Чӑваш Енри ача-пӑча уйлӑхӗсенче 3 ҫын кӑшӑлвируспа чирленӗ. Кун пирки паян Правительство ҫуртӗнче иртнӗ планеркӑра ЧР вӗренӳ министрӗ Алла Салаева каланӑ.
Икӗ тӗслӗхе ҫӗртме уйӑхӗнче шута илнӗ. Ҫӗрпӳ районӗнчи Ҫырмапуҫ шкулӗ ҫумӗнчи уйлӑхра пӗрремӗш сенӑра икӗ ҫын ҫак вируспа аптӑранӑ: уйлӑх ертӳҫи тата повар. Уйлӑха тӳрех карантина хупнӑ. Тӗрӗслев ирттернӗ: пӗр ача та чирлени палӑрман.
«Росинка» ача-пӑча уйлӑхӗнче те кӑшӑлвируспа чирленӗ тӗслӗх пулнӑ. унта пӗр вожатӑй инфекциленнӗ.
Паян ирхине, утӑ уйӑхӗн 5-мӗшӗнче, чӗре чирӗпе аптӑракан тин ҫуралнӑ арҫын ачана санитари вертолечӗпе Хусана васкавлӑн илсе ҫитернӗ.
Ача 4 кун каялла ҫуралнӑ, ӑна тухтӑрсем тӗрӗсленӗ те Хусанти ача-пӑча пульницине илсе каймаллине палӑртнӑ. 4 кунра арҫын ача кӑшт ҫирӗпленнӗ, ҫула йӗркеллех чӑтса ирттернӗ.
Ҫул ҫинче унӑн сывлӑхӗ япӑхланман, унпа юнашар тухтӑрсем пулнӑ. Вертолет Хусана 45 минутра ҫитнӗ.
Юлашки талӑкра республикӑра 6 ҫын кӑшӑлвируса пула вилнӗ. Утӑ уйӑхӗн пуҫланнӑранпа кашни кун 5-шер ҫын вилнӗ. Ҫапла пурнӑҫран уйрӑлнисен 21 ҫынна ҫитнӗ ӗнтӗ.
Пандеми пуҫланнӑранпа 1568 ҫын кӑшӑлвируса пула вилнӗ: чирленӗ кашни 18-мӗш ҫын пурнӑҫран уйрӑлнӑ.
Ку таранччен 27532 ҫын каварлӑ вируса ҫаклатнӑ. Вӗсенчен 25164-шӗ сывалнӑ. Юлашки талӑкра 55 ҫын чире парӑнтарнӑ. 57 ҫын вара чирленине палӑртнӑ. Паянхи кун тӗлне стационарта тата абулатори мелӗпе 800 пациент сипленет.
Республикӑра кӑшӑлвирусран хӳтӗленмелли 3 вакцинӑпа усӑ кураҫҫӗ: «Спутник V», «ЭпиВакКорона», «КовиВак». Юлашки иккӗшӗ Чӑваш Ене питех нумай килмен-ха.
Ҫӗртме уйӑхӗн 25-мӗшӗнче тӑваттӑмӗш вакцина ҫаврӑнӑша тухнӑ. Вӑл «Спутник лайт» ятлӑ. Унпа ытларах кӑшӑлвируспа чирленисене е унччен прививка тунисене вакцинацилессине пӗлтернӗ.
«Ку вакцина кӑшӑлвирусран пӗр прививкӑпах хӳтӗленме май парӗ», - тенӗ ЧР Сывлӑх сыхлавӗн министерствин штатра тӑман тӗп специалист-терапевчӗ Лариса Тарасова.
Чӑваш Енре кӑшӑлвируспа чирлекенсем нумайлансах пыраҫҫӗ. Юлашки талӑкра 61 ҫын инфекциленнӗ. Кунашкал кӑтарту нарӑс уйӑхӗнченпе пулман.
Юлашки талӑкра 57 ҫын сывалнӑ. Вилекенсем 5-ӗн пулнӑ. Пӗтӗмпе ку таранччен 1557 ҫын амака пула пурнӑҫран уйрӑлнӑ.
Паянхи кун тӗлне Чӑваш Енре 27415 ҫын кӑшӑлвируспа чирленӗ, вӗсенчен 25048-шӗ сывалнӑ. Хальхи вӑхӑтра стационарта тата килте амбулатори мелӗпе 810 ҫын амакран сипленет.
Ҫӗнӗ кӑшӑлвирус инфекцийӗ тӗнчере тата хамӑр ҫӗршывра сарӑлма тытӑнсанах унран вакцина хӑҫан та пулин шухӑшласа кӑларӗҫех теттӗмӗр. Халӗ вара прививка пур, анчах укол тутарма иккӗленекенсем йышлӑ. Кунта республикӑри паллӑ журналист Александр Белов Фейсбукра ҫырнипе килӗшмесӗр тӑма май ҫуках-тӑр: вакцинацие тӳлевлӗ ирттереҫҫӗ, халӑхӑн уйрӑм пайне ҫеҫ тӳлевсӗр тӑваҫҫӗ тесен, тен, ҫынсем тухтӑр патне васкатчӗҫ пулӗ.
