Шупашкар хулин ҫыннисем, республикӑн тӗп хулин илемӗпе, культурипе паллашма кӑмӑл тӑвакансем хулан кӳлмекӗпе уҫӑлса ҫӳренӗ май «Мать-покровительница» монуменчӗпе ҫывӑх инҫех мар вырнаҫнӑ мӑнаҫлӑн сарӑлса тӑракан, тӗксем, купаласа ҫитермен пысӑк ҫурта асӑрхама пултарнӑ ахӑртнех. «Пӗр компани ушкӑнӗн паллӑкӗ» (выр. Памятник одной группе компаний) — ҫак ҫурт ҫинчен акан 24-мӗшӗнче Шупашкарта ҫӑмӑл атлетикӑпа 2015 ҫулта иртекен Европа чемпионатпа ҫыхӑннӑ ыйтусене пӑхса тухнӑ май ҫапла шӑхвӑртса каларӗ республика пуҫлӑхӗ Михаил Игнатьев. Чемпионат ҫитес тӗлнелле ҫак сӗмсӗр сӑн-сӑпат кӳрекен ҫурта купаласа, «Сувар-отель» тумаллине малтанах паллӑртса хунӑ ав мӗн. Ҫапах ҫак ҫуртпа хуҫаланакан «Одис» Йошкар-Олари организаци отельне купалас ӗҫӗ паянхи кун та пуҫарӑнман. Ун вырӑннӗ ҫурт ҫинче хитре кӑнаҫ «Пуласлӑх кунта» текстлӑ пысӑк баннер ҫакӑнса тӑрать. Ку вара чӑнах та кулӑшла. Кун йышши сӑмах ҫаврӑнӑшӗн, тен, хӑйне май символла пӗлтерӗшӗ пур?

Анчах ҫак хӑна ҫуртне купаласа, ӗҫлетрсе ярас ӗҫ чемпионата ирттернӗ чухне самаях пӗлтерӗшлӗ вырӑн йышӑнса тӑрать. «Тӗп хулара тӑваттӑ ҫӑлтӑрлӑ хӑна ҫурчӗ пулмалла» — ку тӗп критери. Анчах тӗксем пуш ҫуртӑн малашлӑхӗ паянхи кун та паллӑ мар, ҫак ыйтӑва пат татса пракансем те ҫук. 25-мӗшӗнчи лару-тӑрура Европа чемпионатне ирттерес ӗҫӗн плане йӗркелерӗҫ. Ҫитес вӑхӑтра «Спорт» хӑна ҫуртне ҫӗнӗ улшӑнусем кӗтме кирлӗ, «Олимпийский» стадионра та йӗркелес ӗҫ пуҫарӑнӗ.

Асилтерер, ҫӑмӑл атлетикӑпа иртекен Европа чемпионатне 2015 ҫулта Шупашкар хулине 12 тӗрлӗ ҫӗршывран 750 спортсмен килме кирлӗ.

#Шупашкар, #хӑна ҫурчӗсем, #Европа чемпионачӗ