Конкурса Тутарстанри чӑвашсен наципе культура автономийӗ йӗркелет. Унӑн ертӳҫи Константин Яковлев Чӑваш наци конгресӗн пресс-службине каланӑ тӑрӑх, ҫакна вӗсем халӑха хӑйсем пурӑнакан ялсене, ҫӑлкуҫсемпе ҫӑвасене тата ытти вырӑна тирпей-илем кӳмешкӗн тӑрӑшма тата пултарулӑ та хастар пулма, уйрӑмах ҫамрӑк ӑрӑва ҫуралнӑ вырӑнпа мӑнаҫланма тата ӑна хисеплеме вӗрентессишӗн тӑваҫҫӗ иккен.

Конкурса хутшӑнакан чӑваш ялӗсене ҫапла хак парӗҫ:

• чӑвашла илемлӗ ҫырса ҫакнӑ ял, урамсен ячӗсем;

• ялӑн пӗтӗмӗшле сӑн-сӑпачӗ;

• уявсем ирттермелли вырӑнсен тирпей-илемӗ;

• хитре, куҫа илӗртекен е паллӑ вырӑнсем;

• ҫӳп-ҫапа пӑрахмалли вырӑнсене йӗркелени;

• ҫӑлкуҫсемпе пусӑсене мӗнле йӗркелени;

• масар-ҫӑвасен тирпейлӗхӗ.

Конкурс ҫӗнтерӳҫисене Тутарстан чӑвашӗсен наципе культура автономийӗ укҫан хавхалантарма шутлать:

• 1-мӗш вырӑншӑн — 50 пин тенкӗ;

• 2-мӗш вырӑншӑн — 30 пин тенкӗ;

• 3-мӗш вырӑншӑн — 20 пин тенкӗ.

Ҫӗнтерӳҫӗсем нухрата хӑйсен ялӗсене тирпей-илем кӗртме, хастар ҫынсене хавхалантарма усӑ курма пултараҫҫӗ.

Конкурс ака уйӑхӗн 1-мӗшӗнчен пуҫласа юпан 1-мӗшӗччен пырӗ.

#Тутарстан, #тирпейлӗх, #конкурссем, #кӳршӗре, #ЧНК