Лауреатӑн кӑкӑр ҫине ҫакмалли палли

Нестер Янкас ячӗллӗ пӗрлӗх 2024 ҫулшӑн литературӑпа искусство тата культура аталанӑвӗнче палӑрнисене Красноармейски муниципалитет округӗн Нестер Янкас ячӗллӗ преми лауреачӗн ятне парассипе ҫыхӑннӑ сӗнӳсене йышӑнма тытӑнать. Кӑҫал ҫак ӗҫ 2024 ҫулхи раштав уйӑхӗн 22-мӗшӗччен пырать, мӗншӗн тесен Трак енре асӑннӑ пӗрлӗх йӗркеленнӗренпе шӑп 35 ҫул ҫитет. Уяв ячӗпе ҫак кун Культура ҫуртӗнче лауреатсен пысӑк концерчӗ пулать тата ҫӗнӗ лауреатсене чыслаҫҫӗ.

Кашни ырӑ япала, пултарулӑх хӑйӗн хакне тивӗҫлех. Конкурса иртсе каякан ҫулта литературӑпа искусство тата культура шайӗнче Трак тӑрӑхӗшӗн ырми-канми ӗҫленӗ, вулакансемшӗн, куракансемшӗн уҫӑмлӑ, чун-чӗрене ҫывӑх пысӑк пӗлтерӗшлӗ сцена ӗҫӗсемпе, юрӑ-кӗвӗсемпе, куравсемпе, кӗнекесемпе, ытти литература ӗҫӗсемпе савӑнтарнӑ, хавхалантарнӑ ентешӗмӗрсем хутшӑнасса шанатпӑр эпир.

Пулас лауреатсен ӗҫ-хӗлне коллективсенче тишкерсе тухмалла, документсене тӑратса Нестер Янкас ячӗллӗ пӗрлӗх правленийӗн (канашӗн) ларӑвӗнче пӑхса тухса пӗтӗмлетмелле, ӑна Нестер Янкас ячӗллӗ пӗрлӗхӗн наградӑсем паракан комиссин пӑхса тухса ҫирӗплетмелле.. Кандидатсенчен автобиографи, икӗ сӑн ӳкерчӗк, ҫирӗплетнӗ пултарулӑх характеристики кӗтетпӗр. Правлени канашӗ салари Тӗп библиотекӑн вулавӑш пӳлӗмӗнче (2-мӗш хутра) вырнаҫнӑ.

Наградӑсем парас енӗпе ӗҫлекен комисси председателӗ, Нестер Янкас ячӗллӗ пӗрлӗх правленийӗн председателӗн ҫумӗ - Михайлов В.М., Красноармейски вӑтам шкулӗн вӗрентекенӗ, таврапӗлӳҫӗ, Раҫҫей пӗтӗмӗшле вӗрентӗвӗн хисеплӗ ӗҫченӗ (2010), Чӑваш халӑх академикӗ (2015), Чӑваш халӑх ӑс-хакӑлӗн тава тивӗҫнӗ ӑсти (2019), Н.К. Янкас ячӗллӗ Преми лауреачӗ (1999), Чӑваш наци ӑслӑлӑхпа ӳнер академийӗн лауреачӗ (2023).

#Красноармейски районӗ, #премисем