Авӑн уйӑхӗн 6–7-мӗшӗсенче Йӗпреҫ районӗнчи Пучинке ял ҫывӑхӗнчи «Хӗрлӗ партизан» аэродромра регионсем хушшинчи XI Маресьев слечӗ иртнӗ. Унта авиацие кӑмӑллакан ҫынсем Мускавран, Улатимӗртан, Йошкар-Оларан, Хусантан, Шупашкартан пырса ҫитнӗ.

Мероприятие паллӑ вӗҫӗвҫӗсен ятне асра тытса йӗркелеҫҫӗ. Акӑ, сӑмахран, Совет Союзӗн Паттӑрӗ Алексей Маресьев Тӑван ҫӗршывӑн аслӑ вӑрҫинче икӗ ура тупанне татмалла аманнӑ. Унтан сипленнӗ хыҫҫӑн Йӗпреҫри вӗҫев шкулӗнче ҫӗнӗрен вӗҫме хӑнӑса самолет умне ларнӑ, тӑшманпа кӗрешӗве тухнӑ. Е тата Йӗпреҫ районӗнчи Липовка поселокӗнче ҫуралнӑ Леонид Константинова илер. Вӑл Патшалӑх Думин тата Раҫҫей ҫарӗн аслӑ офицерӗсене хӑйӗн пурнӑҫне шеллемесӗр ҫӑлнӑ. Хисепе тивӗҫ летчиксем хушшинче хӗрарӑм та пур. Вӑл — Йӗпреҫ районӗнчи Ирҫе Ҫармӑсри Валентина Волковаӗ Тӑван ҫӗршывӑн вӑрҫи вӑхӑтӗнче харсӑрскер каҫхи бомбардировщиксен хӗрарӑмсен полкӗнче пулнӑ.

Слета пухӑннисене тӳресем те саламланӑ. Сӑмахран, республикӑн транспорт тата ҫул-йӗр министрӗн ҫумӗ Владимир Степанов, Йӗпреҫ район администрацийӗн пуҫлӑхӗ Николай Чугаров.

Мероприятие уҫнӑ хыҫҫӑн вӗҫекен аппаратсен авиамоделистсен кружокӗсенче хатӗрленӗ моделӗсене кӑтартнӑ. Самолетсен вӗҫевне те, парашютистсем сикнине те пӑхса савӑнма май килнӗ. Тепӗр кунне дельталетчиксем ӑмӑртнӑ. Лайӑх тӗллессипе «Хӗрлӗ партизан» колхозри Федор Петрова ҫитекен пулман. «Ворошилов стрелокӗ» номнацире Пӑрачкаври Михаилпа Антин Лебедевсен экипажӗ ҫӗнтернӗ.

Сӑнсем (80)

#авиаци, #Пучинке, #Йӗпреҫ, #Йӗпреҫ районӗ, #Пӑрачкав, #Ирҫе Ҫармӑс, #пухусем, #Мускав, #Шупашкар, #Улатимӗр, #Йошкар-Ола, #Хусан