Ку лайӑх хыпар темелле: иккӗмӗш кун ӗнтӗ Чӑваш Енре кӑшӑлвирусран 1 ҫын вилет. Ҫу уйӑхӗн пуҫланнӑранпа 22 ҫыннӑн пурнӑҫӗ ҫак вируса пула татӑлнӑ. Пандеми пуҫланнӑранпа республикӑра 1388 ҫын вилнӗ.
Паянхи кун тӗлне 24730 ҫын инфекциленнӗ. Вӗсенчен 22561-шӗ сывалнӑ. Юлашки талӑкра 49 ҫын чирленине палӑртнӑ, сывалакансем 65-ӗн пулнӑ.
Паянхи куна илес тӗк, стационарта тата килте амбулатори мелӗпе кашӑлвирусран 781 ҫын сипленет.
Шупашкар хулинче пурӑнакан 40 ҫулти хӗрарӑма упӑшкине вӗлернӗшӗн айӑпласшӑн. Ятарласа вӗлермен-ха вӑл. Малтан хытӑ хӗнесе пӗтернӗ, унтан арҫын вилсе кайнӑ.
Тӗпчевҫӗсем шухӑшланӑ тӑрӑх, ҫу уйӑхӗн 1-мӗшӗнчи каҫхине арӑмӗпе упӑшки Шупашкарти общежитисенчен пӗринче хӑнара пулнӑ. Ӳсӗр хӗрарӑмпа арҫын хушшинче тавлашу сиксе тухнӑ. Хӗрарӑм хӑйӗнчен 8 ҫул аслӑрах упӑшкине пуҫӗнчен тата ытти вырӑнтан тапса-ҫапса пӗтернӗ. Арҫыннӑн пит шӑмми, аяк пӗрчисем ванса-хуҫӑлса пӗтнӗ. Сурансене пула арҫын тепӗр кунхине килӗнчех вилсе кайнӑ.
Хӗрарӑма тытса чарнӑ, ӑна вӑхӑтлӑха хупса хунӑ. Пуҫиле ӗҫе малалла тӗпчеҫҫӗ.
Ӗнер, ҫу уйӑхӗн 3-мӗшӗнче, ирхи 7 сехетре, Ҫӗрпӳ районӗнче мотоциклист инкеке лекнӗ. Вӑл «Молодежный–Патӑрьел–Шӑнар» автоҫулпа пынӑ.
«Авантис» спорт мотоциклӗпе ҫула тухнӑ 26 ҫулти каччӑ хирӗҫ килекен ҫул ҫине астумасӑр тухса кайнӑ, унтан ҫул айккине чӑмнӑ. Ҫанталӑк йӗпе-сапа тӑни те витӗм кӳнӗ-тӗр. Ҫул ҫинчи инкеке пула ҫамрӑк ҫын вырӑнтах вилсе кайнӑ. Вӑл хӑй Красноармейски районӗнчен пулнӑ. Ҫул-йӗр хӑрушсӑрлӑхӗн автоинспекторӗсем пӗлтернӗ тӑрӑх, хӑвӑртлӑха пӑхӑнманшӑн пӗлтӗр каччӑна административлӑ майпа 6 хутчен явап тыттарнӑ.
Шупашкар районӗнчи кашни яла асфальт ҫулпа темиҫе ҫул каяллах ҫыхӑнтарнӑччӗ. Кайран ялти ҫулсене те е асфальт, е вак чул сарма тытӑнчӗҫ. Ҫапах та 21-мӗш ӗмӗрти ырлӑх ҫитмен урамсем те пур-ха. Вӗсенчен пӗринче васкавлӑ пулӑшу машини лакса ларнӑ.
Чирлӗ ҫын патне пынӑ тухтӑрсем автомобильтен анса ҫуран кайнӑ. Утса мар, чупса. Ҫав вӑхӑтра васкавлӑ пулӑшу машинине ялти пӗр тракторист лачакаран туртса кӑларнӑ. Унтан чирлӗ ҫынна тухтӑрсем пульницӑна илсе кайнӑ.
Чӑваш Енре виҫӗ ҫыннӑн кӑшӑлвирусӑн Британи штамӗ пулнине палӑртнӑ. Кун пирки Роспотребнадзорӑн Чӑваш Енри управленийӗн ертӳҫин тивӗҫӗсене пурнӑҫлакан Вера Головач оперштаб ларӑвӗнче пӗлтернӗ.
Тин кӑна республикӑра ҫак вируспа чирлесси чакса пыратчӗ. Халӗ ку кӑтарту тата вӑрахланнӑ. Юлашки эрнере чирлесси 13 процент ӳснӗ, талӑкне 46-60 ҫын инфекциленет.
Кӑшӑлвирус сарӑлассине чакарас тӗллевпе ведомство республика правительствине тата муниципалитетсене массӑллӑ меропряитисене пӑрахӑҫлама сӗннӗ.
Шупашкрати Гагарин урамӗнчи ача-пӑча поликлиники малашне пациентсене ҫӗнӗ адреспа йышӑнма пуҫлӗ. Кун пирки Хулан 2-мӗш пульници пӗлтерет.
