Электронлă вулавăш

«Вилетеп пуль, аннем: çӳл ту çине хăпартрăç...»

К.Ивановăн юлашки сăмахĕсем

«Туртатчĕ пит нумай.

Йӳççин курки чăппиччĕ...

Суха тăватчĕ хресченпе пĕрле.

Тем пулчĕ çамрăклах — эй, çунчĕ питĕ!

Типсе хуралчĕ. Хăрчĕ йĕкĕтле!

Итлетĕп ват çынна.

Сăмахĕ унăн хурлă.

Тарăхтарса ярать поэт шăпи!

Вĕçеççĕ тĕксĕм пĕлĕтсем ял урлă,

Мăкăрланса çунать тӳпе хуппи.

Поэт çунса вилет —

Юлать, ыр халăх, саншăн

Асаплăн е хаваслăн тунă ĕç.

Поэт чĕри, пĕччен ан çун эс,

Ан шăн!

Поэтăн чунĕ, çăлтăр витĕр вĕç!

«Вилетĕп пуль, аннем:

Çӳл ту çине хăпартрĕç...» —

Итлетĕп аслати кĕрлевĕнче.

Сĕм пĕлĕт мĕлкисем

Кăлкан сăнне хуратрĕç.

Тӳпе хуппи мăкăрлантарать, ĕнсе.

Вилес самантĕнче —

Теме манса тем кĕтнĕн —

Мĕскер каласшăн пулнă-ши поэт?

Вăл — вăрттăнлăх.

Ăна хĕвел тин чĕртнĕ

Чĕнӳçĕ-асамат анчах пĕлет!

Чăлл! çутăлчĕ тӳпе,

Кун йăлкăшма пуçларĕ —

Çӳл ту çинче эп куртăм поэта:

Мăнаçлă палăк!..

Тĕлĕнсе куçларăм!

Сисмерĕм те — çухалчĕ вăл таçта...

Çиç, çисĕм, çиç!

Анчах ытла ан ашкăн:

Поэт мĕлки ан сӳнтĕр тӳпере.

...Çӳл ту çине çӳл палăк

хăпартмашкăн

Те чул çитмест, те чун çитмест пире.