Преми лауриачӗсем

Паян, ҫуркуннен (календарь тӑрӑх ӗнтӗ) пӗрремӗш кунӗнче, И.Я. Яковлев ячӗллӗ Чӑваш патшалӑх педагогика университечӗн акт пулӗмӗнче пӗлтӗр «Ҫӗнӗ вӑхӑт» издательствӑра тухнӑ Ҫеҫпӗл Мишши ячӗллӗ преми лауриачӗсен биографиллӗ кӗнекен хӑтлавӗ иртрӗ. Вӑл 13 сехет ҫурӑра пуҫланчӗ, Валери Туркай ертсе пычӗ.

Хӑтлава халӑх, ытларах пайӗпе университет студенчӗсем пулчӗҫ пулин те, акт пӳлӗмӗ туллиех пухӑнчӗ. Ҫеҫпӗл Мишши ячӗллӗ преми лауриачӗсем зал варрине вырнаҫса тухрӗҫ.

Хӑтлава ача-пӑчасен «Эревет» ушкӑн (вӑл та ҫак премие тивӗҫнӗ) уҫрӗ. Шел те чӑвашла тумланнӑ ачасем вырӑс чӗлхипе ҫеҫ усӑ курчӗҫ. Ҫав шутра вырӑс халӑх юррине чӑвашла тумсемпе юрлани питӗ хӑйне евӗрлӗ пулчӗ — те Ҫеҫпӗл Мишшине сума сурӗҫ, те чӑваш тумӗ вырӑсла та юрлама юрӑхлине кӑтартасшӑн пулчӗҫ. Ертӳҫи маттур-ха, сӑмах ҫук, анчах залра ларакансенчен чылайӑшне ку ытлах килӗшмерӗ. Уйрӑмах, мероприятие «вырӑсла» уҫни.

Валерий Туркай преми ҫинчен кӗскен каласа пачӗ — вӑл мӗнле ҫуралнӑ, епле тӗрекленнӗ. Премие пӗрремӗш хут 1967 ҫулта панӑ иккен, 1-мӗш номерлӗ удостоверение Леонид Агаков тивӗҫнӗ. Премие тивӗҫнисенчен 15-ӗшӗ шел те ҫут тӗнчерен уйрӑлнӑ. 43-ӗшӗ халӗ сывӑ.

Хӑтлав иртнӗ май мероприятие килнӗ кашни лауриат сӑмах тухса каларӗ, мӗншӗн тивӗҫни ҫинчен пӗлтерчӗ. Юрӑпа саламлакансен шутӗнче ҫаван пекех Виталий Адюковпа «Юрай» ушкӑн пулчӗҫ — вӗсем пурте хӑй вахӑтӗнче ҫак премие тивӗҫнӗ.

Юрий Яковлев шухӑшӗпе хӑтлав яланхилле «Тилли, шарт-шарт» евӗрлӗ иртрӗ. «Шел пулин те, чӑваш халӑх шӑпи пирки чуна ыраттарса шухӑшлани пулмарӗ», — терӗ вӑл. — «Пурнӑҫ мар, курнӑҫ».

Кӗнекене ҫыракансем — Валери Туркайпа арӑмӗ Ольга. Кӗнеке вырӑсла. Уншӑн вӑрҫма кирлӗ мар пулӗ — халӗ чылай кӗнеке, чӑвашла тухнине шансах кайманран, вырӑсла тухать. Валери Туркай та, кӗнеке лайӑх саланасса шанса, ӑна вырӑс чӗлхеллӗ тунӑ пулӗ.

Сӑнсем (44)

#хӑтлавсем, #ЧППУ