Электронлă вулавăш

Поликлиникăра тухтăрсем йышăнакан пӳлĕмсем патĕнчен çын татăлмасть: пĕри кайсан ун вырăнне тепри килсех тăрать. Акă, Карачăм Мĕтрийĕ те хăйĕн ыратăвĕсемпе участок тухтăрĕн пӳлĕмĕ умне çитсе черет йышăнчĕ те пĕр пушă вырăна ларчĕ. Шалта ытла та хытă сăмахланипе чирлĕ çынна тухтăр мĕн калани коридорта та янках илтĕнет.

— Качча тухса ача çуратма ан та ĕмĕтлен, — юман юпана тутăхса тăн-тăнлăхне çухатнă пăтана çапса кĕртнĕ евĕр пăт татать сăмахсене сиплевçĕ. Пăти авăнать пулас, анчах тухтăр ăна тӳрлетсе пурпĕрех чирлин чун-чĕри патнех çапса кĕртесшĕн. — Санăн кукаму та, аннӳ те астма чирĕпе асапланаççĕ, чир ламран лама куçса пырать. Еткерлĕх (наследственность) чирĕ вăл. Çитменнине хăшĕсен чир амăшĕнчен пулас хĕр ачана кăна куçать, ывăлĕсене астма лекес хăрушлăх çук, ашшĕ енчен — ывăлĕсем чирлеççĕ, хĕрĕсем çав асапа тӳсмеççĕ. Ачусем çак йывăр чирпе ан асапланччăр тесен, качча тухас ĕмĕте пуçунтан яланлăхах кăларса ывăт! Шăпуна парăнса шăп-шăпăрт пурăн. Сирĕн пеккисем тухтăрсен сăмахĕсене итлемеççĕ. Пире хушма ĕç туса хураççĕ.

Çак сăмахсем хыççăн алăк яри уçăлчĕ те коридора вăтам пӳллĕ тăпăлкка кăна çамрăк хĕр тухса тăчĕ. Сăнĕ хăйĕн пĕр шуралать, пĕр хĕрелет. Малтанах ăна Мĕтри палласа та илеймерĕ, тĕсесерех пăхрĕ те — кӳршĕ Сантăрăн хĕрĕ Мариç иккен.

— Пăхăр-ха ăна, манăн юратма та, качча тухма та ирĕк çук-мĕн. Сурап эп тухтăр сăмахĕсем çине. Манра çав астма чирĕн пĕр палли те çук. Тухтăр маншăн çĕршыв конституцийĕ те мар, — терĕ те Мариç çӳллĕ кĕлеллĕ туфлийĕсемпе хыттăн шаклаттарса алăк патнелле утса кайрĕ. Часах вăл юрату сывлăшне пăтраштаракан çурхи урамра çухалчĕ.

Мĕтри пуçĕнче тухтăр сăмахĕсем çаврăнаççĕ. Сиплевçĕ эмелпе кăна мар, ăшă, евĕклĕ сăмахсемпе те çыннăн сывлăхне тĕреклетме, шанчăка çирĕплетме тивĕç. Ку вара сăмахсене пĕр уяса тăмасăр лаплаттарать. Темшĕн тухтăр патне кĕрес кăмăл сĕвĕрĕлсех кайрĕ ват çыннăн. Анчах эмелсем пĕтсе çитнĕ, рецепт çыртарма кĕмеллех.

Черет çитсен хăюсăррăн йышăну пӳлĕмне кĕрсе тăчĕ вăл, çухаларах сасăпа сывлăх сунчĕ. Тухтăр ун çине сивлеккĕнрех пăхса пуçне сĕлтрĕ, тенкел çине ларма сĕнчĕ. Вăл Мĕтрин юн пусăмне виçрĕ, чĕре мĕнле хăвăртлăхпа тапнине итлерĕ.

— Тем хăрушшиех çук, анчах эмелсене тăтăшах ĕçсе тăмалла. Чĕрĕр хăвăрттарах тапать, юн пусăмĕ те пысăкрах. Ытларах тулта уçăлса çӳреме тăрăшăр, çуллă апатпа та ан иртĕхĕр, улма-çырла çийĕр, тĕрлĕ соксем ĕçни те усăллă.

Тухтăр рецептсем çырчĕ те Мĕтри ыйтăвĕсене татрĕ, кайма ура çине тăрсан Мариç хутне кĕрсе пуçра çуралнă шухăшĕсене сиплевçе каламасăр чăтаймарĕ ват çын.

— Калăр-ха, сире чирлĕ çынсен шăпине хытă сăмахсемпе хуçса-авма кам ирĕк панă?

Ун ыйтăвне илтсен шур халатлă хĕрарăмăн куçĕсем чарăлсах кайрĕç.

— Кам вара эсир мана çакăн пек ыйтусем пама? Эпĕ аслă пĕлӳ илнĕ тухтăр, кама мĕн каламаллине тепри вĕрентмесĕрех лайăх чухлатăп.

— Эсир эпĕ кам иккеннипе кăсăкланатăр апла. Тивĕçлĕ канăва тухнă, хам ĕмĕрĕмре пайтах хурапа шурă курса пурнăç кăкне лайăх ăнланса çитнĕ çын. Эпĕ те аслă пĕлӳ илнĕ, малтан заводра электросварщикра ĕçлерĕм, куçăн мар майпа вĕренсе инженер-технолог профессине алла илсе хĕрĕх çула яхăн ĕçленĕ, халĕ те çав заводрах вăй хуратăп. Рабочисем мĕнле те пулин йăнăш тусан та эпĕ вĕсене хивре те хытă сăмахсемпе кӳрентермен. Сире, тухтăрсене, институтра вĕреннĕ чух çын сывлăхне сиен ан кӳрĕр тесе халалсем параççĕ. Мариç чунĕ хăва хулли пек, ăна çăмăллăнах авса хуçма, ĕмĕрлĕхе амантса хăварма пулать. Енчен те сирĕн сăмахăрсем хыççăн çут тĕнче çине кӳренсе, малашне пурнăçран ним ыррине те кĕтмелли çуккине ăшне хывса хăй çине алă хурас пулсан эсир вĕт хăвăрт суд тенкелĕ çине ларатăр. Эпĕ çав суда кунтеле пулса пырăп, Мариçе эсир каланă сăмахсене тӳре умĕнче ним улăштармасăр каласа парăп.

Çак сăмахсене илтсен тухтăр çийĕнчи халачĕ пекех шурса кайрĕ. Хăй йăнăшне ăнланса илчĕ пулас, ват çын çине айăпа кĕнĕ шухă шкул ачи пек пăхрĕ.

— Хăраса ан ӳкĕр, Мариç çирĕп чунлă ӳсет, вăл кăмăла хуçакан сăмахсене илтнипех пуçне усал шухăш илес çук. Анчах та сирĕн кăмăлăра çемçетмелле. Упăшкăрпа та çапла хивре пулсан, унсăр та тăрса юлăр.

— Çук ман упăшка…

— Вăт-вăт. Юратусăр çын кăмăлĕ çултан-çул пăсăлса пырать, шăрăх ĕнтсе илнĕ курăк евĕр кĕрчет. Пĕрне-пĕри юратакан арçынпа хĕрарăм çеç пурнăç йĕркине çăмăллăнах шайлаштарса пыраççĕ. Сире эпĕ пысăк юрату, тивĕçлĕ мăшăр тупма сунатăп. Хытă каларăм пулсан каçарăр. Халĕ ĕнтĕ сывă пулăр.

Урамра Мĕтри пуçне тепĕр шухăш çавăрса илчĕ. «Ман ывăл, Кирюха, Мариçпе ытла та çывăх-çке. Уроксене ялан пĕрле е пирĕн патра, е вĕсем патĕнче тăваççĕ. Час-часах эпĕ вĕсен енне вăрттăн-карттăн пăхкаласа илетĕп. Туяççĕ сисĕмлĕ чунсем эп пăхкаласа илнине. Пĕр-пĕринпе акăлчан чĕлхипе тем калаçса илеççĕ те, кăвакарчăнсем пекех, кăлтăр-кăлтăр кулаççĕ. Çук, ахаль туслăх кăна мар вĕсен хушшинче, чăн юрату тымар янă пулас чунĕсенче, — вĕлтлетет пуçра шухăш. — Поликлиникăра илтнĕ сăмахсене Кирюхана каламалла-ши?.. Ывăлĕ ман чипер ăс-тăнлă-ха, çамрăксемпе — çамрăкла, ватăсемпе — ватăлла. Çапах та, хамăн ывăл пулсан та, Кирюхан чунĕнче тĕттĕм кĕтессем пурах. Мариçе мĕнле чир кĕтнине илтсен вăл савнă хĕрĕнчен ютшăнма хăтланмĕ-ши?

