Яндекс.дзен сайтри сӑн

Шупашкарта «Садовый» тата «Байконур» микрорайонсен хушшинче хир сысни ҫӳренине асӑрханӑ. Вӑл пӗчченех пулнӑ.

Специалистсем ӑнлантарнӑ тӑрӑх, ӑна апат-ҫимӗҫ юлашкийӗсем илӗртме пултарнӑ. Тепӗр тесен, ҫав вӑрманлӑ ҫырма тискер чӗрчунсемшӗн лайӑх вырӑн. Унта вӗсем пурӑнаяҫҫӗ. Анчах ҫынсемшӗн хӑрушлӑх кӑларса тӑратмаҫҫӗ.

Сӑмах май, нумаях пулмасть Шупашкарта хир качаки Мускав проспектне тухнӑ. Шел, ӑна машина ҫапса хӑварнӑ, чӗрчун вилнӗ. Хир качакисем унашкал вырӑна тухсан ҫухалса каяҫҫӗ, унталла-кунталла чупма пуҫлаҫҫӗ, стреса пула та вилме пултараҫҫӗ.

Яндекс.дзен сайтри сӑн

Шупашарта пурӑнакан 59 ҫулти хӗрарӑм такамсем ун ячӗпе кредит илеҫҫӗ тесе хӑранӑ та ултавҫӑсене 2 миллион та 130 пин тенкӗ куҫарса панӑ. Кун хыҫҫӑн вӑл полицие кайса пулӑшу ыйтнӑ.

Ӗҫ-пуҫ акӑ мӗнле пулса иртнӗ. Ун патне палламан ҫын шӑнкӑравланӑ, вӑл банк ӗҫченӗ имӗш. Хайхискер такам ун ячӗпе кредит илме хӑтланнине пӗлтернӗ. Ҫак ҫын ӑна укҫана хӑрушсӑр счет ҫине куҫарма сӗннӗ. Ҫапла Шупашкар хӗрарӑмӗ тӗрлӗ телефон номерӗсемпе 2 миллион ытла тенкӗ куҫарса панӑ.

Халӗ полици ултавҫӑсене шырать.

Яндекс.дзен сайтри сӑн

Ватӑ хӗрарӑм банка пырса ҫур миллион тенкине илсе тӳрех урӑх счет ҫине куҫарасшӑн пулнӑ. Ҫав вӑхӑтра вӑл пӗрмай такампа телефонпа калаҫнӑ. Ку банк ӗҫченне сисчӗвлентернӗ. Кун пирки вӑл полицие пӗлтернӗ.

Кайран 64 ҫулти хӗрарӑм, Норильскран Шупашкара хӑнана килнӗскер, акӑ мӗн каласа кӑтартнӑ.

Ун патне ирхине хӑйӗнпе банк ӗҫченӗ тесе паллаштарнӑ ҫын шӑнкӑравланӑ, унӑн счечӗ ҫинчен такам укҫа вӑрлама тӑнӑ имӗш. Унтан вӑл «полицейскипе» калаҫнӑ. Лешӗ ӑна пулӑшма шантарнӑ.

Малалла яланхи схемах пулнӑ: укҫана илмелле те хӑрушсӑр счет ҫине куҫармалла. Анчах кун пирки банк ӗҫченӗсене каламалла мар. Вӗсем ултавҫӑсемпе пӗр ҫӑвартан имӗш.

Юрать-ха, банк ӗҫченӗ сисчӗвленнӗ. Унсӑрӑн хӗрарӑм укҫа-тенкӗсӗрех тӑрса юлӗччӗ.

Шупашкар хулинче пурӑнакан пӗр арҫын полици уйрӑмне сирпӗтессипе хӑратнӑ.

Кӑҫалхи нарӑс уйӑхӗн 16-мӗшӗнче вӑл пӗлӗшӗ патӗнче хӑналаннӑ. Киле кайма пуҫтарӑнсан тамбур алӑкӗ хуппипе тухайман та «112» номерпе ҫӑлавҫӑсем патне шӑнкӑравланӑ, алӑка уҫса пама специалиста ярса пама ыйтнӑ. Оператор ку тӗслӗх васкавлӑ шутланманнине, алӑка уйрӑм ҫын службисем укҫалла уҫса парассине пӗлтернӗ.

Тарӑхнӑ арҫын ҫӑлавҫӑсем патне тата шӑнкӑравланӑ, Шупашкарти Трактор тӑвакансен проспектӗнчи 32-мӗш «А» ҫуртра вырнаҫнӑ полицин уйрӑмӗн ҫуртне сирпӗтсе ярассипе хӑратнӑ.

Тамбур ҫӑрин уҫҫине тупса алӑка уҫнӑ хыҫҫӑн вӑл полицие кайнӑ, хӑй тӗрӗс мар хӑтланнине кӑштах йышӑннӑ.

Суд арҫынна тӗрмене хупмасӑр 3 ҫуллӑха ирӗкрен хӑтарма йышӑннӑ, сӑнав вӑхӑтне 2 ҫуллӑха палӑртнӑ.

finobzor.ru сайтри сӑн

Шупашкарта пурӑнакан 19 ҫулти каччӑ улталас тенӗ те... хӑй ултавҫӑсен тӗлне лекнӗ.

Ҫӗртме уйӑхӗн пуҫламӑшӗнче хайхискер тӗнче тетелӗнче больничнӑй туса пама пулӑшакан ҫыннӑн номерне тупнӑ та заявка хӑварнӑ. Кӗҫех ун~~~~ патне шӑнкӑравланӑ.

