Ҫӗртме уйӑхӗн 24-мӗшӗнче 16 сехетре Ҫӗрпӳ районӗнче свалка ҫунма пуҫланӑ. Ҫулӑм алхаснӑ, 4 сехет иртнӗ – пушар вырӑнне вара Инкеклӗ лару-тӑру министерствин ӗҫченӗсем килмен. Кун пирки «Про Город» хаҫата ҫынсем пӗлтернӗ.

«Кӑнар поселокӗнче сывлама ҫук. Службӑсем нимӗн те тумаҫҫӗ», - каласа кӑтартнӑ арҫын. Чӑнах та, ҫывӑхри ялсенчи ҫынсем тӗтӗм шӑршипе чыхӑннӑ.

Ҫулӑма паян, ҫӗртме уйӑхӗн 25-мӗшӗнче, 11 сехетре кӑна сӳнтернӗ. Вырӑнти халӑх пӗлтернӗ тӑрӑх, ку свалкӑна хупма шантарнӑ, анчах ҫӳп-ҫап пур-пӗрех унталла кайса тӑкаҫҫӗ.

Палӑртмалла: Кӑнар ҫывӑхӗнчи свалка унччен те ҫуннӑ.

#Ҫӗрпӳ районӗ, #Кӑнар, #пушарсем, #Инкеклӗ лару-тӑру министерстви