Чӑваш кӗнеке издательствин сӑнӳкерчӗкӗ

Чӑваш кӗнеке издательстви «Чӑваш кӗнеки. Пултаруллӑ ҫамрӑксем» регионсем хушшинче вун виҫҫӗмӗш хут иртекен конкурса хутшӑнма йыхравлать. Кун пирки издательство халӑх тетелӗнчи хӑйӗн пабликӗнче пӗлтернӗ.

Ӗҫсене ҫурла уйӑхӗн 30-мӗшӗнче йышӑнма пуҫланӑ, вӗсене юпа уйӑхӗн 31-мӗшӗччен йышӑнӗҫ. Конкурс тӑватӑ номинаципе иртет. «Юратнӑ кӗнеке ҫинчен ҫырнӑ чи лайӑх хаклав» номинацие аслисен те хутшӑнма юрать иккен. Унта хутшӑнакансен Чӑваш кӗнеке издательствинче тухнӑ кӑларӑма вуланӑ хыҫҫӑн ҫуралнӑ шухӑш-кӑмӑла уҫса памалла. Хаклава fed_ol@mail.ru электрон почтӑпа ярса пама юрать. Ҫырӑва ӑсатнӑ чухне «Чӑваш кӗнеки. Пултаруллӑ ҫамрӑксем» конкурса» тесе палӑртма ыйтаҫҫӗ.

«Юратнӑ хайлаври чи интереслӗ самант» темӑпа хатӗрленӗ ӳкерчӗк» номинацире хутшӑнакансен кӗнекери пӗр-пӗр саманта ӳкерсе парӗҫ.

Кӑҫал Ҫеҫпӗл Мишши чӑваш классикӗ ҫуралнӑранпа 125 ҫул ҫитнине шута илсе «Ҫеҫпӗл Мишши хайлавӗсем тӑрӑх хатӗрленӗ ӳкерчӗк» номинаци те пур.

«Ача хатӗрленӗ чи лайӑх кӗнеке» номинацире ачан хӑй шухӑшласа кӑларнӑ хайлава кӗнеке пек хатӗрлесе памалла.

#Кӗнеке издательстви, #конкурссем, #кӗнекесем, #культура