, #Авшак Элмен, #Пуканкасси, #Калинино