Электронлă вулавăш

— У-у, гуляш тесен эпĕ тĕнче хĕрне те çитме хатĕр, халех пыратăп.

Минут та иртмерĕ пуль, алăк патĕнчи шăнкăрав янраса та кайрĕ. Кирюха Мариçе кĕртсенех ăна хăй ытамне илчĕ, хĕрӳллĕн вăрахчен чуп турĕ. Аран хăтăлчĕ хĕр ун ытамĕнчен.

— Пăх-ха епле чăтăмсăрлăх санра, хăнине апатпа сăйламасăрах тӳлев илесшĕн, — шӳтлерĕ Мариç. Кирюха пĕр утăм чакрĕ те савнийĕ çине тинкерчĕ. Ун çинче çав тери илемлĕ кофта, унăн умĕнчи касăкĕ анлăран аванах мăкăрăлса тăракан кăкăрĕсен пысăк пайĕ уçă. Кирюхан вĕсене çепĕççĕн ачашлас кăмăл çуралчĕ. Халиччен вĕсене пĕрре те тĕкĕнменнипе вăтанса тăчĕ. Мариçĕ те Кирюха шухăшĕсене вуланăн хĕрелсе кайрĕ.

— Ну, хăнала, манăн гуляш çиес килет, — татрĕ хĕр йĕкĕтĕн чăрсăр шухăшĕсене.

Шăкăл-шăкăл калаçса çирĕç вĕсем Кирюха хатĕрленĕ гуляша.

— У-у, кун пек упăшкапа пурăнма çăмăл пулать, ăста повартан та техĕмлĕрех хатĕрленĕ, — мухтарĕ Мариç савнийĕ пĕçернĕ апата. — Халь ĕнтĕ ман пата кукăльпе чей ĕçме каçăпăр.

Кукăльпе чей ĕçнĕ вăхăтра Кирюха Мариç кăкăрĕсем çине çав тери тĕмсĕлсе пăхрĕ. Хĕр çакна сиссе пĕр хĕрелчĕ, пĕр шуралчĕ. Хăй йĕкĕт çумнерех куçса ларчĕ.

— Çав териех тĕкĕнес килет-и сан вĕсене? — пăшăлтатрĕç хĕр тутисем. Хăй хăюлăхĕнчен те вăл тем пекех тĕлĕнчĕ.

Кирюха пĕр сăмахсăр Мариçе хăй чĕрçи çине йăтса лартрĕ, хĕрĕн куçĕнчен пĕр вăтанми пăхса кофтин тӳмисене васкавлăн вĕçерме тытăнчĕ. Пике те каччă куçĕсене тем кĕтнĕн пĕр вăтанми пăхрĕ. Кирюха аллисем хĕр кăкăрĕсене çепĕççĕн ачашлаççĕ. Хăй те сисмерĕ, унра çут çанталăк парнеленĕ ар туйăмĕ хăватлăн вăранчĕ, ун чăтăмĕ пĕтрĕ. Мариçе йăтса урисем çине тăчĕ те вирлĕн чуп тунă май Мариç пӳлĕмне кĕчĕ. Шап-шурă простынь сарнă вырăн юратакан çамрăк чунсене хапăлласах йышăнчĕ.

Малтанах хĕр ыратăва чăтрĕ-ха. Вăл лăпланса пынă май ăна çеккунтсерен хăватланса пыракан киленӳ тыткăнларĕ, унăн чунĕ çӳл тӳпене вĕçсе çĕкленнĕн туйăнчĕ. «Акă мĕн иккен вăл хĕрарăм телейĕ!» — кăшкăрас килчĕ унăн. Юратăвăн чи çӳлти шайĕнчи çав тери тутлă çимĕçне тутанса пăхма чарасшăн пулчĕ вĕт тухтăр.

Çĕр каçа Мариç чунĕ миçе хутчен çӳл тӳпене вĕçсе хăпармарĕ-ши. Киленӳпе ĕшенсе çитнĕ çамрăксем ир енне тарăн ыйха путрĕç. Çавах хĕр хăй ялан вăранакан вăхăтра куçĕсене уçрĕ, тутлăн çывăракан Кирюха çине ытарайми пăхрĕ. «Епле илемлĕ вăл, мĕн чухлĕ пархатар унра. Аттепе аннесĕр, пиччесĕр пуçне çĕр чăмăрĕ çинче маншăн урăх çывăх çын çук. Чăнлăх уçăлсан писмĕ-ши вăл манран? Эй, çӳлти Аттемĕр, пулăш мана телейĕме хам çумрах хăварма», — пăшăлтатрĕç хĕр тутисем.

