Шупашкарти ҫурҫӗр-хӗвеланӑҫ районӗнче пурӑнакансем йывӑр лару-тӑрӑва кӗрсе ӳкнӗ. Ахазов урамӗнчи 13-мӗш ҫурт тата Эльгер урамӗнчи 13-мӗш ҫурт картишӗнче нумай хутлӑ ҫурт хӑпартасшӑн, ҫынсем вара ҫакна хирӗҫ.

Ҫав вырӑнти нумай ҫул ӳснӗ йывӑҫсене те касма палӑртнӑ-мӗн. Халӑх вара йывӑҫсене упраса хӑварасшӑн. Вӗсем РФ Президенчӗ Владимир Путин ҫӗртме уйӑхӗн 7-мӗшӗнче ирттерекен «тӳрӗ линие» видео ярса парасшӑн.

Видеона ӳкернӗ ӗнтӗ. Ӑна YouTube сайтне ӗнер кӑларнӑ. «Хисеплӗ Владимир Владимирович! Эпир, Шупашкарта пурӑнакансем, сиртен 40 ҫул ӳсекен хурӑнсен рашчине упраса хӑвармашкӑн пулӑшу ыйтатпӑр. Вӗсене касасшӑн. «Ахазовский» парк вырӑнӗнче нумай хутлӑ ҫурт тӑвассине эпир хирӗҫ», - тенӗ видеора.

Ҫак ыйтупа ирттернӗ пухура 100 ытла ҫын стройкӑна хирӗҫ алӑ пуснӑ.

#Шупашкар, #тӳрӗ лини, #президент