Ака уйӑхӗн 10-мӗшӗнче NASA йӗркеленӗ «Артемида II» миссийӗн космонавчӗсем Ҫӗр ҫине ӑнӑҫлӑ таврӑннӑ. Рид Уайзман, Виктор Гловер, Кристина Кох тата Джереми Хансен ларнӑ Orion карап Калифорни ҫыранӗнчен инҫех мар Лӑпкӑ океана анса ларнӑ. Ҫакӑнпа 10 куна тӑсӑлнӑ историлле вӗҫев вӗҫленнӗ. Астронавтсем Ҫӗр чӑмӑрӗнчен 406 пин ҫухрӑм ытла инҫете вӗҫсе ҫӗнӗ рекорд лартнӑ. Ҫак кӑтарту 1970 ҫулта «Аполлон-13» миссийӗ вӑхӑтӗнче лартнӑ рекордран та иртсе кайнӑ.

Ҫӗр ҫине аннӑ хыҫҫӑн экипажа NASA тата АПШ ҫар ҫыннисем кӗтсе илнӗ. Вӗсене уҫӑ шывран кӑларнӑ та вертолетпа USS John P. Murtha карап ҫине сывлӑхӗсене тӗрӗслеме илсе кайнӑ.

Ку вӗҫев пуласлӑхшӑн питӗ пӗлтерӗшлӗ шутланать. Космонавтсем инҫет космосра пурӑнмалли системӑсене тӗрӗсленӗ, карапа алӑпа тытса пыма вӗреннӗ. Вӗсем Уйӑх ҫийӗн 7000 ытла сӑнӳкерчӗк тунӑ, микрогравитаци ҫыннӑн сывлӑхне мӗнле витӗм кӳнине тӗпченӗ. Ҫак пӗтӗм ӑслӑх ӗҫӗсем малашне Уйӑх ҫинче база тума тата Марс ҫине вӗҫме хатӗрленме пулӑшмалла.

#Уйӑх, #тӗнче уҫлӑхӗ, #тӗнчере, #АПШ