Унтан вăл вырăн çинчен тăрса халатне тăхăнса кухньăна тухрĕ, газ плити çине чейник лартса шыв вĕретрĕ те кофе пĕçерчĕ, ывăс çине печени пачкине уçса хучĕ, кофе янă пĕчĕк куркисене лартса хăй пӳлĕмне кĕчĕ.

— Эй, Кирюха чунăм, эсĕ патша пек кăнтăрлачченех çывăрас тетĕн-и? Ан ман, ир тăракан кайăк çеç тутă пулать.

Кирюха вăштах тăрса ларчĕ, куçĕсене ал тупанĕсемпе сăтăркаларĕ. Хăй урисем çине лартнă ывăс çинчен печени, кофе куркине илчĕ.

— Эпĕ капла кнеç пекех, — терĕ те васкамасăр печенипе кофе ĕçрĕ. — Ирхи ирттерет теççĕ, тавтапуç сана, чунăм, ывăсна илсе ларт та кил ман пата, пĕр тăхтами киленӳ тинĕсне чăмар…

— Çук, савниçĕм, кашни пулăмăн хăй вăхăчĕ пур. Халĕ шкулта иртнĕ вĕреннисене аса илер, текстсене тепĕр хут пăхса тухса ăса лайăх хывмалла. Ан ман, эпир иксĕмĕр те ылтăн медальсемшĕн кĕрешетпĕр. Пĕр-пĕрне кансĕрлес мар тесен эсĕ, савниçĕм, хăв хваттерне шăвăн-ха. Тата часах куками килмелле. Вăхăт çитсен хамах шăнкăравлăп. Ват çын умĕнче иккĕн кăна курăнма аван мар.

Кирюха хирĕçлесе тăмарĕ, кукамăш килмеллине илтсенех хăвăрт тухса кайрĕ.

 

* * *

Мĕн экзаменсем вĕçленичченех вĕсем эрне кунпа шăмат каçĕсенче юратăвăн тыткăнĕнче пулчĕç. Çавах та вĕсене ăнăçлă пама пысăк юрату нимĕн чухлĕ те кансĕрлемерĕ. Вăтам шкула веçех «пиллĕк» паллăсемпе вĕçлесе ылтăн медаль илме тивĕçрĕç. Кăларăм каçĕ те çав тери савăнăçлă иртрĕ. Вĕренсе тухакансем шкулпа яланлăхах уйрăлма тивнипе хурланса та илчĕç. Юлташланса çитнĕскерсем тĕрлĕ çĕре саланаççĕ. Кирюхапа Мариç тахçанах Алапукари ют çĕршыв чĕлхисен институтĕнче куçăн мар вĕренме тĕвĕлесе хунă. Пурнăçăн аслă çулĕ çине тухакансем карталанса Хусан урамĕсемпе юрăсем шăрантарса утрĕç те кашнинпех ăшшăн сывпуллашса килĕсене саланчĕç.

Мариçĕн хĕрлĕ тĕс килмелли вăхăт тахçанах иртрĕ. Вăл çак йӳтĕмпе амăшĕпе калаçрĕ.

— Турăçăм! Тавтапуç сана, илтрĕнех иккен эп кĕл туса, пуç çапса ыйтнине.

Ман хĕрĕм йывăрланнă, халь унăн тухтăр патне кайса çие юлни пирки тĕрĕсленсе ман шухăша çирĕплетмелле çеç. Хĕрĕм, эсĕ тăхăр уйăхран анне пулатăн, сан чунунта тата тепĕр юрату çăлкуçĕ тапма тытăнĕ. Ыранах хĕрарăм тухтăрĕ патне çит, тĕрĕслен. Эпĕ шухăшлани чăна килсен пĕтĕм чăнлăха Кирюха савнине те уçма пултаратăн. Чăнлăха пĕлсен вăл сана ӳпкелешес çуккине те чĕремпе туйса тăратăп. Юратакан çын каçаратех. Анне чĕри теме те туять.

