Юпан 12-мӗшӗнче ЧР Элтеперӗ Михаил Игнатьев йӑлана кӗнӗ канашлӑва ирттернӗ. Унта шкулсенче апатлану хакӗ кӑҫалхи 4-мӗш кварталта тата ҫитес ҫулхи пӗрремӗш ҫур ҫулта мӗн чухлӗ хӑпарма пултарассине сӳтсе явнӑ.

ЧР вӗренӳ министрӗ Владимир Иванов пӗлтернӗ тӑрӑх, шкулсенчи апатланушӑн тӳлемелли хак ҫулталӑк пуҫланнӑранпа улшӑнман. Хӗрлӗ Чутай районӗнче — 43 тенкӗ, Шупашкарта 84 тенкӗ пулнӑ.

Анчах хальлӗхе палӑртнӑ тӑрӑх, 2016 ҫулхи пӗрремӗш ҫур ҫулта апатлану хакӗ ӳсмелле. Ку 11 муниципалитетра (Улатӑр, Канаш, Куславкка, Комсомольски, Муркаш, Ҫӗрпӳ, Шупашкар, Ҫӗмӗрле, Елчӗк, Тӑвай районӗсенче) 1–5 процент хӑпармалла. Ултӑ муниципалитетра вара (Вӑрнар, Хӗрлӗ Чутай, Сӗнтӗрвӑрри, Пӑрачкав, Вӑрмар районӗсенче, Ҫӗнӗ Шупашкар хулинче) — 5–10 прцент.

Канаш, Шупашкар хулисенче тата Патӑрьел районӗнче апатлану хакӗ 10–15 процент ӳсмелле. 5 муниципалитетра (Йӗпреҫ, Красноармейски, Етӗрне районӗсенче тата Улатӑр, Ҫӗмӗрле районӗсенче) апатлану хакне ӳстерме палӑртман.

Михаил Игнатьев ҫакна уйрӑммӑн палӑртнӑ: хӑш-пӗр муниципалитетра апатланушӑн хак инфляци шайӗнчен ытларах хӑпарать. Ҫавӑнпа вӑл кун пек юраманнине каланӑ. Ара, районсенче ял хуҫалӑх продукцийӗ те хӑйсенех-ҫке.

#вӗренӳ, #хаксем, #апат-ҫимӗҫ, #шкулсем, #Улатӑр районӗ, #Канаш районӗ, #Куславкка районӗ, #Комсомольски районӗ, #Муркаш районӗ, #Ҫӗрпӳ районӗ, #Шупашкар районӗ, #Ҫӗмӗрле районӗ, #Елчӗк районӗ, #Тӑвай районӗ, #Вӑрнар районӗ, #Вӑрмар районӗ, #Хӗрлӗ Чутай районӗ, #Сӗнтӗрвӑрри районӗ, #Пӑрачкав районӗ, #Патӑрьел районӗ, #Шупашкар, #Ҫӗнӗ Шупашкар, #Канаш