Етӗрне районӗнчи Пӗрҫырланти Культура ҫуртӗнче Урапакасси ялӗнче ҫуралса ӳснӗ, Тимирязев ячӗпе хисепленсе тӑракан колхоз ертӳҫи, унтан Етӗрнери Энергонадзор ертӳҫи пулса тӑрӑшнӑ, район депутачӗ пулнӑ, чире пула вӑхӑтсӑр уйрӑлса кайнӑ Григорьев Сергей Станиславовича асӑнса пилӗк команда хушшинче волейбол ӑмӑртӑвӗ иртрӗ. Унта пӗрҫырлансен виҫӗ команди «Молодежь», «Заря», «Ветераны», Етӗрнери иккӗмӗш номерлӗ вӑтам шкулӑн тата Асламас ял тӑрӑхӗн ушкӑнӗ хутшӑнчӗ.

Пухӑннисене Пӗрҫырлан ял тӑрӑхӗн пуҫлӑхӗ Степанова Н. Ю., Сергей Григорьевӑн мӑшӑрӗ Ирина Григорьева, пӗр-пӗрне куллен пулӑшса пӗрле ӗҫленӗ тусӗсем — Етӗрнери БТИ директорӗ Шуверов В. Б., усламҫӑ Титов В. Т., Сӗнтӗрвӑрринчи сӗт-ҫу савут директорӗ Мурзин А. М., «Сурстройсервисӑн» тӗп инженерӗ Мурзин Н. М., отставкӑри полковник Охандеров Н. И., «Региональная распределительная сетевая компания» начальникӗ Козлов А. В., Палтайри вӑтам шкул директорӗ Ярославцева Г. П. тата ыттисем — саламларӗҫ, ӑмӑртура ӑнӑҫу сунчӗҫ.

Вӑйӑра пилӗк ҫынран тӑракан «Асламасы» команда ылтӑн медаль, Хисеп хучӗ тата кубок ҫӗнсе илчӗ. Иккӗмӗш вырӑнта Александров А. М. тренер ертсе пыракана Етӗрне шкул команди пулчӗ. Пӗрҫырланти «Заря» ушкӑн пӑхӑр медаль ҫӗнсе илчӗ. «Техника енчен чи ӑста вылякан» ята Етӗрнери иккӗмӗш шкул спортсменӗ Таланов Максим тивӗҫрӗ. Ӑна Сергей Станиславовичӑн шкулти тусӗ ятарлӑ парнепе чысларӗ. Чи пӗчӗк болельщиксене — Кира Казанбаевӑпа Ульяна Тимонина — ятарлӑ медальсем тата пуканесем парнелерӗҫ.

Наталья Юрьевна ӑмӑртӑва хутшӑннӑ командӑсене спортра ҫитӗнӳсем тума сӗнчӗ, ҫирӗп сывлӑх сунчӗ. Ирина Вячеславовна Григорьева Пӗрҫырланти Культура ҫурт директорне А.З. Хмелева ӑмӑртӑва йӗркелеме пулӑшнӑшӑн шашка тата шахмат наборне парнелерӗ.

Сӑнсем (43)

#Пӗрҫырлан, #Урапакасси, #Етӗрне районӗ, #Етӗрне, #Сӗнтӗрвӑрри, #Палтай, #спорт, #волейбол, #Пӗрҫырлан ял тӑрӑхӗ, #Асламас ял тӑрӑхӗ, #Асламас