Платка ялӗ картта ҫинче

Утӑн 17-мӗшӗнче Платкари «Униче» уҫланкӑра 11-мӗш хут ял уявӗ иртрӗ. «Вӗрентекен ҫулталӑкӗ» ячӗпе Ҫырмапуҫ ял тӑрӑх пуҫлӑхӗ Сергей Ванюшкин ялти хисеплӗ вӗрентекенсене Ю. Федотовӑна, А.Михайловӑна, З. Николаевӑна, А. Андреевӑна, Н. Васильевӑна ачасемпе ҫамрӑксене тӗрӗс воспитани парас ӗҫре вӑй хунӑшӑн тав хучӗсем пачӗ, ӳлӗмрен те ял халӑхне пархатарлӑ ӗҫсемпе савӑнтарма ыр сунчӗ.

Ҫавӑн пекех платкасене сумлӑ хӑнасем те саламларӗҫ.

Чӑваш патшалӑх ялавне ҫӗклени — уяв уҫӑлнин палли. Кӑҫалхи уявра ӑна ӑна ҫӗклеме Н. Михайлова педагог тата Раҫҫей Федерацийӗн музыка обществин членӗ, тыл ӗҫченӗ Л. Ильина тивӗҫрӗҫ.

Платка ял старости Зоя Андреева Аслӑ Ҫӗнтерӗве туптанӑранпа 65 ҫул ҫитнӗ ятпа вӑрҫӑ ветеранне — Алексей Скворцовӑна, ҫавӑн пекех тыл ӗҫченӗсене, ялти чи ватӑ ҫынсемпе чи кӗҫӗннисене парнесем парса чыс турӗ.

Вунпӗрмӗш хут иртекен уява «Янра, юрӑ» эстрада ансамблӗ илемлетрӗ. Ҫак кун «Униче» уҫланкӑ хаваслӑ юрӑ-кӗвӗпе янраса ҫеҫ тӑчӗ. Ял ҫыннисене вырӑнти «Ҫӑлкуҫ» халӑх пултарулӑх ушкӑнӗ тата «Сипет» ташӑ ушкӑнӗ пысӑк концерт лартса пачӗ. Шкул ачисем те хӑйсен пултарулӑхне кӑтартрӗҫ: тӗрлӗ конкурс, спорт вӑййисем йӗркелерӗҫ.

Пурте пӗрле хуранпа пӗҫернӗ техӗмлӗ шӳрпе тутанни — чи авалхи йӑласене халӑх манманни ҫинчен калать. Савӑк юрӑ-ташӑ, паллах, кӗтӳ кӗртнӗ хыҫҫӑн та вӗҫленмерӗ-ха, платкасем Чӑваш Республики йӗркеленнӗренпе 90 ҫул ҫитнине халалланӑ фильмсем пӑхрӗҫ.

#Шупашкар районӗ, #ял уявӗсем, #уявсем, #Платка