Электронлă вулавăш

Ашшĕпе амǎшĕ ватлăх енне сулăнсан çут тĕнчене килчĕ Натали. Аслă ачисем тахçанах çитĕнсе çитсе тăван йăваран вĕçсе тухса кайса пĕтнĕччĕ ĕнтĕ. Маюк аппа, çие юлнине пĕлсен, малтанлăха аванмарланса çӳрерĕ. Больницăна кайма та шутланăччĕ хырăм пăрахма, упăшки, Ваççили пичче, чарчĕ: «Çурат. Тен, Турри хамăра ватлăхра пăхма парать пулĕ пепкене …» Вăхăт çитсен, мăшăрне юнашар ялти участок больницине лашапа леçрĕ. Тухтăрĕ вырăнта пулман пирки санитарка йышăнчĕ çăмăлланма хатĕрленекен хĕр арăма. Хăй вара темшĕн мăкăртата-мăкăртата вырăн хатĕрлет: «Тĕнче пĕтет пуль ара…Ваттисем аташа пуçларĕç, намăса та пĕлмеççĕ, ача çуратаççĕ…» Маюк аппа чăтрĕ-ха малтанах, каярахпа вара: «Апла ман каялла киле каяс-ши ĕнтĕ?»-терĕ шăппăн. «Вырт, килнĕ-тĕк,-» лаплаттарса хучĕ хыттăн санитарка, анчахран вара тек чĕнмерĕ…

Пĕчĕкçĕ сарă çӳçлĕ Натали çемьере пуринчен те ытларах юратакан ача пулчĕ: кĕçĕнни вĕт, пылакки. Ашшĕ маччаналла çĕклетчĕ те ăна: «Манăн тĕпренчĕкĕм, чиперккеçĕм»,- тетчĕ ачашшăн. Пиччĕш-аппăшсем те саватчĕç йăмăкне, хуларан ун валли парне илмесĕр килни пулман-тăр пĕрин те. Шăнкăрав пек уçă сассипе пӳрт тулса ларатчĕ, пусăк кăмăл та çĕкленетчĕ. Кăн-кăвак куçĕсем, каçăртарах пĕчĕк сăмси, тулли тутисем, чăнах та, ун сăнне илем кĕртетчĕç. Ахăлтатса кулнă вăхăтра сулахай пит çăмарти çинчи путăк татах та чипертерех кăтартатчĕç ăна…

Шкулта аван вĕренчĕ, тĕрлĕ концертсенче яланах юрласа-ташласа савăнтаратчĕ ял çыннисене. «Çав Ваççили хĕрĕ маттур та вара. Чиперкке çитĕнет», - тенине темиçе те илтнĕ ашшĕпе амăшĕ. Пĕчĕккĕнех хушма ят пулса тăчĕ çак сăмах Наталишĕн- «Чиперкке».

Хăй илемлине час туйса илчĕ хĕр ача, унпа усă курма та вĕренчĕ. Урок пĕлмен чухне утмăл турат тĕслĕ куçĕсемпе айăплăн пăхатчĕ те вĕрентекесем çине, вăрăм куç хăрпăхĕсене антарса: «Ăнланманччĕ эпĕ иртнĕ урокра çак темăна»,- тетчĕ çепĕç сасăпа. Учителĕн «иккĕ» паллă лартма алли çĕкленмесчĕ паллах…

Каччăсем час куç хыврĕç Чиперккене. Тин çеç пĕве кĕме пуçланă хĕр ачана хăйĕнчен чылай аслăрах йĕкĕтсем ăсататчĕç каçсерен килне. Аслă классенче вĕреннĕ вăхăтра уншăн çунакан каччăсем йышланчĕç, юратуллă сăмахсемлĕ çырусем час-часах киле-киле выртатчĕç почта ещĕкне. Çамрăксем уншăн тӳпелешсе илкелени те пулкаларĕ пулмалла. Натали чĕринче çеç юрату çуралмарĕ, никама та савмарĕ вăл…