ЧР Сывлӑх сыхлавӗн хушӑвӗпе килӗшӳллӗн, Гагарин урамӗнчи ача-пӑча поликлиники Хулан 2-мӗш пульницин йышӗнчен тухӗ. Ҫу уйӑхӗн 1-мӗшӗнчен вӑл Хулари ача-пӑча клиника пульницин «5-мӗш ача-пӑча пульници» пулӗ.
Пӗчӗк пациентсен тепӗр уйӑхран Ленин проспектӗнчи 12-мӗш ҫурта пымалла. Специалистсем вӗсене унчченхи графикпех йышӑнӗҫ. Ҫу уйӑхне ҫырӑннӑ ачасене те ҫавӑн пекех йышӑнӗҫ.
Ҫу уйӑхӗн 1-10-мӗшӗсенче пирӗнтен, ӗҫлекен ҫынсенчен, хӑшӗсем канӗҫ. Кун пек йышӑнӑва ҫӗршыв Президенчӗ шайӗнче тунӑччӗ. Ҫав вӑхӑтрах теприсен вӑл вӑхӑтра та ӗҫлеме тивӗ. Сӑмахран, тухтӑрсен.
Канмалли тата уяв кунӗсенче амбулатори тата стационар пулӑшӑвне вӗсем ҫакӑн пек йӗркепе кӳрӗҫ: ака уйӑхӗн 30-мӗшӗнче ӗҫ кунӗ 1 сехет кӗскерех пулӗ; ҫу уйӑхӗн 1-мӗшӗнче – ӗҫлемелли мар уяв кунӗ; ҫу уйӑхӗн 2-мӗшӗнче – канмалли кун; ҫу уйӑхӗн 3-мӗшӗнче шӑматкунхи графикпа ӗҫлӗҫ; ҫу уйӑхӗн 4, 5, 6, 7-мӗшӗсенче – ӗҫ кунӗсем; ҫу уйӑхӗн 8-мӗшӗнче шӑматкунхи график пулӗ; ҫу уйӑхӗн 9-мӗшӗнче – ӗҫлемелли мар уяв кунӗ; ҫу уйӑхӗн 10-мӗшӗнче – канмалли кун.
Пандеми пуҫланнӑранпа пирӗн республикӑра 1357 пациент кӑшӑлвируса пула ҫут тӗнчерен уйрӑлнӑ. Юлашки талӑкра 5 ҫыннӑн пурнӑҫӗ татӑлнӑ. Кун пирки федераци информаци центрӗ пӗлтерет.
Паянхи кун тӗлне Чӑваш Енре 24055 ҫын каварлӑ вируса ҫаклатнӑ. Вӗсенчен 21906-шӗ сывалнӑ. Юлашки талӑкра сывалакансем, чирленисемпе танлаштарсан, нумайрах пулнӑ: 55-ӗн инфекциленнӗ, 58-ӑн чире парӑнтарнӑ. Сӑмах май, ӗнер те ҫавӑн чухлех ҫын чирленине палӑртнӑ.
Хальхи вӑхӑтра республикӑри стационарсенче тата килте амбулатори мелӗпе 792 ҫын кӑшӑлвирусран сипленет.
Чӑваш Ен Элтеперӗ Олег Николаев кӑшӑлвирусран тинех прививка тутарнӑ.
Маларах вӑл Мускава ӗҫпе тӑтӑшах кайма тивнине, ҫавна май нарӑс уйӑхӗнче ҫӗнӗ кӑшӑлвирус инспекцийӗнчен привика тутарассине пӗлетрнӗччӗ. Анчах унӑн ҫавӑн чухне вӑхӑт пулман иккен, ҫавӑнпа вӑл халӗ ҫеҫ тухтӑр патне ҫитейнӗ.
Вакцинацие республика ертӳҫи шӑматкун кайнӑ, ҫав кунах пӗрремӗш прививкӑна тутарнӑ, хайне епле туйни ҫинчен дневника ҫырса хунӑ.
«Меллӗ, хӑтлӑ, чи кирли — тӗрткелешӳсӗр», – тенӗ Элтепер паян Правительство пайташӗсемпе ирттернӗ ирхи канашлура.
Прививка хыҫҫӑн хӑйне аван туйнине палӑртса хӑварнӑ вӑл. Шӑматкун Олег Николаев Йӑлӑмра йывӑҫ лартма, вырсарникун Чӑваш чӗлхи кунне уявлама хутшӑннӑ тата Пӗтӗм тӗнчери балет фестивалӗн гала-концертне кайса курнӑ.
Кӑшӑлвируспа чирлекенсен йышӗ кӑшт ӳснӗ. Юлашки талӑкра 60 ҫын инфекциленнине тупса палӑртнӑ. Ӗнер ку хисеп 55-пе танлашнӑ, виҫӗмкун – 50-па.
Ку таранччен 23889 ҫын кӑшӑлвируспа чирленӗ. Вӗсенчен 21754-шӗ сывалнӑ. Юлашки талӑкра 49 ҫын чире парӑнтарнӑ.
Паянхи кун тӗлне 1342 ҫын каварлӑ вируса ҫӗнеймесӗр вилнӗ. Юлашки талӑкра чир 4 ҫыннӑн пурнӑҫне татнӑ. Паянхи кун тӗлне республикӑра пульницӑсенче тата килте амбулатори мелӗпе 793 пациент кӑшӑлвирусран сипленет.
-12.7 °C