Мариç тепĕр куннех тухтăр патĕнче пулчĕ. Ах, Тур, йывăр иккен хĕрлех ар çыхăнăвне кĕнине ют çынна калама. Намăсланнипе унăн пичĕ пĕрлĕхен пек хĕрелчĕ. Уйăх хушши çитнĕ пулсан та хĕрлĕ тĕс килменнине илтсен тухтăр хĕре евĕклĕн лăплантарчĕ, тĕрлĕ тестсемпе тĕрĕслерĕ.

— Пат татсах çирĕплетейместĕп, анчах эсир чăнах та йывăрланнă пулас. Тĕплĕнрех пĕлме анализ памалла. Ан пăлханăр, халь сирĕн хăвăра тем пек лăпкă тытма тăрăшмалла. Пăлханни ача психикине пăсĕ тата.

Тепĕр кунне Мариç тухтăр мĕн хушнине пурнăçларĕ. Вăл хĕре кăштах çеç кĕтсе ларма хушрĕ, хăй лабораторине кĕчĕ. Çур сехетрен тухтăр Мариç йывăрланнине пĕлтерчĕ.

— Кĕç-вĕç эсĕ çие юлнин паллисене ху та туйса илĕн: кăмăлу пăтранĕ, хăсассу килĕ — ан пăлхан, халиччен çимен çимĕçсене çиес килĕ — вĕсене çи. Ар çыхăнăвне кĕрессине самаях чакарăр. Йытă ами, ав, пĕтĕленсен аçасене хăй çывăхне те ямасть. Çут çанталăк вĕсене çавăн пек инстинкт панă. Эпир çынсем, ытти чĕрчунсем шухăшлама пĕлмеççĕ. Тата ар çыхăнăвĕсене йывăрланнăранпа тăватă уйăх иртсен пачах пăрахăçламалла. Пулас пепкене сиен кӳме пулать. Эпĕ каланисене пăхăнсан, пăлханусенчен сыхлансан санăн сывă та тĕреклĕ ача çуралĕ. Тăватă уйăхран УЗИ аппарачĕпе пăхăнма кил. Ун чухне сан варунта ывăл е хĕр ача аталаннине пĕлме пулать.

— Аннеçĕм, эпĕ йывăрланнă хĕрарăм, — пĕлтерчĕ Мариç амăшне хваттерне кĕрсенех. — Тухтăр çирĕплетсех каларĕ.

— Эй, Çӳлти Аттемĕр, илтрĕнех иккен эпĕ кĕлтуса, пуççапса ыйтнине. Манăн хĕр эс парнеленĕ пурнăçра хĕрарăм тивĕçне харама ямасть, пирĕн несĕле эс пулăшнипе йыш хушать. Пурте йĕркеллĕ те чипер çеç пултăрччĕ, — сăхсăхса пуççапрĕ амăшĕ турăш умĕнче. — Халь ĕнтĕ Сантăр мăшăрăмпа калаçмалли çеç юлать. Ĕнтĕ савнă Кирюшана та веçех каласа пама юрать. Чăнлăха пĕлсе вăл санран писсен те ан пăлхан. Çынсем хĕрлех хырăм йăтнă тесе пӳрнепе тĕллесе кăтартакансем те пулĕç. Çын çăварне çăра çакаймастăн. Анчах ан намăслан, санăн ача пулать, эсĕ çут тĕнчене ахаль килмен. Савăнса çеç пурăн. Енчен те Кирюха сана пăрахсан, хамăр тĕпренчĕке хамăрах пăхса ӳстерĕпĕр, халăха юрăхлă çын тума пĕтĕм вăя, ăса шеллемĕпĕр.

— Кирюхапа калаçассинчен шикленсе тăратăп. Ăнланĕ-ши вăл мана? Халиччен ман шухăша, мĕн калассине çур сăмахранах ăнланаканччĕ...

— Ан шиклен, юратакансем нумай сăмах вакламаççĕ, вĕсен чунĕсем калаçаççĕ. Ашшĕ сапăр кăмăллă çын, ăна хывнă пулсан вăл сана пĕр хытă сăмах та каламĕ. Халех чунна ан вĕчĕрхентер, пурте йĕркеллех пулĕ акă. Тĕплĕн калаçассине вăраха ан тăс, халех ун патне шăнкăравла та тĕл пуласси пирки калаçса татăл.

