Чӳкӗн 12-мӗшӗнче Чӑваш кӗнеке издательстви 95 ҫул тултарнине Чӑваш халӑх сайчӗ пӗлтернӗччӗ.

Издательство кӗнеке хыҫҫӑн кӗнеке кӑларать. Кӑшт маларах кӑна «Пӗчӗк чӳречеллӗ пӳрт» (редакторӗ — Галина Антонова, ӳнерҫи — Иван Алексеев) кӗнеке кун ҫути курнӑ.

1000 экземплярлӑ тиражпа тухнӑскерӗн авторӗ — Александр Миллин (1927–1978). Издательствӑра тӑрӑшакан Ольга Австрийская ун пирки «журналист, писатель, куҫаруҫӑ» тесе хыпарлать.

Александр Миллин Елчӗк районӗнчи Патреккел ялӗнче ҫуралса ӳснӗ. Тӗрлӗ жанрпа ҫырнӑ хайлавӗсене республикӑра тухса тӑракан хаҫат-журналта пичетленӗ. «Пӗчӗк чӳречеллӗ пӳрт» — А.Миллинӑн ачасем валли кӑларнӑ виҫҫӗмӗш кӗнеки. Малтанхисем «Вӑлта» (1979) тата «Мухтанчӑк» (2014) ятсемпе кун ҫути курнӑ.

#Чӑваш кӗнеке издательстви, #культура, #Елчӗк районӗ, #Патреккел, #кӗнекесем