Нарӑсӑн 11-мӗшӗнче Красноармейскинче Чӑваш Республикинчи районсен (хуласен) центрӗсенчи ял тӑрӑхӗсен пуҫлӑхӗсен палатин вырӑна тухса ирттернӗ семинар-канашлӑвӗ пулса иртнӗ. Унӑн теми — «Муниципаллӑ пӗрлешӳре пӗчӗк предпринимательлӗхе аталантарни — ҫынсене ӗҫпе тивӗҫтерме тата ял тӑрӑхӗн бюджечӗн тупӑш пайне ӳстерме май туса пани. Яллӑ вырӑнсенче пӗчӗк предпринимательлӗхе аталантарнӑ ҫӗрте ял тӑрӑхӗн пуҫлӑхӗн ӗҫӗ-хӗлӗ». Асӑннӑ мероприятие йӗркелекенӗ — ЧР муниципаллӑ йӗркелӳсен канашӗ (ӗҫ тӑвакан директорӗ С. А. Николаев).

Чи малтанах Трак ене килнӗ хӑнасене район администрацийӗн пуҫлӑхӗ В. Александров йышӑннӑ, кӗскен районпа, паянхи ӗҫ-хӗлпе паллаштарнӑ. Унтан семинар-канашлӑва хутшӑннисем район центрӗнче 2009 ҫулхи юпара уҫӑлнӑ бизнес-инкубатора ҫитсе курнӑ. Ун хыҫҫӑн семинара хутшӑннисем тулли мар яваплӑ «Зубная фея» пӗрлешӳн, Красноармейски ял тӑрӑхӗн ӗҫӗ-хӗлӗпе паллашнӑ. Семинар-канашлу хӑйӗн ӗҫне газ уҫлакансен Заволжски клубӗнче малалла тӑснӑ. Пухӑннисен умӗнче Чӑваш Республикин муниципаллӑ пӗрлешӳсен канашӗн председателӗ, Шӑмӑршӑ район администрацийӗн пуҫлӑхӗ В. Фадеев тухса калаҫнӑ, семинарӑн тӗллевӗпе, хӑнасемпе паллаштарнӑ.

Семинар-канашлӑва хутшӑннисене Заволжски клуб ҫумӗнчи ачасен пултарулӑх ушкӑнӗсем саламланӑ. Юлашкинчен пурте пӗрле райцентрти физкультурӑпа сиплев комплексне ҫитсе курнӑ, хулапа ял тӑрӑхӗсен командисем волейболла тӗл пулса вылянӑ.

#Красноармейски районӗ, #экономика, #Красноармейски, #Шӑмӑршӑ районӗ