Ҫу уйӑхӗн 26-мӗшӗнче Шупашкар районӗнчи Ҫатракассинче ларакан ВАЗ-2114 машина ҫухалнӑ, ҫӗртмен 17-мӗшӗнче Шупашкарти 9-мӗш Пилӗкҫуллӑх проспектӗнчи парковкӑран ҫавнашкал модельлӗ машина "ураланнӑ".
Вӑрра 4 уйӑхран тупнӑ. Вӑл - Шупашкар районӗнчи Ҫатракассинче пурӑнакан 36 ҫулти арҫын. Хайхискер йӑлтах каласа кӑтартнӑ. Пӗрремӗш машинӑн запчаҫӗсене кӑларнӑ та ҫунтарса янӑ. Ун чухне вӑл ӳсӗр пулнӑ. Тепӗр машинипе арҫын Мускав облаҫне ларса тухса кайнӑ. Вӑл унта ӗҫленӗ. Ӑна йӗрке хуралҫисем ӗҫ вырӑнӗнче тытса чарнӑ.
Ун тӗлӗшпе пуҫиле ӗҫ пуҫарнӑ.
Ӗнер Шупашкарти 79 ҫулти хӗрарӑм патне темле хӗрарӑм шӑнкӑравланӑ, хӑй макӑрнӑ. Ватӑскер ӑна хӑйӗн хӗрӗ вырӑнне йышӑннӑ. Лешӗ йӗре-йӗре ҫул урлӑ каҫнӑ чухне инкеке лекни пирки каласа кӑтартнӑ. Ун айӑпӗпе авари пулнӑ, водитель реанимацире выртать-мӗн. Куншӑн ӑна явап тыттарӗҫ иккен. Ҫав вӑхӑтрах кинемейпе арҫын калаҫма пуҫланӑ. Вӑл полицейски имӗш. Хайхискер кинемее хӗрне явапран хӑтарма шантарнӑ, куншӑн 1 млн тенкӗ ыйтнӑ.
Ватӑ хӗрарӑмӑн 500 пин тенкӗ кӑна пулнӑ. Вӑл укҫана палламан ҫынна тыттарса янӑ. Упӑшкипе калаҫсан, хӗрӗ патне шӑнкӑравласан тин вӑл ултавҫӑ аллине лекнине ӑнланнӑ.
Шупашкарти арҫын банк карттин выписки илнӗ те счет ҫинчен 19500 тенкӗ ҫухалнине курнӑ. Кун хыҫҫӑн вӑл полицие кайса кун пирки пӗлтернӗ.
Уголовлӑ шырав ӗҫченӗсем палӑртнӑ тӑрӑх, ҫак арҫын тепӗр арҫынпа ют региона шапаша ҫӳренӗ. Хайхискер пӗррехинче ун патӗнче хӑнара пулнӑ. Шӑпах ҫавӑн чухне хӑна пӗлӗшӗн телефонне йӑтса кайнӑ. Экран ҫинче вара пароль пулман.
Хайхискер банк сарӑмӗпе усӑ курса унӑн укҫине хӑйӗн счечӗ ҫине куҫарнӑ.
45 ҫулти арҫын тӗлӗшпе пуҫиле ӗҫ пуҫарнӑ. Ҫакна палӑртмалла: вӑл - алимент парӑмҫи, тӗрмерен ҫулталӑк каялла тухнӑ.
Паян ирех Шупашкарта хваттер ҫуннӑ. Кун пирки «Про Город» хаҫата халӑх корреспонденчӗ пӗлтернӗ.
Ирхи 8 сехет тӗлӗнче Ленин Комсомолӗн урамӗнчи 38-мӗш ҫуртри пӗр хваттер чӳречинчен ҫӑра тӗтӗм явӑнса тухнӑ. Вӑл чи ҫӳлти, 9-мӗш хутри, хваттер пулнӑ.
Пушарнӑйсем вырӑна хӑвӑртах ҫитнӗ. Халӗ ҫулӑм мӗнрен тухнине тӗпчеҫҫӗ.
Чӑваш Енри шкул ачисем «Пысӑк тӑхтав» Пӗтӗм Раҫҫейри конкурса хутшӑннӑ. Финала пирӗн регионтан 17 ача кайнӑ.
Конкурсра пӗтӗмпе 11-мӗш класра вӗренекен 300 ҫамрӑк ҫӗнтернӗ. Вӗсем 1-ер миллион тенкӗ илӗҫ. Ку укҫапа вӗреннӗшӗн тӳлеме пултараҫҫӗ. Аслӑ шкула кӗнӗ чухне хушма балл илме те май пур.
Тепӗр 300 ҫӗнтерӳҫи – 9-10-мӗш класра ӑс пухакансем. Вӗсем 200-шер пин тенке тивӗҫнӗ. Ку укҫана вӗреннӗ ҫӗре яма юрать, ҫавӑн пекех хӑйсене аталантарма май пур.
Пирӗн ентшсенчен ҫаксем ҫӗнтернӗ: Шупашкарти 65-мӗш шкулти Кристина Степанова, Вӑрмар районӗнчи Кӗлкеш шкулӗнчи Галина Сидорова, Шупашкарти 2-мӗш лицейри Кристина Тапинова, Шупашкарти 5-мӗш гимназири Екатерина Аврамова.
Шупашкарти "Садовый" микрорайонти шкула ку ҫулталӑк вӗҫӗччен туса пӗтерме шантарнӑччӗ. Ӗҫсем мӗнле пыраҫҫӗ-ха унта?
Шупашкар хула администрацийӗн пуҫлӑхӗ Денис Спирин телеграм-каналӗнче пӗлтернӗ хыпара вуласан ӗҫсем вӑйлах пыманнине ӑнланма пулать. Вӑл стройка вырӑнне кайса курнӑ. Сити-менеджер нумай асӑрхаттару тунӑ, ӗҫлекенсен йышне ӳстермелине каланӑ. "Унсӑрӑн штраф санкцийӗсемпе усӑ курма тивӗ", - ҫапла ҫырнӑ Денис Спирин телеграм-каналӗнче.
Чӑваш Енре спорт гимнастики енӗпе республика ӑмӑртӑвӗ иртнӗ. Спортӑн ҫак енӗпе туслисем тата спорт гимнастикине юратакансем Шупашкарти Олимп резервӗн 6-мӗш спорт шкулне пуҫтарӑннӑ.
Раҫҫей спорт мастерӗсен икӗ кунхи ӑмӑртӑвӗнче Никита Леснов пӗрремӗш вырӑн йышӑннӑ.
Спорт мастерӗсен кандидачӗсенчен Антон Антонова ҫитекен пулман. Асӑннӑ категорире кӗмӗл медале Андрей Кривошеев, бронзӑна Даниил Лисицын ьивӗҫнӗ.
1-мӗш спорт разрячӗн программинче ылтӑн медале Дмитрий Максимов ҫӗнсе илнӗ. кӗмӗле — Александр Пузырев, бронзӑна — Максим Замахов.
2-мӗш спорт разрячӗн программинче Иван Щербаков ҫӗнтернӗ. Сергей Раськин иккӗмӗш вырӑн йышӑннӑ, виҫҫӗмӗшӗнче — Илья Лавров.
Вӗсем иккӗшӗ те авӑн уйӑхӗн 23-мӗшӗнче ҫухалнӑ. Пӗри Шупашкартан, тепри Муркаш районӗнчен.
Шупашкарта пурӑнакан 65-ри Владимир Александрович Широнов хура куртка, сӑрӑ кофта, хура шӑлавар, ҫавӑн тӗслех кроссовка тӑхӑннӑ пулнӑ, кутамкка ҫакнӑ. Ун пирки мӗн те пулин пӗлсен 89196666680 номерпе шӑнкӑравламалла.
35 ҫулти Александр Викентьевич Николаев сӑрӑ комбинезон, хура тапочка тӑхӑннӑ пулнӑ. Ун пирки 89777084704 номерпе шӑнкӑравласа пӗлтерме ыйтаҫҫӗ.
Шупашкар ҫыннине улталанӑ ют регион арҫыннине тытса чарнӑ. Вӑл - Краснодартан.
Ҫу уйӑхӗн 27-мӗшӗнче Шупашкарти 37 ҫулти арҫын тӳлевсӗр пӗлтерӳсен сайтӗнче ача-пӑча хутӑшӗ туянас тенӗ. Сутуҫӑпа ҫыхӑннӑ та ӑна 12 пин тенкӗ куҫарса панӑ. Кун хыҫҫӑн лешӗ пач ҫухалнӑ.
Шупашкар арҫынни полицие кайса пулӑшу ыйтнӑ. Кун тӗлӗшпе пуҫиле ӗҫ пуҫарнӑ. Краснодар арҫыннине нумаях пулмасть тытса чарнӑ. Унӑн хваттерӗнче 6 телефон, 15 банк картти, нумай симка тупнӑ. 38 ҫулти арҫын айӑпне йышӑннӑ.
Тӳре-шара юпа уйӑхӗн 18-25-мӗшӗсенче Шупашкарта апат-ҫимӗҫ хакӗ мӗнле улшӑннине тишкернӗ. 11 лавккари хаксене шута илнӗ.
Юлашки эрнере ҫак ҫимӗҫсем йӳнелнине палӑртнӑ: сгущенка, консерв, макарон, ҫӑмарта, купӑста, панулми, кишӗр, рис, шӑнтнӑ пулӑ, услам ҫу, шурӑ ҫӑкӑр, сысна ашӗ, тӑвар, пулӑ консервӗ, 5 литрлӑ таса шыв.
Сгущенка 42 тенкӗ таранах йӳнелнӗ, какай консервӗ - 37 тенкӗ, услам ҫу - 34 тенкӗ.
+17.3 °C