 

* * *

Кирюхана Мариç унран ютшăннă пек туйăнчĕ. Ар çыхăнăвне уйăха яхăн кĕмен. Мариç урăх йĕкĕт тупман-ши тесе те шухăшларĕ вăл. Юлашки вăхăтра Мариç кăмăл пăтраннипе, пуçĕ ыратнипе асапланнине те Кирюха пĕлмесĕр юлчĕ. «Мĕн пулчĕ Мариçпе? Тен, эпĕ ăна арçынлăхпа тивĕçтерейместĕп? Нивушлĕ юратми пулчĕ вăл мана?..» — çунтарать чунне çакăн пек ыйтусемпе каччă. Епле пулсан та Мариçпе тĕл пулса калаçмалла. Çак вăхăтра телефон шăнкăртатрĕ. Çамрăк çын унăн кĕпçине хăпăл-хапăл алла илчĕ.

— Аван-и, савниçĕм. Каçар мана, кăштах чирлем пекки турăм. Халь сывалтăм та сана тем пекех курас, санпа ăшпиллĕн калаçас килсе кайрĕ. Атя халех Çĕнтерӳçĕсен скверне, ах, Тур, нумай манăн сана каламаллисем.

— Хаваспах килĕшетĕп, халех тухмалла-и?

— Халех.

Çамрăксем алăран алла тытса вăл-ку çинчен калаçса сквер еннелле утрĕç. Вăл инçех те мар. Вĕсем пекех çамрăк йывăçсем ешĕл тумра. Лăпкă çилпе кашни йывăç çулçисемпе Кирюхапа Мариçе саламланăн алă çупнă евĕр сасă кăларса шĕпĕлтетеççĕ.

— Ман сăмахсем, тен, сана пĕр хурлантарĕç, пĕр савăнтарĕç, пĕр тĕлĕнтерĕç. Сăмахсен вĕçне тухиччен эсĕ мана ан пӳл, пăлханса кайăп та шухăш йĕркисене вĕçне çитереймĕп.

— Пĕр сасă та кăлармăп, — сăмах пачĕ Кирюха.

— Май уйăхĕн çурринче мана темшĕн поликлиникăна йыхрав ярсах чĕнсе илчĕç. Пĕр чирлемен çĕртенех. Тухтăр кăштах калаçнă хыççăнах мана хăрушă, хаяр, чун-чĕрене ыраттаракан сĕнӳсем пама тытăнчĕ, унăн сасси сăмахсерен хытăланса пычĕ. Качча тухса ачасем çуратас ĕмĕте пуçран яланлăхах кăларса ывăтма хушрĕ.

— Анчах мĕншĕн, мĕнле сăлтавпа? — тарăхса кайрĕ Кирюха.

— Чунăм, сана ан пӳл терĕм-çке, — тархасларĕ Мариç пĕр пăлханми. Кирюха аванмарланса пуçне пĕкрĕ.

— Итле малалла. Сăлтавĕ акă мĕнре. Кукамай та, анне те астма чирĕпе асапланаççĕ. Аннене çав чир кукамай варĕнчех куçнă. Вăл малтан палăрман кăна. Мана çуратнă хыççăн вăтăр урлă каçсан çеç чир пĕрремĕш хут хăй паллине кăтартнă — анне больницăрах выртса тухнă. Çав чир манра та хускалма пултарнине пĕлтерме чĕннĕ те мана поликлиника. Еткерлĕх чирĕ вăл, амăшĕнчен хĕрĕсене, ашшĕ енчен ывăлĕсене куçать. Вăт тухтăр асăрхаттарчĕ те: манран çут тĕнчене килекен хĕрсем те çав чирпе çуралма пултараççĕ. Кирлĕ-и сана кĕç-вĕç йывăр чирпе асапланма тытăнакан арăм? Эпĕ сан савăнăçлă кун-çулна хурлăх кĕртекенни кăна пулăп, сана эпĕ чун-чĕререн юрататăп. Сана хам чирлессине каламасăр пĕрлешсен эсĕ мана ĕмĕр тăршшĕне суеç, ултавçă тесе ылханăн. Çавăнпа мана мĕнле шăпа кĕтнине халех каласа хурас терĕм.