Вăтам шкул пĕтернĕ хыççăн- университет, экономика факультечĕ. Тетĕшсемпе аппăшсем хăйсем патне пурăнма чĕнетчĕç пулин те, студентка общежитине вырнаçрĕ. Тин çеç çунат сарма пуçланă хĕр ачан хăй пеккисемпе пĕрле пурăнса курас килчĕ пулмалла. Ялтипе танлаштарма çук кунти йăла-йĕркесене. Йĕри-тавра çамрăксем, общежити каçсерен вĕресе кăна тăрать. Театр-кино, дискотека, кафе-ресторан… Каччăсем çаврăнкалаççĕ çеç Натали çывăхĕнче. Тăваттăмĕш курса вĕренекен Алик ăна утăм утма памарĕ пĕччен: е кинона чĕнет, е ташă каçне, хушшинчен чечек çыххи те йăтса килет, е конфет-шоколад парнелет. Хăй тата сăмахлама питĕ ăста, унпа юнашар чухне тунсăх таçта тарса пытанать, кулянни-хуйхăрни те иртсе каять. Шӳт çине шӳт унăн, ăçтан тухать тĕр сăмахĕ. Аванах килĕштерсе ячĕç Аликпе Натали. Ăмсанса пăхатчĕç вĕсем çине ытти студентсем. Пĕррехинче, ресторанта тутлă эрех тутанса курнă хыççăн общежитине таврăнсан, каччă хĕре хăй пурăнакан пӳлĕме илсе кĕчĕ. Пуçласа чуп турĕç вĕсем тĕттĕмре. Каччă тути ачашшăн сĕртĕнни Чиперккен пуçне çавăрчĕ, таçта аякка-аякка техĕмлĕх авăрне чăмнă пек туйрĕ вăл хăйне. Хăлха çумĕнче çепĕççĕн «Юрататăп сана» тесе пăшăлтатни татах та асамлă тĕнчене илсе кайнă пек чуна çĕклерĕ. Вăйлă та çепĕç алăсем кĕпе айнелле кĕреççĕ, пĕлсе те хăвăрт тăваççĕ вĕсем хăйсен ĕçне. Хăш вăхăтра тумтирсĕр тăрса юлнине те сисмерĕ хĕр. Шалти сыхăлăх туйăмĕ вăйсăррăн «Çук » теме хистет, хĕрсе кайнă кĕлетке вара туртăнать юратнă çын ытамне…Хирĕçлеме пултараймарĕ хĕр, парăнчĕ…

Ирихине Натали именсе-вăтаннипе вырăн çинчен час тăмарĕ. «Намăс мана»-, пăшăлтатрĕ вăл . Темшĕн-çке пĕтĕм общежити унпа мĕн пулса иртнине пĕлнĕ пек туйăнать. Хайне чирленĕ пек тытрĕ вăл. лекцисене каймарĕ. Юлташĕсем тухса кайсан, тĕкĕр умне пырса пит-куçне тимлĕн тишкерчĕ: «çакăн» хыççăн унăн сăнĕ çине паллă туса пичет лартса янăнах туйăнать ăна. Нимĕнле улшăну та курăнмасть, çав Чиперккех куç кĕски умăнче.

Кăнтăрла иртсен Алик çĕмĕрттерсе çитрĕ. Савăнăçлă каччă, аллинче- чечек çыххи. Йĕрсе янă хĕрĕн куççулĕсене чуп туса типĕтрĕ, лăплантарчĕ, шантарчĕ ĕмĕрех юратма пулса Наталие…

Нумай каччă çыпăçрĕ Чиперкке çумне, çулăмлă юрату сăмахĕсем самаях илтрĕ вăл яшсенчен. Тĕл пулма чĕнетчĕç, çырусем çыратчĕç, тӳпери çăлтăрсене антарса пама та шантаратчĕç. Алике пăрахмарĕ хĕр, ăнах юратрĕ, уншăнах çунчĕ ун чĕри. Каçсерен ун патне çунатлă вĕçен кайăк пек тухсе вĕçетчĕ, уйрăлнă самантсене юратмастчĕ. Каччăпа сăмах пуçаракан кашни хĕр ун чунĕнче кĕвĕçӳ туйăмĕсем çурататчĕ. Ун пек чухне мăртлататчĕ вăл, Аликпе калаçман пек тăватчĕ, анчах та хăех нумаях чăтаймастчĕ: ун пӳлĕмĕн алăкне кайса шаккатчĕ…

Çавраçиллĕ студент пурнăçĕ питĕ хăвăрт шăвать иккен, сисмесĕрех пĕр çул иртрĕ, унтан- тепре. Каникулсем вăхăтĕнче те хĕр ялта питех тытăнса тăмасчĕ, ик-виçĕ кун иртсенех каялла хулана тухса каятчĕ юратнă каччи патне. Тепĕр чухне ăшĕнчи шухăшĕсем те канăç памасчĕç ăна: «Мĕнле-ха капла иксĕмĕр хушшинчи хутшăну? Юхха пулса тăмарăм-ши эпĕ? Качча илĕ-ши вăл мана?»…

Альберт Станиславович Сильвестров (Алик ĕнтĕ) алла диплом илчĕ. Пысăк заводах экономист пулса ĕçлеме вырнаçрĕ. Пĕлĕш-тăванĕсем Шупашкарта чылаях çӳллĕ вырăнсенче ĕçлеççĕ унăн. Хĕр патне час-часах пырса çӳрерĕ вăл малтанах. Кайран темшĕн çке сайрарах курăна пуçларĕ общежитинче. Сăлтавне вара ĕç нумаййи çине яратчĕ, вăхăт çитменни пирки те аса илтеретчĕ. Ĕçĕ сахалах пулман-тăр унăн, пысăк заводăн комсомол организацийĕн секретарьне суйласа лартрĕç ăна. Кам комсомол ĕçĕнче вăй хуни кăна ăнланать, чухлать секретарь пурнăçне. Çывăрма та вăхăт сахал юлать. Пуху-канашлу, тĕл пулусем, план, отчет, информаци, çамрăксемпе тĕл пуласси, тĕрлĕ ăмăртусемпе конкурссем, хаçат-журнал тата ытти те. Пурнăç вĕресе кăна тăрать. Пĕр çулталăк вăй хунă хыççăн обкома чĕнтерчĕç те Мускава вĕренме ярасси çинчен пĕлтерчĕç. Çакăн хыççăн Наталипе Алик хушшинчи çыхăну татăлчĕ.

Хĕр çакна питĕ йывăррăн чăтса ирттерчĕ. Шухăшĕсемпе яланах каччă патне туртăнатчĕ вăл. Çывăрса каяймасăр аптратчĕ, каçсерен минтер ун куççулĕпе йĕпенетчĕ. Апат çиме те пăрахрĕ, начарланса кайрĕ. Пĕре пурăнакан хĕр-юлташĕсем чухлатчĕç-ха çакăн сăлтавне, май килнĕ таран лăплантаратчĕç ăна. Хăй çине алă çĕклесрен шикленнипех пулĕ, пĕчен пăрахса хăварман Наталие пӳлĕмре. Вăхăт темле сурана та сиплет теççĕ те, тĕрĕсех те пулĕ. Икĕ-виçĕ уйăх иртсен Чиперкке тантăшĕсемпе пĕрле урама уçăлса çӳреме те тухкалакан пулчĕ, ташă каçĕсенче те кайкаларĕ. Вĕренме аван вĕренетчĕ-ха вăл, яланах стипенди илсе тăнă. Укçа-тенкĕ енчен аптрасах тăман, кĕçĕн йăмăкне аслисем май килнĕ таран пулăшатчĕç. Ялтан çĕр улми, пахча çимĕç, аш-какай çителĕклех парса ярса тăратчĕç ашшĕпе амăшĕ. Çыпăçуллă, хăйне килĕшекен кĕпе-тумтир илме пултаратчĕ хĕр. Кулакан-шӳтлекен пулчĕ. Урама тухсан каччăсем ун еннеле яланах çаврăнса пăхатчĕç, куçĕсемпе яштака та илемлĕ хĕр кĕлеткине пăталатчĕç. Паллашма, тĕл пулма чĕнекенсем нумайччĕ. Анчах та Натали халь тинех никама та çывăха ямарĕ, юрату çулăмĕпе ĕнсе курнăскер, чĕрине пушă тытрĕ. Халь уншăн пĕтĕм арçын –ултавçă та путсĕр çын. Курайми пулчĕ тесен, тĕресех те мар пулĕ,кăсăклантарма пăрахрĕç ăна вĕсем.