Палламан ҫын икӗ больничнӑйшӑн 5,5 пин тенкӗ куҫарса пама ыйтнӑ. Каччӑ укҫана унӑн счечӗ ҫине куҫарнӑ. Анчах больничнӑя ниепле те кӗтсе илеймен. Ултавҫӑсен тӗлне лекнине ӑнлансан ирӗксӗрех полицие утма тивнӗ.

"Чеб.ру" сайтри сӑн

Ҫӗнӗ Шупашкарта пляжа хирӗҫ, Атӑлта, матрассем ҫинче пыракан хӗрарӑмпа виҫе ачана шыв юххи илсе кайнине ҫынсем асӑрханӑ. Вӗсемех ҫӑлавҫӑсене чӗннӗ.

Ку ӗнер, утӑ уйӑхӗн 25-мӗшӗнче, пулнӑ. Ҫӑлавҫӑсем моторлӑ кимӗпе вырӑна хӑвӑртах ҫитнӗ. Икӗ матрас ҫинче хӗрарӑм тата 18 ҫул тултарман 3 ҫамрӑк пулнӑ.

Ҫӑлавҫӑсем вӗсене кимӗ ҫине лартса ҫыран хӗррине илсе тухнӑ. Юрать-ха, никам та шар курман.

cap.ru сӑнӳкерчӗкӗ. Николай Макеев тухтӑрпа Кирилл Мясников медбрат

Утӑ уйӑхӗн 21-мӗшӗнче Шупашкарти ҫӗнӗ кӑнтӑр районӗнче иртен-ҫӳрен куҫӗ умӗнчех хӗрарӑм персе аннӑ. Вӑл 10-мӗш хутран ӳкнӗ. Ҫынсем часрах васкавлӑ медпулӑшу чӗннӗ.

Николай Макеев тухтӑрпа Кирилл Мясников медбрат хӗрарӑма ыратнине ирттерекен укол тунӑ. Унӑн аяк пӗрчисем хуҫӑлнӑ, шалти органӗсем сиенленнӗ. Шурӑ халатлисем ӑна медпулӑшу машини ҫине асӑрханса йӑтса хунӑ. Пульницӑна ҫитиччен вӗсем унӑн пурнӑҫӗшӗн кӗрешнӗ, комӑна кӗрсе ӳкме паман. Ҫапла хӗрарӑмӑн ҫак кун иккӗмӗш ҫуралнӑ кунӗ пулса тӑнӑ.

forum.na-svyazi.ru портал вырнаҫтанӑ видеоран илнӗ скриншот

Паян, утӑ уйӑхӗн 26-мӗшӗнче, Шупашкарти нумай хваттерлӗ ҫуртсенчен пӗринче пушар алхасма тытӑннӑ.

Вут-ҫулӑм Ленинла комсомол урамӗнчи 62-мӗш ҫуртра алхаснӑ. Вут-ҫулӑмпа кӗрешекенсене инкек пирки 7 сехет те 10 минутра пӗлтернӗ. Пушар ҫиччӗмӗш хутра вырнаҫнӑ икӗ пӳлӗмлӗ хваттерте тухнӑ.

9 хутлӑ ҫуртри подъездран 25 ҫынна эвакуациленӗ. Пушара 7 сехет те 49 минут тӗлне сӳнтернӗ.

Инкек сӑлтавне тӗпчевҫӗсем палӑртӗҫ.

Ҫӑлав службин архивӗнчи сӑн

Утӑ уйӑхӗн 23-мӗшӗнче Ҫӗнӗ Шупашкарта качакана ҫӑлнӑ. Вӑл канализаци ҫӑлне кӗрсе ӳкнӗ те тухайман.

Ҫӑлавҫӑсем патне шӑнкӑрав 17 сехет те 17 минутра ҫитнӗ. Вӗсем Ҫӗнӗ Шупашкарти Промышленноҫ урамне часах ҫитнӗ.

Ҫӑлавҫӑсем альпхатӗрпе усӑ курса качакана канализаци ҫӑлӗнчен туртса кӑларнӑ. "Хӑраса ӳкнӗ, анчах ҫӑлран тухнипе савӑннӑ качака тав тума манчӗ. Часрах хӑйӗн ялне, киле, чупса кайрӗ", - шӳтленӗ ҫӑлавҫӑсем.

Видоери скриншот

«Руль умӗнче» портал пӗлтернӗ тӑрӑх паян ирхине Лапсар тӑкӑрлӑкӗнче грейдер ӗҫленине асӑрханӑ. Вӑл кунти шӑтӑк-путӑк ҫула тикӗслет.

Лапсар тӑкӑрлӑкӗнчи ҫула юсас ӗҫе кӑҫал пуҫламалла. Ҫакӑн валли республика бюджетӗнче 67 миллион тенкӗ пӑхса хӑварнӑ... Апла пулин те юсав ӗҫӗ хӑҫан пуҫласси паллӑ мар-ха: ӑна тумалли организацине суйламашкӑн аукциона халӗ те ирттермен. Ӗҫӗ унта пит нумай, вӑл 3 тапхӑр хушшинче иртмелле. Лапсар тӑкӑрлӑкне юсамашкӑн пӗтӗмӗшле 1,5 млрд тенкӗ кирлӗ.

Грейдера шӑтӑк-путӑксене тикӗслеме янин сӑлтавне хӑшӗ-пӗри «ПравдаПФО» кӑларӑмра нумай пулмасть ятарлӑ статья тухнипе ҫыхӑнтарать. Вӑл статьяра юсав ниепле те пуҫланманнине палӑртнӑ, кунти ҫул вара машшинсемшӗн ытла та юрӑхсӑр пулни пирки ҫырнӑ.