— Мариç, нивушлĕ эсĕ мана пăр чунлă çын тесе шутлатăн, — хаш сывларĕ Кирюха. — Кукаму 70 çула çитсе пырать. Аптрамасть вĕт, тулли пурнăçпа пурăнать. Аннӳ те чирлĕ эпĕ тесе нăйкăшмасть. Вăл çутçанталăк ыйтнине, Турă хушнă тивĕçе яваплăха туйса пурнăçланă — Туля пиччӳне, сана пурнăç панă, Сантăр пичче, Кулине аппа йăхĕсене малалла тăснă. Ман шутпа, Турă кашни чĕр чуна ĕрчевлĕхшĕн пурнăç парнелет. Çав шутра арçынпа хĕрарăма та. Ĕрчевлĕх çук-тăк, çĕр чăмăрĕ пуш-пушă пулĕччĕ. Тата санра астма чирĕн пĕр палли те çук вĕт. Тен, вăл санран пăрăнса иртĕ. Эсĕ шăпана вăхăчĕ çитмесĕрех парăнса пĕчченлĕх кичемĕнче пурăнас тетĕн-им?

— Çук, эпĕ пĕччен пулмастăп, шăпана та парăнмастăп. Аннепе калаçнă хыççăн вăл мана чир хусканиччен, сывлăх чипер чух санпа ар çыхăнăвне качча тухичченех кĕме турăш умĕнче пехиллерĕ, шкултан вĕренсе тухичченех йывăрланма хушрĕ. Каçар мана, Кирюха, вăрттăнлăха эпĕ сана малтанах уçмарăм, чирлекен хĕрпе çывăхланма килĕшмĕн тесе хăрарăм. Санăн юратăвупа, мана ĕненнипе, шанса тăнипе усă курнă пек пулса тухрĕ, анчах сансăр пуçне эпĕ урăх никама та юратас çук...

Çак сăмахсене илтсен Кирюха пичĕ темле ыратнăн туртăнса илчĕ, вăл Мариç куçĕнчен шăтарасла пăхрĕ.

— Шутламанччĕ эпĕ эсĕ çавăн пек чее те каварлă чунлă тесе. Пысăк касăклă кофта тăхăнса хăвăн кăкăрусене ман умра çиçтерсе илĕртрĕн пулать, манпа ар çывăхне кĕтĕн, пĕччен мар аннӳпе каварлашса манран йывăрланма тĕвĕлерĕр апла? Малтанах хăвăрăр шухăшăра мана уçнă пулсан эпĕ ăнланман пулăттăмччĕ-им? Нивушлĕ çав тери пархатарсăр ăслă-пуçлă эпĕ, нивушлĕ çав тери нĕрсĕр те шанчăксăр çын? Çакăн пек хăтлану хыççăн сан юратăву чăн-чăн мар, темле суя пекрех туйăнать. Ман пирки çапла шутлани кăмăлăма хуçать. Пуç тавра лайăх шутласан, эсĕ мана шанмастăн. Капла майпа эпĕ те шанмастăп сан юратăвна. Чăн юрату нимĕнле суялăха та, вăрттăнлăха та, каварлăха та чăтма пултараймасть.

Мариç тем каласшăн пулчĕ, анчах Кирюха ăна çăвар та уçтармарĕ.

— Ан тапаçлан хăвна тӳрре кăларма. Аннӳпе калаçнă, мĕншĕн манпа та калаçмарăн? Эпĕ астма чирĕнчен хăраса ӳкесрен шиклентĕн-им? Эсĕ мана шанманни, ĕненменни чуна хуçать. Халĕ ĕнтĕ эпĕ те сана шанмастăп, сăмахусемпе эсĕ халь тӳрре тухма тăрăшăн. Çавăнпа та сывă пул яланлăхах, манпа тĕл пулма сăлтавсем ан шыра, — вашт тăчĕ ури çине Кирюха, Мариç çине шелленĕн пăхса илчĕ те йывăçсем хушшипе асфальт сарнă сукмакпа çирĕппĕн утса кайрĕ.

«Кирюха, савниçĕм», — пăшăлтатрĕç хĕр тутисем. Куçĕсенчен мерчен-шăрçасем чĕрçийĕ çине йăкăртатса шурĕç. Çав самантрах тухтăр сăмахĕсем, пăлханма хушманнисем ун асне кĕчĕç. Çамрăк хĕрарăм хăйне алла илчĕ, ал тутрипе куçĕсене шăлса типĕтрĕ. «Йывăр мана, пепкем, йывăр. Ман варăмра эсĕ аталанса пыни çеç мана савăнăç кӳрет. Кирюха аçуна та ăс кĕрĕ тесе шутлатăп. Кĕретех, чĕппĕм, кĕретех!»

