Кӑҫал пирӗн республикӑра ҫул ҫитмен 16 пин ытла ҫамрӑка вӑхӑтлӑх ӗҫпе тивӗҫтерме палӑртаҫҫӗ. Вӑтӑр урлӑ каҫнисемпе вӗсенчен аслисем 4-5-мӗш класс пӗтернӗ хыҫҫӑнах колхозӑн кӑшман уйне ҫум ҫумлама е утӑ тавӑрма ҫӳренине астӑваҫҫӗ ӗнтӗ. Каярах вара пӗчӗкле ӗҫлеттерме юрамасть тесе саккун тухрӗ. Халӗ 14 ҫултан иртсен ҫеҫ сенӗк-кӗреҫе тытма юрать. Вӗсен те пулин ашшӗ-амӑшӗ, опекӑпа попечительство органӗ хут ҫырса ирӗк пани кирлӗ. Унтан та ытларах — пур ӗҫе те кӳлӗнеймӗн, ҫӑмӑлтараххине кӑна. Юрӗ, ҫитӗ кун пирки — вӑл умсӑмах вырӑнне пулчӗ тейӗпӗр…

Хӗр-упраҫпа яш-кӗрӗме вӑхӑтлӑх ӗҫпе тивӗҫтерме республика хыснинчен 13 миллион тенкӗ ытла уйӑрма пӑхса хӑварнӑ, ҫамрӑксене шалу тӳлеме ӗҫ паракансен хӑйсен те тупра тупмалла — пурӗ 3,8 миллиона яхӑн.

Паллах, муниципалитетсем те айккинче юлмӗҫ. Вӗсем 3 миллиона яхӑн уйӑрмалли паллӑ. Пуринчен пысӑк суммӑна (1,1 миллион тенкӗ ытларах) ҫак тӗллевпе Шупашкар хули кӑларса хурӗ. Кунта, ахӑртнех, ҫамрӑксем йышлӑ пулни те витӗм кӳрет-тӗр. Ҫавӑн пекех Ҫӗнӗ Шупашкарпа Канаш хулисем 220 тата 200-шер пин уйӑрма шухӑшлаҫҫӗ. «Кӗмӗл» нумайрах уйӑракан районсенчен канашсем 300 пин палӑртса хунӑ, Шупашкар районӗ — 200 пине яхӑн.

14-18 ҫулсенчисене вӑхӑтлӑх ӗҫпе тивӗҫтересси пирки каларӑмӑр та, вӗсене ҫулла кӑна мар, вӗренӳрен пушӑ ытти вӑхӑтра та вырӑн тупса параҫҫӗ. Кӑрлач-ака уйӑхӗсенче, акӑ, 4,4 пине яхӑн ачана вырнаҫтарнӑ. Ӑҫта вӑй хунӑ-ши вӗсем текенсене икӗ алла пӗр ӗҫ каларӑша аса илтерме кирлех те мар-тӑр. Ҫуркунне, сӑмахран, палӑксене юсаса ҫӗнетме явӑҫтарнӑ, ватӑсене пулӑштарттарнӑ.

#Канаш, #Ҫӗнӗ Шупашкар, #Шупашкар, #Канаш районӗ, #Шупашкар районӗ, #ӗҫ, #шкул ачисем, #ҫамрӑксем