Çамрăк чĕре чылай вăхăт хушши пушă пулма пултараймасть пулĕ çав, çутçанталăк та хăйĕннех тăвать. Тăваттăмĕш курс вĕçленĕ вăхăтра , çуркунне, строительство факультетĕнче вĕренекен Петĕрпе паллашрĕ Натали. Паллашрĕ тени тĕрĕсех те мар пулĕ, паллаштарчĕç хĕр-тусĕн çуралнă кунĕнче унпа. Именчĕк каччă, вăтаннипе хĕрелесе каять тепĕр чухне. Хăнана пырать те общежитине, нимех калаçмасть . Натали ăна уçăлса çӳреме хăй сĕтĕрсе тенĕ пекех илсе тухатчĕ урама. Кино, концертсене те билет туянса хăй илсе каятчĕ пуçарса. «Мĕн тупрăн эсĕ çав çулламан пăру çумĕнче?»- тĕлĕнетчĕç пĕрле пурăнакансем.- Кашни сăмаха тракторпа сĕтĕрсе кăлармалла вĕт унран»… Темле каласан та, вăтанчăк каччă хĕр кăмалне кайрĕ курăнтать, час-часах тĕл пулма пуçларĕç вĕсем пĕр-пĕринпе. Петĕр те тăваттăмĕш курс пĕтерчĕ. Каникул вăхăтĕнче хăй шапаша каясса пĕлтерчĕ. «Укçа кирлĕ пулать мана чылай»- терĕ те тек нимĕн те каламарĕ…

Юлашки курсра Петĕр Наталине хăй ăна юратнине пĕлтерчĕ, качча тухма ыйтрĕ. Сăмахпа мар паллах, çырупа. Пӳлĕме пырсан, чылай вăхăт хушши чĕнмесĕр тăчĕ, тем каласшăн хăй- паллă мар. Çамки тарланă, куçĕсем выляççĕ. Юлашкинчен кĕсйинчен тăваткал хуçлатнă хут кăларса пачĕ те хĕре, тухса кайрĕ васкаса . Натали хумханса та юратса çырнă çырăва вуласа тухнă хыççăн нумайччен шухăша путса ларчĕ. Тем тумалла? Пуçне каллех Алик сăнарĕ килсе çапрĕ. Тарăхса кайрĕ хĕр. Вăл паллах, Мускавра, урăх савни тупса янă. Ман пирки аса та илмест. Ватта юличчен, качча кайни лайăхрах пулĕ. Тепĕр тесен, хĕр те мар ĕнтĕ вăл текех…

Раштав типпи иртсен кĕрлеттерсе туй турĕç студенсен столовăйĕнче. Çуллахи каникул вахăтĕнче Мускав çывăхĕнче дача хăпартнă çĕрте ĕçлесе тунă укçа Петĕршĕн чухах пулчĕ. Анатри чăвашсем, хĕр енчисем, тури чăвашсемпе (каччă тăванĕсем) хăта-тăхлачланчĕç. Ялтан килнĕ туй маткисем Мăшăрлану керменĕ умне сурпан çыхса, хушпу тăхăнса, тевет çакса пынă. Автобус çинчех кăштах хĕрнĕскерсем, урамрах юррра-ташша пуçларĕç, мĕн ирчченех тенĕ пек столовăй кĕрлесе кăна тăчĕ. Мишша пичче купăсçă тăрăшсах юрă-кĕвĕ шăратать , вăл ывăнсан, магнитофон кĕрле пуçлать. Савăнать ялти халăх. Пĕрле вĕренекен студентсем, урăх хуларан килнĕ тĕрлĕ халăх ывăлĕ-хĕрĕсем, малтанлаха чăваш хĕрарăмĕсем такмак каласа ташланине çăварĕсене карса пăхса тăчĕç. Ара, тĕлĕнмелли нумай вĕсен. Кĕпе айне сăра-лимонад кĕленчисен тимĕр пăккисене çĕлесе хунă та темиçе хивре хĕр арăм, тăпăр-тăпăр туса ташша сикеççĕ, кĕвве май кĕленче пăккисем чăнкăр-чăнкăр туса илемлĕ сасă кăлараççĕ. «Ну бабки, ну металлистки, молодцы!»-чунтанах тĕлĕнеççĕ студентсем. «Йӳçĕ, йӳçĕ!»- кăшкăраççĕ хорпа. Наталипе Петĕр, имене-именех ура çине тăраççĕ, пĕр-пĕрне куçран пăхма вăтанса чуп туса илеççĕ. «Пĕрре, иккĕ, виççĕ…»- шутлаççĕ хăнасем, «пиçмен пашалу, пиçмен пашалу…»