Мариç вăрахчен ларчĕ Çĕнтерӳçĕсен скверĕнче, хăйĕн малашнехи пурнăçне тĕплĕн тĕрĕлерĕ.

 

* * *

Иртрĕç кунсем. Пурнăç малаллах шурĕ. Мариç Кирюхана тем пек манма тăрăшсан та вăл куç умĕнчен каймарĕ. Çапах та вăл шкулта вĕреннĕ чухнех аслă пĕлӳ илме çирĕп ăсланă ĕмĕте пурнăçлама тытăнчĕ. Амăшĕ хĕрĕн чунĕнче тем пулса иртнине тӳрех сисрĕ. Тем пек тилмĕрсен те Мариç амăшне Кирюха ăна пăрахнă пирки пĕр сăмах та каламарĕ. Кулине хăех тавçăрчĕ — вăрттăнлăха уçнă хыççăн Кирюха кăмăлĕ пăсăлнă, вăл Мариçе пăрахнă. Вара вăл Кирюха пирки пĕр сăмах та хускатмарĕ.

Мариç кирлĕ хучĕсене пуçтарса часах Елабугăна тухса кайрĕ. Вăтам шкултан ылтăн медальпе вĕренсе тухнăран ăна экзаменсемсĕрех института илчĕç. Килте вĕренмелли ĕçсем пачĕç те вăл Хусана таврăнчĕ, ĕç шырама тытăнчĕ. Ашшĕ, Сантăр Васильччă, ăна хăй ĕçлекен заводах вырнаçма пулăшрĕ.

Самани халь урăм-сурăм, кадрсен пайĕн пуçлăхĕ кутăнлашма пăхрĕ: хĕрĕ йывăр çын мар пирки справка илсе килме хушрĕ.

— Качча кайман, тин çеç шкултан вĕренсе тухнă хĕр йывăрлă теме сирĕн епле сăмахлама хăю çитет?

— Çаплине, çапла-тăр та, инструкцирен эпĕ иртейместĕп.

Ĕçе епле майлаштармаллине Сантăр час шахвăртрĕ — лавккана кĕчĕ те чи хаклă коньяк туянчĕ. Килпетсĕр хăтлану-ха ку, взятка пани-çке. Анчах кун пек чухне пĕр кĕленче хаяр шĕвек е пысăк укçа темле пысăк ыйтăва та татать. Веçех иртĕхсе кайрĕç чиновниксем, пĕлтерĕшĕ пысăках мар сĕтел пуçлăхĕсем те укçа тĕкмесĕр çынна кирлĕ хута алă пусса памасăр вăрах вăхăт сĕтел сунтăхĕнче вырттараççĕ. Сантăр та ултав çулĕ çине тăрать-ха — хĕрĕ ун йывăрланнă-çке. Аван мар ун чунĕнче, ăна тем кăшлать. Чыслăх çапла асаплантарать ăна. Анчах пуçлăхсем чыслă-и-ха? Çук! Вĕсем пĕтĕм намăс-симĕсе çухатнă. Акă, кадрсен пайĕн пуçлăхĕ те хаклă йышши коньяк кĕленчине кăтартсанах Мариç ыйтăвне самантрах татрĕ. Вăл тепĕр куннех тимĕр-бетон заводĕнче табельщица пулса ĕçлеме тытăнчĕ.

Ĕнтĕ пурнăç веçех йĕркеллĕ пек, çапах та Мариçе тем çитмест. Унтан ăнкарса илет — Кирюхана куç хĕррипе те пулин курасшăн вăл. Ĕç хыççăн урамра та вăрах çӳрет, анчах Кирюхана çĕр çăтнă тейĕн — çук вăл. Çапла чĕрине çунтара-çунтарах тăватă уйăх иртрĕ. Мариçĕн УЗИ аппарачĕпе тĕрĕсленме хĕрарăм тухтăрĕ патне кайма вăхăт çитрĕ. Амăшĕ ăна пĕччен ямарĕ, иккĕш утрĕç Хусан урамĕпе. Тухтăр вĕсене евĕклĕн кĕтсе илчĕ, Мариçе УЗИ пӳлĕмне илсе кĕчĕ.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн