Электронлă вулавăш

Мария Назаровăна

 

Анне сăмах чунпа çеç тĕвĕленнĕ,

ăна салтма тăрсан, вăл пурăнать.

Масар халăхпала, ав, пĕвеленнĕ —

умра анне тăпри купаланать.

 

Чунра çеç çырăнса юлать халь маншăн

ун пурнăçĕ — чи хаклă кĕнеке.

Пултараймасть ялйыш ăна манмашкăн:

«Эх, кайрĕ çĕр çинчен Марье инке...»

 

Ма янрĕ гимн мăнаçлăн та хăватлăн?

Ана çарпуçĕн чысĕ кирлĕ мар.

Ял çыннисем пуçа чиксе, сăваплăн

итлеççĕ шăплăха — чĕнмест масар.

 

Ун тумĕ капăр мар çын ăмсанмалăх:

пушмак, ялти кĕпе, кăвак саппун.

Вырса пĕтернĕ сарлака каçалăк

танлашĕ ун ĕмĕрĕпе çак кун.

 

Çухалнă вăрçă çулĕсен асапĕ

утланнă ун ĕнси çине тахçан.

Çак сăнарпа, аннем, ялан аса кĕр —

чăнах та пурнăçу сăваплă сан!

 

Çурла тытса хирте эс тырă вырнă —

çил типĕтсе ĕлкĕреймен тарна.

Çĕр ĕçĕнче ялан ĕшеннĕ, ырнă —

пултарайман эс сулхăнра ларма.

 

Эс, вăрçă çулĕсем асав шăлпа

шакканă чух, арçын пек çирĕп тӳснĕ

çĕршывăн инкекне — чысу сан ӳснĕ:

санран та килнĕ пирĕн ыр шăпа.

 

Çăтмах сĕнмен çав тырăсăр ĕçкунĕ

çĕрĕçĕнче, анне, сана кас-кас.

Эс ху пайна та мăртăхмасăр хунă

çĕршывăн кĕлетне васка-васка.

 

Эпир — ача-пăча — ĕненнĕ çирĕп

аннеллĕ çĕршыва мĕн пĕчĕкрен.

Анне пуртан, чупса çӳренĕ ирĕк,

пуян çĕрсем пурришĕн вĕчĕхмен.

 

Паян королĕн, президентăн, шахăн

пылак чĕлхеллĕ амăшĕсене,

куç айĕн çеç пăхса иртем вăраххăн:

сан хисепӳ килеймĕ вĕсене!

 

Эй, аннесем! Çаваллă та çурлаллă,

ачашлăха пĕлмен хĕрарăмсем,

эсир çĕр тӳпине йăтма çуралнă:

асран каймаççĕ çывăх сассăрсем...

 

Çын чунĕпе ахаль-им тĕвĕленнĕ

«анне» сăмах? Вăл ĕмĕр пурăнать.

Масар халăхпала, ав, пĕвеленнĕ...

Унтах анне те пурпĕр курăнать.

 

Асра ун кунĕсея тирпейлĕ шучĕ...

Ялан астутарса çын тивĕçне

Çавапала çурла — ун атрибучĕ —

ял халăхне чĕнет пек çĕрĕçне.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн