Кун пирки Чӑваш Енӗн ҫурт тӑвӑм министрӗ Олег Марков шантарнӑ иккен. Тӑван ҫӗршывӑн аслӑ вӑрҫине хутшӑннисемпе тӑлӑх салтак арӑмӗсене ҫурт-йӗрпе тивӗҫтерес тесе 2010 ҫултан пуҫласа федераци хыснинчен 5,13 миллиард тенкӗ ытла уйӑрнӑ. Ҫав укҫа 5 393 ветеранӑн ҫурт-йӗр ыйтӑвне татма май панӑ. Кӑҫал Чӑваш Ене тата тепӗр 766,5 миллион тенкӗ килнӗ. Ку вӑл 730 шур сухала хваттерпе тивӗҫтерме кайӗ.

Вӑрҫӑ ветеранӗсене ҫурт-йӗрпе тивӗҫтерес программӑна пурнӑҫа кӗртессине вӗҫлесси пирки калаҫнӑ май Чӑваш Ен Элтеперӗ Михаил Игнатьев кӑҫал пур ветеранӑн та ӗмӗчӗ пурнӑҫланассине палӑртнӑ.

Сӑмах май, ку темӑна наци проекчӗсем епле пурнӑҫланнине тишкерессипе республика шайӗнче йӗркеленӗ канашлура сӳтсе явнӑ.

Кун пирки Чӑваш Ен Элтеперӗ Михаил Игнатьев право йӗркине сыхлас енӗпе ирттернӗ координаци канашлӑвӗнче каланӑ-мӗн. Regnum информаци агентстви хыпарланӑ тӑрӑх, кунта сӑмах нумай хваттерлӗ ҫуртсемпе вӗсен умӗсем пирки пырать. Ҫак ӗҫе пурнӑҫлама муниципалитетсене ҫулталӑк ҫурӑ вӑхӑт панӑ иккен — камерӑсене 2014-мӗш ҫул вӗҫлениччен лартса ӗлкӗрмелле. Подьездсемпе картишсене камера лартма хваттер хуҫисен те «кӗмӗл» хывма тивӗ.

Хальӗхе республикӑра 7 300 ытла камера кунӗн-ҫӗрӗн ӳкерет иккен. Вӗсем пулӑшнипе преступленисене уҫса пама та ҫӑмӑл. Тата вӑрӑ-хурахӗсем те камерӑраy сисчӗвленессе шанаҫҫӗ. Сӑмах май каласан. Ҫынсем укҫа уйӑрнипе паянхи кун тӗлне нумай хваттерлӗ 73 ҫурта камерӑпа тивӗҫтернӗ иккен. Тепӗр 26-шӗнче ку ӗҫе пуҫӑннӑ.

Чӑвашстат кӑтартӑвӗпе килешӳллӗн кӑҫал кӑрлач-ака уйӑхӗсем хушшинче ҫурт-йӗр купалакансем республикӑна 82,1 пин тӑваткал метр пурӑнмалли вырӑнпа е тӗпер майлӑ 1 103 хваттерпе тивӗҫтернӗ. Пӗлтерхи кӑтартусемпе танлаштарсан ку 9,1% процент пысӑкрах.

Ку шута ҫӗнӗрен тунӑ хваттерсемсӗр пуҫне реконструкциленисенете кӗртнӗ. Тӑватӑ уйӑх хушшинче 1 961 тв. метр пурӑнмалли вырӑна реконструкциленӗ, 34 429 тӑваткал метр ҫӗнӗ ҫурт-йӗр лартнӑ. Ҫав хушӑрах пысӑк пайне уйрӑм усламҫӑсем туни паллӑ — 45 678 тв. метр. Чӑвашстатра палӑртнӑ тӑрӑх хваттерсен мӗн пур купаланӑ, реконструкциленӗ ҫур йышӗпе (38 172 тв. метр) тенӗ пек ял халӑхӗ хуҫаланӗ.