Петĕр туйра аванах хĕрчĕ. Шап-шурă кĕпепе, хура костюмне хывса пăрахнă. Натали çине куç илмесĕр, çисе ярасла пăхать. Хушшинчен хăлхинчен вăрттăн юратуллă сăмахсем калать. Ир енне туй халăхĕ çамрăксене ĕлĕкхи йăлапа хĕве хупма шутларĕ. Ăна-кăна чухлакан хĕр арăмсем вырăн хатĕрлерĕç, тӳшек айне таçтан-муртан сĕтĕрсе килнĕ вут сыпписем чике-чике хучĕç. Юрла-юрла, хăваласах тенĕ пекех,Петĕрпе Наталине пушă пӳлĕме кĕртсе ячĕç…

Çак каçа Натали нихăçан манса каяймĕ. Чĕмсĕр Петĕрĕн ӳсĕрĕлсен эсрелĕ вăранчĕ курăнать. Ярса илчĕ те Чиперккене тӳшек çине печĕ. Ăна-кăна уямасăр хĕрĕн туй кĕпине çатăрах çурса ячĕ. Аялти кĕпе-йĕм те çĕтĕк пулса кĕтесселле сирпĕнчĕç. тутисенчен çырта-çырта чуп тăвать вăл мăшăрне, кăнттаммăн тыткалать ун кĕлеткине. «Тахçанах кĕтнĕ эпĕ çак куна, эсĕ манăн пуласса…»- пăшăлтатать хăй. Чылайччен лăскарĕ, нушалантарчĕ сассăр йĕрекен çамрăк арăмне. Кайран, вăйран кайса юнашар йăванчĕ : «Эсĕ мĕн, хĕр мар иккен»…- терĕ те çывăрса кайрĕ. Наталин ыйхи килмерĕ. Тумтирне тирпее кĕртнĕ хыççăн сĕтел хушшине ларчĕ те ĕсĕклесех макăрса ячĕ. Шутламанччĕ вăл çапла пулса тухасса. Лăпкă кӳлĕре шуйттан пурăнать тенĕ çав ваттисем …

Тепĕр кунхине те, урăлсан, Петĕр каллех унчченхи пекех шăпăрт, нимĕн те пулман пек тыткаларĕ хăйне.Хушшинчен çеç Натали çине темĕн каласла шухăшлăн пăхса илет те, шарламасть. Туять –ха хĕр вăл мĕн каласса, ыйтасса…

Çапла çĕр çĕмĕрттерсе иртсе кайрĕ туй. Çамрăксем уйрăм пӳлĕме пурăнма куçрĕç,

студсоветпа профком пулăшрĕç тин çеç чăмăрттаннă çемьене. Петĕр ĕçе те вырнаçрĕ: каçсерен хурал тăрать ача сачĕнче. Тепĕр чух çурçĕр иртсен персе çитет çамрăк арăмĕ патне общежитине: ара, чуп-чуп уйăхĕ пырать вĕт-ха вĕсен. Ярса тытать те Наталине ним сăмах чĕнмесĕр-тумасăр вырăн çине сĕтĕрет. Çамрăк арăм хирĕçлеме хăяймасть ăна. Пĕрре çапла Чиперкке килĕшмерĕ те ун кăмăлĕпе… Петĕр питрен çупса янă пек сăмахсемпе çапла лаплаттарса хучĕ: «Мĕн, унчченхи каччуна кĕтсе выртатăн-им каçсерен эпĕ ĕçре чух? Ăна хирĕçлесестĕн пулĕ-ха эсĕ…» Нимĕн те калаймасть Натали, чăтать.

Шăнкăр-шăнкăр юхать çурхи шыв студентсен хули çывăхĕнчи паркра. Папка кăларнă вĕренесемпе тирексем пĕтĕм хавалĕпе кунран-кун ăшăрах пăхакан хĕвел еннелле туртăнаççĕ. Куç умĕнче тенĕ пекех ешĕл тум тăхăнса пырать вăрман. Кăкăр туллин сывласа илетĕн те уçă сывлăша хĕлле пуçтарăнса çитнĕ пĕтĕм тасамарлăха ăшран хăваласа кăларса яратăн. Çут çанталăкпа пĕрле шавлă студент çамрăкĕ те хĕллехи тума хывса печĕ. Кĕске юбка тăхăннă хĕрсем янăравлăрах та чĕнерех кулнăн туйăнать.

Çакăн пек пĕр илемлĕ кун Натали пĕчченех шухăша кайса ларатчĕ паркри тенкел çинче. Юнашар пырса ларнă арçын сăмах хушсан çеç ыйхăран вăраннă пек шартах сиксе илчĕ: «Сывă-и, манăн Чиперккеçĕм?». Куçĕсене çĕклерĕ те хĕр арăм, сăмах чĕнейми пулса ларчĕ: ун çумĕнче Алик ларать иккен .

