Шупашкарти Иван Яковлев проспектне хупӗҫ. Кун пирки Шупашкар хула администрацийӗнче пӗлтернӗ. Асӑннӑ проспекта юсаса ҫӗнетекен подряд организацийӗ асӑннӑ ҫул ҫинчи участокпа машинӑсене ҫӳреме вӑхӑтлӑха чарасшӑн.

Аса илтерер: ҫула «Хӑрушсӑр тата паха автомобиль ҫулӗсем» наци проекчӗпе килӗшӳллӗн юсаҫҫӗ.

Подрядчик ҫула Ашмарин урамӗнчен пуҫласа «Хӗвел» пасар таран хупӗ. Анчах нумайлӑха мар. Нарӑс уйӑхӗн 15-мӗшӗнчен пуҫласа нарӑс уйӑхӗн 20-мӗшӗ таран. Ҫав вӑхӑтра машинӑсен Алькеш урлӑ ҫӳреме тивӗ. Тепӗр майлӑ каласан, Кӳкеҫ енчен килсе вӗсем Алькеша кӗрӗҫ, Кӑнтӑр поселокӗнчи пасар патӗнчен Иван Яковлев проспектне тухӗҫ. Шупашкарти Иван Яковлев проспекчӗпе Кӳкеҫ еннелле пыракан машинӑсем Кӑнтӑр поселокне кӗрсе кайса Алькешпа ҫаврӑнса тухӗҫ.

Шупашкарти Иван Яковлев проспектне каллех хупӗҫ. Хула администрацийӗнче пӗлтернӗ тӑрӑх, машинӑсене ҫав ҫулпа ҫӳреме вӑхӑтлӑх чарни ҫула юсанипе ҫыхӑннӑ.

Аса илтерер: асӑннӑ проспекта Шупашкарта темиҫе ӑстрӑмпа юсаҫҫӗ. Малтан кивӗ автовокзал енчен Трактор тӑвакансен проспекчӗпе ҫыхӑнтаракакан ҫул ҫаврине ҫитичченхи сыпӑка сарчӗҫ. Кайран — Трактор тӑвакансен проспекчӗпе ҫыхӑнтаракакан ҫул ҫавринчен тытӑнса Кӑнтӑр поселокне пӑрӑнмалли ҫул ҫаврине ҫитиччен. Юлашкинчен каланине Ҫӗнӗ ҫул умӗн вӑхӑтлӑха уҫрӗҫ. Ҫуркунне ҫав сыпӑка сарса пӗтермелле. Ҫул-йӗр юсакансем халӗ Кӑнтӑр поселокран Канаш шосси патне ҫитичченхи лаптӑка юсама тытӑннӑ. Калӑпӑшлӑ юсав ӗҫӗсене кӑҫалхи юпа уйӑхӗнче вӗҫлеме палӑртнӑ.

Асӑннӑ участокра транспорта ҫӳреме нарӑс уйӑхӗн 10-мӗшӗ хыҫҫӑн вӑхӑтлӑха чарӗҫ.

Паян, кӑрлачӑн 27-мӗшӗнче, Канаш районӗнче пуйӑспа ҫӑмӑл автомашина ҫапӑннӑ. Инкек 15 сехет те 45 минут тӗлӗнче пулса иртнӗ.

Малтанласа палӑртнӑ тӑрӑх, Ӑвӑспӳрт Кипеч ялӗ тӗлӗнче пуйӑс ҫулӗ ҫине «Лада гранта» автомобиль водителӗ хӗрлӗ ҫутта пӑхмасӑр сиксе тухнӑ. Ҫав вӑхӑтра чукун ҫулпа тавар пуйӑсӗ иртсе пынӑ. Инкекре ҫӑмӑл автомобиль водителӗ вырӑнтах вилнӗ. Ҫул-йӗр инспекторӗсем вырӑна пырса ҫитнӗ. Водитель ӳсӗр пулма пултарнӑ текен хыпара та тӗрӗслеҫҫӗ.

Инкеке пула тавар пуйӑсӗ ҫул ҫинчен тухса кайман тесе пӗлтернӗ ҫул-йӗр инспекцийӗ Инстаграмра.

Ҫак инкек ҫулта-йӗрте асӑрханмаллине, пӗрне пӗри хисеплемеллине, пилӗк минут васкаса леш тӗнче ним мар ӑсанма пултарнине тепӗр хут аса илтерет.

Паян Шупашкар районӗнче тӑватӑ пассажир аманнӑ. Ҫул ҫинчи инкек ирхи 8 сехет те 25 минутра пулнӑ. Аварие виҫӗ машина лекнӗ.