Ун чухне Мариç пурнăçĕ çĕр çинчи тамăка çаврăнĕ, Кирюхана, çут тĕнчене ылханса-кӳренсе вăл чăннипех те хăй çине аллине хума пултарать. Мĕнрен кая пулăп-ха эпĕ тăрлавсăр, упăшкасăр пурăнса пĕтĕм тĕнче çине кӳреннĕ хĕрарăмран? Çук, пĕр сăмах та каламастăп Кирюхана, вĕсен хушшинчи юратăва çивĕч çава ешĕл курăка касса йăвантарнăн татмастăп. Вĕсен шăпи хăйсен аллинче. Тата тухтăр сăмахĕсем чăна килмессе те пултараççĕ. Юратчăр вĕсем пĕрне-пĕри Нарспипе Сетнер пек. Вĕсен юратăвĕпе телейне Михетер таптанă, эпĕ Михетер мар. Кусем пĕрлешчĕр — Кирюхапа Мариç — пире мăнуксем парнелеччĕр», — шухăшĕсене çакăн пек тĕвĕленĕ хыççăн хăй çинчен темле йывăр çăка илсе пăрахнăн çăмăлланса кайрĕ Мĕтри, çурчĕ еннелле хăвăртрах утрĕ. Тен, Мариçпе Кирюха вĕсем патĕнче уроксем тăваççĕ, çамрăксем кăлтăр-кăлтăр кулнине илтесси килсе кайрĕ.

* * *

Мариç васкать. Чунне капланса килнĕ кӳренĕве амăшне уçса вăл кăмăл пăлханăвне лăплантарасшăн. Çурхи ăшă çил кăтрарах çӳçне ачашшăн пăтраштарнине, питне ăшшăн сĕртĕнсе çупăрланине те туймасть хĕр. Тухтăр çапса лартнă тутăх пăта чуна чĕпĕтсе ыраттарать.

Килĕнче амăшĕ, Кулине инке, кухньăра апат пĕçерет. Мариç çӳхе плащне, туфлине хывмасăрах амăш патне ыткăнчĕ, ăна мăйĕнчен уртăнса пуçне кăкăрĕ çине хурса ĕсĕклесе макăрса ячĕ.

— Мĕн амакĕ пулчĕ, хĕрĕм, кам куççуль тăкмаллах кӳрентерчĕ?

Чунĕ ытла та кӳтсе кайнипе Мариç сăмах калаймасть. Амăшĕ ăна графинран сивĕ шыв парсан çеç хĕр кăштах лăпланчĕ. Унтан тухтăр сăмахĕсене тĕпĕ-йĕрĕпех амăшне каласа пачĕ. Итленĕçем Кулине инке хаш та хаш сывларĕ.

— Ах, аннеçĕм, ман юратăва, таса ĕмĕтсене çапла тискеррĕн таптаса хытарма хăтланни кăмăла хуçать, пурăнас ăнтăлăва татать. Сан шăпу çапларах тет тухтăр. Епле-ха манăн чун савнине, Кирюхана, чĕререн кăларса пăрахмалла? Эпĕ ун çинчен шутласанах вĕт манăн кайăк пек вĕçес, шăпчăк пек юрлас килет. Тухтăр каланисене Кирюхана каласан вăл манран сивĕнмĕ-ши? Çук, çапса пăрахсан та каламастăп. Каласан, Кирюха манран сивĕнсен манăн хам çине алă хумалли кăна юлать.

— Ах, Тур, хĕрĕм, чипер калаç-ха эсĕ. Ăсăнтан хăвала ун пек хăрушă шухăша. Пăх-ха кукамуна, аллă çула яхăн вăл çав чир тыткăнĕнче. Анчах курнă-и эсĕ вăл вырăнпа вăрах выртнине? Халăх сиплевçисен астмăпа кĕрешмелли сĕнĕвĕсене вуласа тĕрлĕ курăксем пухать, вĕсенчен им-çам шĕвекĕсем хатĕрлет. Тата халь сывлăх ăсчахĕсем те пайталлă эмелсем шутласа тупаççĕ. Пĕр сăмахпа, кукаму пурнăçшăн çине тăрса кĕрешет. Кĕçех çитмĕл тултарать ĕнтĕ вăл, пурпĕрех пурнăçшăн. Мĕншĕн тесен вăл сарăмсăр вилсе кайнă упăшкине, ман аттене, сан кукаçуна халĕ те юратать, ун ятне асăнмасăр пĕр кун та ирттермест, мана, Куля куккуна, санпа Толике чунтан-вартан юратать. Çав юрату ăна пурăнма вăйлă хăват парса тăрать. Тухтăрсен кашни сăмахне пуçа илме те кирлĕ мар. Кукамуна та вĕт пĕр тăрлавсăртарах тухтăр 50 çултан иртеймĕн эсĕ тенĕ. Вăл шăпана парăнмасăр сиплевçĕ каланинчен 20 çула яхăн ытларах пурăнать ав. Тата, кирек кам та хăй шăпине хăй тупать.

Кукамунтан çав чир манра та юлнă. Анчах мана тухтăр качча тухма, ачасем çуратма чарман. Пачах тепĕр май, вăл мана иртерех качча тухса астма аталанма тытăниччен ачасем çуратма ăс пачĕ. Епле савăнтăмăр эпир Сантăрпа Туля пиччӳ çуралсан. Çуртра иккĕмĕш хĕвел ялкăшнă пек туйăнчĕ. Мана та вĕт тухтăр кукаму чирĕ манра та юлма пултарнă пирки асăрхаттарнăччĕ. Çавăнпа ывăл çуралчĕ-ха тесе тем пекех савăнтăм. Урăх ача çуратас пирки шутламарăм. Вунă çул иртрĕ — манра чир палли те çук. Сантăртан эпĕ нимĕн те пытарман. Вунă çул иртсен вăл йăнкăртатма тытăнчĕ:

— Ăçта сан чир тени? Тен, çав астма санра аннӳнтен пачах юлман. Пĕр ача вăл — çур ача!

Вăтăр çулта çут тĕнчене эсĕ килтĕн. Ик хут савăнăç — тинех тулли çемье пулса тăтăмăр. Эпĕ вăтăр урлă каçсан хăрушă чир пуçласа хăй паллине кăтартрĕ: сывлăш пӳлĕнсе ларчĕ, ӳпкере купăс чĕлĕхĕ пек хăйăлтату. Вилсе каятăп пулĕ тесе хăранипе чутах сехре пăкки тапса тухатчĕ-тĕр. Васкавлă пулăшу машини вăхăтра çитрĕ, мана больницăна илсе кайрĕç. Икĕ кунранах ура çине тăмалăх сиплерĕç. Больницăран тухнă чухне тухтăр манпа пайтах вăхăт калаçрĕ.

— Сирĕн ӳпкери сывлăш çулĕсен астми. Вĕсем сасартăк пĕрĕнсе ларнин сăлтавне ăсчах тухтăрсем çĕр çул ытла тĕпчеççĕ ĕнтĕ, сывлăш çулĕсем мĕншĕн пĕр кĕтмен çĕртен пĕрĕнсе ларнине тупса палăртаймаççĕ. Хăшĕсен астма шăнса чирленĕ хыççăн тытăнать, теприсене чĕлĕм туртни пулăшать тата халь сывлăхшăн сиенлĕ производствăсем те ырă мар витĕм кӳреççĕ — вуншар завод труби сывлăша хура тĕтĕм йăсăрлантарать. Çавăнпа астмăпа асапланакансен шучĕ çулсерен ӳссе пырать. Чир амăшĕ енчен хĕрĕсене куçать, ашшĕ енчен — ывăлĕсене. Юлашки ăнсăртра тĕлĕнмеллисем татах та пур. Хăшĕсен пепкисем ача чухнех чирлеççĕ, теприсен çирĕм-вăтăр çула çитсен çеç астма тытăнать. Ку чир сирĕн ĕмĕрĕр çулташĕ, унтан сывалнă ăнсăртсем ытла та сайра. Анчах та пуçăра ан усăр, астмăпа асапланакансем 70—80 çул пурăнаççĕ. Астма пусмăрласа илсен унтан хăтăлма халь эмелсем йышлă шутласа кăларнă. Килĕрте яланах тĕрлĕ ингаляторсене запасра тытăр. Инçе çула кăна мар, лавккана кайнă чухне те хăвăрпа чиксе çӳреме ан ӳркенĕр, шăнасран сыхланăр. Ну, чир халтан ярсах çитерсен пĕр тăхтами пирĕн пата, больницăна. Пуçăра ан усăр, астмăпа та пурăнма пулать. Пĕр хăрушлăх кăна пур — чир хĕрĕрте те амаланма пултарать. Эсир ачăрсене сывă чух çуратма ĕлкĕрнине ырлатăп çеç. Ну, ырă пурнăç сире.

Çакăн пек канашсем парса ăсатрĕ мана тухтăр. Пуçра шухăш вĕçмесĕр тăмасть. Темшĕн чир санра амаланма тытăнасси хăрата пуçларĕ. Астма санра тытăнсан эсĕ ман çине мĕншĕн мана чирлĕ пуçпа çут тĕнчене çуратрăр тесе ылханасран шикленсе пурăнма пуçларăм.

— Аннеçĕм, мĕншĕн ман сана ылханас-ха? Ялкăшакан сар хĕвеле курма пӳрнĕшĕн-и, кăвак уйăх айĕнче уçăлса çӳреме тивнĕшĕн-и, хула хĕрринчи ешĕл вăрманта уçă сывлăшра чуна килентернĕшĕн-и? Манра хĕрлĕх пиçме тытăнсан чи ырă туйăм — юрату çуралчĕ. Санран, анне, эпĕ пытармастăп, кӳршĕсен Кирюхине чунри вут-хĕмĕн хĕрӳлĕхĕпе саватăп. Вăл та мана юратать, сар хĕвелпе, тĕрлĕ чечексемпе танлаштарать.

— Хĕрĕм, халĕ эсĕ 17 тултартăн, санăн шкул пĕтерсенех качча тухма тăрăшмалла, чир амаланма тытăниччен, сывлăху тĕрĕс-тĕкел чух ачасем çуратма тăрăшмалла. Шкултан вĕренсе тухасси тата уйăх çеç юлчĕ. Çавăнпа та сана пĕр сĕнӳ парасшăн. Çылăхлă вăл, анчах Турă сана çав хăтланушăн каçарĕ тетĕп. Чĕрӳ савакан каччу пур, санăн Кирюхапа ар çыхăнăвне кĕмелле, хăвăртрах йывăрланма тăрăшмалла. Унччен чăнах та чун савнине хăвна мĕнле чир кĕтнине каламасан та юрать. Пĕр сăмахпа, эпĕ çакна тума сана турăш умĕнче пехиллетĕп.

— Ах, аннеçĕм, таса юратупа юнашар суялăх килĕштерсе тăрĕç-и? Тата эпĕ халиччен Кирюхана чĕптĕм те суйса курман. Пирĕн пĕр-пĕринчен вăрттăнлăх та пулман. Пирĕн чунсем пĕр-пĕриншĕн яланах яр уçă.

— Эпĕ сана Кирюхана суйма хушмастăп-çке. Вăрттăнлăхна та çие юлнин паллисем иртсен савнине уçма пултаратăн. Сан варунта çĕнĕ чун ӳтленме тытăннине пĕлсен, сана мĕнле йывăр чир кĕтнине илтсен авланĕ-и вăл сан çине е çук. Чăнахах юратать пулсан сана хăйĕн мăшăрĕ тăвать, çук-тăк —ун чунĕ пурнăç йывăрлăхĕсенчен хăраса тăрать. Хăравçăпа ĕмĕр ирттересси те çăтмах мар. Ун чухне сан хăвăн хĕресне, вăл темле йывăр пулсан та, ĕмĕр тăршшĕпе пĕчченех йăтса тухма тӳр килет. Ачу кăна сана савăнăç кӳрĕ, пурăнас шанчăкна тĕреклетĕ.

— Ах, Тур, анне, эпĕ Кирюхан таса юратăвĕпе, вăл мана пĕр иккĕленми ĕненнипе, шанса тăнипе каварлăн усă курнă пекех пулса тухать-çке. Намăса епле чăтас?

