Егорова Анастасия сайчӗ

Етӗрне районӗнче 9-11-мӗш класра вӗренекенсен хушшинче Тӗнче тетелӗнче сайтсем уҫса ӑна йӗркелесе пырассипе ӑмӑрту иртнӗ. Унӑн тӗллевӗ — пултаруллӑ ачасен вӑй-хӑватне палӑртасси, информаци технологийӗсен вӑрттӑнлӑхӗсене алла илме пулӑшасси.

Конкурс кӑрлач уйӑхӗнчен пуҫласа пуш уйӑхӗччен пынӑ. Унта хутшӑнакансене ҫакӑн пек темӑсем сӗннӗ: «Юмах тӗнчине — ҫулҫӳреве», «Астӑвӑм», «Вӗҫӗ-хӗррисӗр тӗнче уҫлӑхне», «Космонавтика ҫулне халалланӑ». Конкурса 8 вӗренӳ учрежденийенчи 18 шкул ачи хутшӑннӑ. «Чи лайӑх сайт» номинацире 1-мӗш вырӑн Палтай шкулӗнче 9-мӗш класра вӗренекен Егорова Анастасийӑна (egorova.21415s04.edusite.ru) лекнӗ. Тимофеев Сергейӑн (Севетски шкулӗ) сайчӗ (mihaysn.21415s10.edusite.ru) — 2-мӗш вырӑна, Иванова Оксанӑн (Етӗрнери 2-мӗш шкул) сайчӗ (oksana.21415s02.edusite.ru) — 3-мӗш вырӑна тивӗҫнӗ.

Шел пулин те, ҫак сайтсенчен пӗринче те чӑвашла пӗр самах та тупаймӑн.

Ҫӗнтерӳҫӗсем Ачасен пултарулӑх ҫурчӗн Хисеп хучӗсене тивӗҫнӗ. Егорова Анастасия сайчӗ мала тухнӑ пулин те унта чаваш юмахӗсем валли выран тупӑнман. Жюри ӗҫсене хакланӑ май страницӑсен ҫыхӑнӑвӗсене тишкернӗ, лайӑх пахалӑхлӑ ӳкерчӗксем пуррине шута илнӗ, вӗренекенсемшӗн усӑллӑ информацци пуррине тӗрӗсленӗ.

#Етӗрне районӗ, #Етӗрне, #шкулсем, #Палтай, #Советски, #ӑмӑртусем