Йӗрке хуралҫисем малтанласа палӑртнӑ тӑрӑх, «Муркаш-Шупашкар» маршрутка Шупашкар районӗнчи Хыркасси ялӗ патӗнче ҫынсене каҫмалли вырӑнта чарӑннӑ. Ун ҫине «Скания» грузовик пырса кӗнӗ. Светофор патӗнче ларакан «Ауди» автомашина водителӗ пысӑк машина пырса кӗнине тӗкӗр ҫинче асӑрхасан ҫул айккине пӑрӑнма хӑтланнӑ, анчах ӗлкӗреймен. Машинӑсем пурте лапчӑннӑ. Маршруткӑри 12 пассажиртан тӑваттӑшӗ, ҫав шутра 16-ри хӗрача та пулнӑ, аманнӑ.

Инкек вырӑнне ҫул-йӗр инспекторӗсем пырса ҫитнӗ. Чӑваш Енӗн Шалти ӗҫсен министерствин пресс-службинче пӗлтернӗ тӑрӑх, авари сӑлтавне тӗпчевҫӗсем палӑртӗҫ.

Чӑваш Енри хӗрарӑмсен сывлӑхне тӗрӗслеме кӑҫал та ятарлӑ маммографсем ҫула тухӗҫ. Республикӑн онкологи диспансерӗнче пӗлтернӗ тӑрӑх, куҫса ҫӳрекен рентген комплексӗсем кӑҫал пирӗн республикӑра виҫҫӗн тан ҫула тухӗҫ.

2019 ҫулта куҫса ҫӳрекен икӗ комплекс республикӑри районсене 150 хут ытла ҫитсе килнӗ. Машинӑра вырнаҫтарнӑ цифра маммографӗсем ҫав вӑхӑтра 6,5 пин ытла хӗрарӑм сывлӑхне тӗрӗсленӗ. Маммографсем кӑкӑр шыҫҫине вӑхӑтра тупса палӑртма пулӑшаҫҫӗ. Чире мӗн чухлӗ иртерех асӑрхатӑн, ӑна сиплеме ҫавӑн чухлӗ ҫӑмӑлрах теҫҫӗ.

«Маммологи онкопатрульне» онкологи диспансерӗ профилактика тӗллевӗпе 2015 ҫулхи нарӑс уйӑхӗнченпе усӑ курать. Тӗрӗслев вӑхӑтӗнче 39 ҫултан аслӑрах хӗрарӑмсене йышӑнаҫҫӗ.

Етӗрне районӗнче икӗ машина ҫапӑннӑ та виҫҫӗн пульницӑна лекнӗ.

Пӑтӑрмах раштав уйӑхӗн 29-мӗшӗнче ирхи 4 сехет те 10 минутра М-7 «Атӑл» ҫул ҫинче пулса иртнӗ. Ҫул-йӗр инспекторӗсем малтанласа шухӑшланӑ тӑрӑх, «Лада Гранта» автомобиль водителӗ хирӗҫ ҫул ҫине астумасӑр тухса кайнӑ. Унта вӑл «Лада Ларгус» машинӑпа ҫапӑннӑ. «Лада Грантӑн» водительне пульницӑна, реанимаци уйрӑмне, илсе кайнӑ. «Ларгус» машина водителӗпе автомобильте пулнӑ хӗрарӑм та пульницӑна лекмеллех суранланнӑ.

«Лада Гранта» водителӗ тӗлӗшпе административлӑ ӗҫ пуҫарнӑ. Ҫапла пӗлтернӗ ҫул-йӗр инспекторӗсем Инстаграмри хӑйсен страницинче. Ҫав вӑхӑтрах комментарисенче ҫула начар тытса тӑраҫҫӗ, ҫул питех те пӑрлак тесе пӑшӑрханакансем те йышлӑ.

Шупашкарти Иван Яковлев проспекчӗпе машинӑсене ҫӳретме тытӑннӑ. Ҫӗнӗ ҫулччен ҫав ҫула уҫассине республикӑн тӗп хулин сити-менеджерӗ Алексей Ладыков ҫак эрнере журналистсене пӗлтернӗччӗ-ха. Каланӑ сӑмаха тытнине халӗ, ав, хамӑр курса ӗнентӗмӗр.

Сӑмахӑмӑр — Иван Яковлев проспекчӗн 9-мӗш пилӗкҫуллӑх урамне пӑрӑнакан ҫул ҫавринчен тытӑнса Кӑнтӑр поселокне пӑрӑнмалли вырӑн патне ҫитичченхи лаптӑк ҫинчен.

Асӑннӑ урамри ҫав лаптӑка кӑҫал кӗркунне юсама тытӑннӑччӗ. Тӳррипе каласан, халӗ вӑл ҫула пӗтӗмпех туса пӗтереймен-ха. Асфальтӑн ҫиелти сийне ҫуркунне сарӗҫ. Ҫакӑн пирки Шупашкар хула администрацийӗн пуҫлӑхӗ Алексей Ладыков Инстаграмри хӑйӗн страницинче пӗлтернӗ.

Чӑн та, паян 11 сехет тӗлӗнче вӑл ҫула уҫманччӗ, халӗ унтан машинӑсене ҫеҫ мар, троллейбуссене те янӑ.