— Эй, хĕрĕм, пăх-ха хальхи хĕрупраçсем çине, сăпайлисене, хĕр чыслăхне упраса пурăнаканнисене шутлама пĕр алăри пӳрнесем çитеççĕ. Хăй юратакан йĕкĕт тепĕр пикене савать пулсан, каччăна хăй май çавăрас тесе çав хĕр çинчен тискер элек сарать. Хăшĕсем тата шкулта вĕреннĕ чух хырăм йăтаççĕ. Пĕртен шкул ятне тикĕтпе сĕрнĕн варалаççĕ, тепĕртен ашшĕ-амăш ятне çĕртеççĕ. Сипетлĕх пур-и-ха вĕсен? Сан пачах та урăхла ăнсăрт, шкултан уйăхран вĕренсе тухатăн. Унччен сан хырăму нимĕн чухлĕ те ӳсмест-ха. Эсĕ никама та намăс кӳместĕн. Тен, Кирюха варунта ун ачи тĕвĕленнине пĕлсен сана малашне астма чирĕ кĕтнине те уяса тăмĕ, сана, пире намăса кĕртес темĕ, хăвăртрах авланма тăрăшĕ. Турă умĕнче те эсĕ мар, эпĕ çылăха кĕретĕп. Нихăш анне те качча тухичченех хăй хĕрне ар çыхăнăвне кĕме сĕнмест. Пысăк çылăх вăл. Сана эпĕ хам çак канаша паратăп, йывăр шăпана ан парăнтăр тетĕп, çут тĕнчене хăв несĕлне хăварма пиллетĕп. Шăпана парăнсан пурнăçу хурлăхпа мĕскĕнлĕхре иртĕ.

— Пурпĕрех, анне, эпĕ çав тери вăтанатăп. Епле сĕнес-ха ман Кирюхана хĕр чыслăхне татма?

— Эй, Мариç, кирек хăш арçын та, çав шутра йĕкĕт те, хĕрарăм е хĕрупраç унран мĕн кĕтнине самантрах сисет. Юрату çав çепĕç вăрттăнла ĕçе хăех йĕркелет, хăех майлаштарать. Тата, Кирюха йывăç тункати мар вĕт.

* * *

Амăшĕпе çапла ăшпиллĕн калаçнă хыççăн Мариçĕн чун-чĕри лăпланчĕ, ăшĕ вăркама пăрахрĕ. Ун сăнĕ малтанхи пекех йăлтăр кулăпа çиçрĕ. Кирюхапа тĕл пулсан вĕсем улах кĕтесре чуп тăвашрĕç. Мариç ĕлĕкхинчен те вăйлăрах каччă çумне пăчăртанма тăрăшнине Кирюха сисрĕ. «Ара, çуркунне вĕт. Вăл юратăва тата та вăйлатать. Хамăн та вĕт Мариç çумне хытăрах чăмăртанас килет», — вĕлтлетет йĕкĕт пуçĕнче шухăш.

Çуркунне вĕçленчĕ. Çăвăн пĕрремĕш кунĕсенченех экзаменсем пуçланчĕç. Пахчаçăсен те хĕрӳ тапхăр — 6 сотиллĕ çĕр лаптăкĕ çинче Сантăрпа Мĕтри кӳршĕсем мăшăрĕсемпе, экзамен тытма вăхăт çитмен ачисемпе эрне кун кайса вырсарни каç кăна таврăнаççĕ. Экзаменсене пула Мариçпе Кирюха килĕсенче тăр пĕччен тăрса юлаççĕ. Кирюха мĕн вĕреннисене тепĕр хут пăхкаласа ларатчĕ, сасартăк телефон шăнкăравĕ пӳлĕмре хыттăн янраса кайрĕ.

— Мĕн ĕçлетĕн, Кирюха чунăм, кичем мар-и пĕччен? — кăлтăртатать кĕпçере Мариç сасси.

— Кичем, хама упа пекех туятăп.

— Апла-тăк каç ман пата, халь кăна духовкăран кукăль пиçсе тухрĕ, пĕрле апат та лайăх анĕ.

— Эпĕ те каç апачĕ хатĕрлерĕм — эсĕ юратакан çĕр улми нимĕрĕпе гуляш. Сана хăнана чĕнес тесе телефонпа шăнкăравлас тесе тăраттăм, эсĕ маларах ĕлкĕртĕн. Атя çапла тăватпăр, халĕ эсĕ ман пата гуляш çиме хăнана каçатăн, унтан кукăль çиме — сан патна. Килĕшен пуль, савнă чунăм?