-Сывах-ха, пурăнатпăр. Эсĕ мĕн çăмăлпа килсе лекрĕн тата кунта? Мускавра тенине илтнĕччĕ,- тĕлĕкри пек хуравларĕ Натали.

- Ĕненетĕн-и, е çук, ку санăн ирĕк,-пуçларĕ каччă сăмахне,- эсĕ çак вырăнтах ларнине чунпа туйрăм, урасем хăйсемех сан патна илсе килчĕç. Хамăрăн юратнă вырăн марччĕ-и ку? Сахал чуп тунă-и эпир кунта?

Ним калама та аптраса кайрĕ Натали. Самаях вăхăт иртнĕ хыççăн çеç:

- Иртнĕ кунăн çути çук,- терĕ шăппăн.- Эп халĕ каснă çăкăр чĕлли ĕнтĕ. Мăшăр та пур, качча тухнă...

- Мĕншĕн васкарăн вара питĕ? Мĕншĕн мана кĕтмерĕн?

- Сана кĕтмен мар эпĕ, чылаях ...Çухалтăн, пăрахрăн мана.

- Пăрахма шутламан та сана. Вăхăт çуккипе ерçеймерĕм курăнать. Каçар мана, ухмаха. Чĕркуççи çине тăрса çылăха каçарттарам-и?

- Эсĕ чиркӳре мар, эпĕ те пачăшкă мар. Çитет пулĕ санпа калаçса,- ура çине тăчĕ Натали.-Упăшка ĕçрен таврăнать, апат хатĕрлеме те вăхăт çитрĕ. Юрĕ, сывă пул.

- Тăр-ха кăштах Чиперккеçĕм. Калаçар-ха чуна уçса.

- Чуна тимĕр сăлăп ярсах питăрсе хутăм эпĕ сан хыççăн. Уççине Атăла кăларса петĕм.

- Юрĕ, ирĕксĕрлесе калаçтараймăн ĕнтĕ çынна. Çапах та, йывăр вăхăтра, ман енчен пулăшу кĕтсе илме пултаратăн,- терĕ те Алик Наталине визиткине тăсса пачĕ.- Ку пирĕн юлашки тĕл пулу тесе шутламастăп...

Çак кĕтмен тĕл пулу çамрăк хĕр арăмăн йĕркеленсе кайнă пек пулнă пурнăçне каллех пăтраштарса ячĕ. Кĕлленнĕ тесе шутланă юратăвĕ кунран кун чĕрĕлсе, вăйланса пычĕ унăн. Петĕр те, темĕн сиснĕн, унпа ытларах шăл витĕртерех калаçма пуçларĕ. Унта-кунта кайса килсен яланах тĕпчеме пуçлать: «Мĕншĕн час килмерĕн? Кампа пултăн? Мĕн турăн?». Тепĕр чухне тарăхсах каять Натали- сăлтавсăрах сăмах илтес килмест унăн.

Июль уйăхĕнче иккĕш те алла дипломсем илчĕç, çамрăк специалистсем пулса тăчĕç. Направлени те пур: Наталин электроаппарат заводне, Петĕрĕн- стройкăна. Петĕре ( каçарăр, Петр Петрович Ванюков мастера), нумай калаçса тăмасăрах «малосемейкăра» хваттер пачĕç. Питех те пысăк савăнăç пулчĕ çакă çамрăксемшĕн. Тăван йăвана иккĕшĕн хушшинчи сивĕлĕхе пăхмасăрах пĕрле тирпей-илем кĕртрĕç: сăрларĕç, сапларĕç, тӳрлетрĕç... Мăшăрĕн алли ылтăн иккен Наталин, тем те тума пĕлет. Эрне хушшинчех юхăнса кайнă пĕчĕк хваттер йăлтăртатса тăракан пулса тăчĕ. Тăван-юлташĕсене пуçтарсах çĕнĕ пӳрт ĕçки турĕç. Пурнăç каллех йĕркене кĕре пуçларĕ Петĕрпе Наталин. Хĕр арăмăн та чунра лăпланнă пек пулчĕ. « Мĕн тăвас тетĕн ĕнтĕ, шăпи çапла пулсан,- хăйпе хăй калаçрĕ хĕр арăм.- Турри телей валеçнĕ чухне мана манса кайнă пулĕ çав».