Хӗрлӗ Чутай районӗнчи Атнар ялӗнчи ӳсӗр водителе тытса чарнӑ. Ҫакӑн пирки Ҫул-йӗр хӑрушсӑрлӑх инспекцийӗн Чӑваш Енри управленийӗнче пӗлтернӗ.

Асӑннӑ ведомствӑн пресс-служби пӗлтернӗ тӑрӑх, «Нетрезвый водитель» (чӑв. Урӑ мар водитель) калӑпӑшлӑ профилактика мероприятийӗ малалла пырать.

Водительсем ӳсӗрле руль умне ларса хӑйсене хӑрушлӑха кӗртсе ӳкереҫҫӗ ҫеҫ мар-ҫке. Вӗсене пула ним айӑпсӑр ҫынсемех: пассажирсемпе водительсем — шар курма пултараҫҫӗ.

Атнар ялӗнче тытса чарнӑ водитель, сӑмахран, унччен те ӳсӗрле ҫакланнӑ. Ҫавна май ун тӗлӗшпе пуҫиле ӗҫ пуҫарасшӑн. Шупашкарта, ав, Орлов урамӗнче ӳсӗр водителе пула инкек пулнӑ.

Ҫул-йӗр инспекторӗсем ӳсӗр водительсем пирки 102 номерпе шӑнкӑравласа систерме ыйтаҫҫӗ.

Ҫак кунсенче Чӑваш Енри ҫул-йӗр инспекторӗсем инкексем пирки пӗлтерсех тӑраҫҫӗ. Ҫул пӑрлак, машинӑсем хӑвӑрт чарӑнаймаҫҫӗ. Кипкепе ҫуралнисем инкекре чӗрех юлаҫҫӗ пулсан, теприсен шӑпи кӑрарах-ши: вӗсем вырӑнтах вилеҫҫӗ.

Паян Канаш районӗнче инкек пулса иртнӗ. Ирхи 7 сехет те 30 минут тӗлӗнче виҫӗ машина ҫапӑннӑ. Вӗсенчен пӗрин водителӗ, 39 ҫулти хӗрарӑм, вилнӗ.

Ҫул-йӗр инспекторӗсем малтанласа шухӑшланӑ тӑрӑх, «Лада Калина» рулӗ умӗнчи хӗрарӑм хӑй умӗнче пыракан «ГАЗель» автомобильтен иртсе каяс тенӗ. Ҫав вӑхӑтра хирӗҫ ҫулпа «Рено» килнӗ. Ӑна та хӗрарӑм-водитель тытса пынӑ. 45-ри водитель хӑйне хирӗҫ сиксе тухнӑ машинӑпа ҫапӑнас мар тесе чарӑнма хӑтланнӑ. Ҫавна май вӑл хирӗҫ ҫул ҫине тухса кайнӑ. Унта хайхи «Лада Калинӑпа» (хайхи малтан асӑннӑ машина. Вӑл хӑйӗн ҫулӗ ҫине кӗме ӗлкӗрнӗ ӗнтӗ) ҫапӑннӑ, «Лада Калина» ҫине хыҫра пыракан «ГАЗель» пырса кӗнӗ.

«Калина» рулӗ умӗнчи хӗрарӑм вырӑнтах вилнӗ. «Рено» салонӗнчи хӗрарӑма тата 8 ҫулхи хӗрачана тухтӑр пулӑшӑвӗ кирлӗ пулса тухнӑ.

Шупашкар районӗнче икӗ грузовик, ҫӑмӑл машина тата кроссовер ҫапӑннӑ. Инкеке пула пӗр водитель тата 6 ҫулти ача пульницӑна лекнӗ.

Чӑваш Ен Ҫул-йӗр хӑрушсӑрлӑх инспекцийӗн управленийӗнче пӗлтернӗ тӑрӑх, инкек ҫӗркаҫ, раштавӑн 16-мӗшӗнче, 22 сехет те 10 минутра М-7 «Атӑл» федераци трасси ҫинче, Шупашкар районӗнчи Ҫатракасси ялӗ тӗлӗнче пулса иртнӗ.

«Hyundai Creta» рульне тытса пыракан 60 ҫулти водитель (машина Хусан енне кяканскер пулнӑ) «Мерседес Бенц Actros» йывӑр тиевлӗ машинӑпа пырса ҫапӑннӑ. Ҫапӑннӑ хыҫҫӑн грузовикӑн малти урапи шӑтнӑ та вӑл хирӗҫ ҫул ҫине тухса кайнӑ. Унта «Мерседес» цистернӑллӑ «КамАЗпа» ҫапӑннӑ. «КамАЗ» ҫул айккине пӑрӑнса кӗрсе кайнӑ. Унпа ҫула май пыракан «Киа Рио» автомобиль инкекрен пӑрӑнма хӑтланса ҫул хӗррине чӑмнӑ.

«Hyundai Creta» водителӗ тата 6 ҫулти пассажир пульницӑна лекнӗ.