Паянхи куна пирӗн республикӑра халӑхӑн 26 проценчӗ ҫеҫ ковидран прививка тутарнӑ. Тухтӑрсем вара ҫынсен 60 процентне вакцинацилесен ҫеҫ вирус сарӑлнине ҫӗнме пулать тесе шухӑшлаҫҫӗ.
Кӳкеҫре вырнаҫнӑ поликлиникӑна юсама 100 миллион тенкӗ уйӑрнӑ. Вӑл Шупашкар районӗн тӗп пульници шутланать.
Ҫавна май аукцион ирттереҫҫӗ. Малтанхи хака палӑртнӑ: 110 миллион та 875,2 пин тенкӗ. Конкурса пӗтӗмлетсе ҫӗнтерӳҫе суйлӗҫ, вӑл пульницӑна 2021 ҫулхи раштавӑн 11-мӗшӗччен юсаса ҫӗнетме тивӗҫ.
Строительсен ҫурла уйӑхӗн 1-мӗшӗччен демонтаж тума тытӑнмалла. Пульницӑра шалтине ҫӗнетӗҫ, фасада, тӑррине улӑштарӗҫ, пушар тата хурал тытӑмӗсене юсӗҫ.
Владимир Филиппов киноооператор инсульта пула реанимацие лекнӗ. Ку хыпара Фейсбукра Татьяна Ильина (ӑна вӑл хӑй вӑхӑтӗнче тележурналист пулнӑран чылайӑшӗ паллать пулӗ) пӗлтернӗ.
Владимир Филиппов 1950 ҫулхи пуш уйӑхӗн 19-мӗшӗнче Шупашкарта ҫуралнӑ. И.Н. Ульянов ячӗллӗ Чӑваш патшалӑх университетӗнчи истори факультетӗнчен вӗренсе тухнӑ. Тӗп хулари 30, 38, 39-мӗш шкулсенче истори тата музыка предмечӗсене вӗрентнӗ. 1980-1998 ҫулсенче вӑл «Чӑваш Ен» ПТРКра киноооператорта ӗҫленӗ.
Республикӑра кӑшӑлвируспа чирлесси ӳссех пырать. Ҫӗртмен 17-мӗшӗнченпе кунсерен 50 ытла ҫын инфекциленет.
Вилекенсем те нумайланаҫҫӗ. Юлашки талӑкра 5 ҫын вируса пула пурнӑҫран уйрӑлнӑ. Палӑртмалла: 3-мӗш кун ӗнтӗ ҫапла. Пӗтӗмпе 1530 ҫыннӑн пурнӑҫӗ татӑлнӑ.
Ку таранччен 27128 ҫын кӑшӑлвируспа чирленӗ. Вӗсенчен 24793-шӗ сывалнӑ. Юлашки талӑкра 52 ҫын чире парӑнтарнӑ. Кӑшӑлвируспа инфекциленнисем 58-ӑн пулнӑ.
Хальхи вӑхӑтра республикӑра 805 ҫын килте амбулатори мелӗпе е стационарта кӑшӑлвирусран сипленет.
Юлашки кунсенче республикӑра кӑшӑлвируспа чирлекенсем нумайланса пыраҫҫӗ. Ӗнерхи кун тӗлне 97 койка ҫеҫ пушӑ пулнӑ. Кун пирки ЧР сывлӑх сыхлавӗн министрӗн тивӗҫӗсене пурнӑҫлакан Алексей Кизилов пӗлтернӗ.
Ҫӗртме уйӑхӗнче 13 пульницӑра чирлисем валли 1497 койка хатӗрленӗ. Аса илтерер: ҫӗртмен 18-мӗшӗнче Хулари 2-мӗш пульница ковид-госпиталь пек ӗҫлеме пуҫланӑ. Шупашкар районӗн пульници те халӗ кӑшӑлвируслисене йышӑнать.
Ӗнерхи кун тӗлне стационарта 1400 ҫын сипленнӗ. 363 ҫын хӑйне йывӑр туять. 18 пациент ИВЛпа сывлать.
Кӑшӑлвирус сарӑлнӑран Сӗрпӳ, Вӑрнар районӗн тӗп пульницисем, Ҫӗнӗ Шупашкар хулин пульници те ковид-госпиталь пек ӗҫлеме хатӗр. Вӗсенче 570 койка хатӗрлӗҫ, 18 реанимаци койки пулӗ.
+20.3 °C