Электронлă вулавăш

«Мĕн эсĕ...» - ним калама аптраса ларса юлчĕ Алик...

Почтăра Натали пĕтĕм укçине яла, амăшĕ патне куçарса пачĕ, ун хыççăн чиркĕве кĕрсе Турă Амăшĕ турăш умне çурта лартса чылайччен шухăша кайса тăчĕ. Каçхи автобуспа санаторине пырса çитрĕ вăл. Çĕрĕпех ĕçлекен барта ирчченех ларчĕ пĕчченех, хăйĕн çумне çыпăнакан пĕр арсынпа та калаçмарĕ. Кăвак çутă палăрма пуçласан Атăл çыранĕ еннеле утрĕ. Канатлă çул çывĕнчи юман çумне тайăнса чылайччен вăранакан çут çанталăк илемĕпе киленсе тăчĕ. Август уйăхĕ пулин те каçсем ăшă тăраççĕ кăçал. Лăпкă шăплăхра Наталипе Чиперкке сасă хăпартсах калаçни илтĕнмест, мĕншĕн тесен ку тавлашуллă калаçу шалта,чунра,чĕрере иртет.

«Малтанах асăрхаттарнă эпĕ сана: туйăмсене мар, ăс тăна ытларах итлемелле»,- тет Натали.

«Мĕн, эпĕ хĕр арăм мар-им? Мĕнла хĕр арăм вăл туйăмсемсĕр, юратусăр пурăнсан?»- ыйтупа хуравлать Чиперкке.

«Юратусăр пурăнма йывăр пулĕ-ха, анчах та виçи пулмалла пек...Кăмăл-сипет пирки те манмалла мар».

«Пурнăç пĕрре çеç килет, çак çĕр çинче эпир хăнара кăна. Савăнса юлас кăштах терĕм-çке».

«Савăнтăн, юратрăн ытлашшипех. Юлашкинчен юхха пулса тăтăн вĕт. Халĕ акă пуриншĕн те тӳлеме лекет. Пĕчĕк ывăлна кам пăхса ӳстерĕ?»

«Унăн ашшĕ те пур...Тата эпĕ ун валли çителĕкех укçа-тенкĕ хăваратăп.»

« Кĕмĕлпе аннене улăштарма çук паллах. Ку чир вăл- çылăхусемшĕн çӳлтен янă айăплав.»

«Килĕшетĕп санпа...»

Çак калаçу вĕçленсен Натали-Чиперкке «Чăнкă сăрт» ятлă кану çурчĕ еннелле хывнă сукмакпа аялалла утрĕ...

Тӳпере юлашки çăлтăрсем сӳнсе пыраççĕ. Чĕвĕл! сас пачĕ ирхи кайăк. Пĕр çăлтăр çуттăн çунса Атăл шывне ӳкрĕ, чăшăл! туса сӳннĕн туйăнчĕ...

... Володя ( хушма ячĕ-Пупсик) -пулăç. Хыркассинче пурăнать пулин те çу каçичченех Сĕктер поселокĕ çывăхĕнчи пĕр утрав çинче кун кунлать те каç тăвать. Çĕр пӳрт те чавнă вăл унта, КАМАЗ автомобиль аккумуляторĕсемпе усă курса çутă кĕртнĕ хăйĕн çуртне, радио-магнитофон та итлеме пултарать. Ир-ирех тухать моторлă киммипе юхан шыв çине, лартнă тетелĕсене тĕрĕслет. Тытнă пуллине е бизнесменсене, е канакансене сутать. Пурăнмаллăх çитет. Кашни уйăхрах ун патне рыбнадзор инспекторĕ килсе каять, «хырçă пуçтарма» ĕнтĕ. Паян та пĕр тетелне сĕтĕрсе кăларчĕ те Пупсик пуллине суйласа хучĕ. Тепĕр тетелĕ темшĕн йывăррăн тухать. «Çтерлĕк мар-ши?»- хыпăнса ӳкрĕ пулăç. Вăйне пухса туртса кăларса пырать тетелне. Ара, ку мĕн тамаши тата? Тетелте... Шывра кӳпчесе кайнă хĕр арăм вилли...

Петĕр хусахра нумай çӳêремерĕ. Арăмне пытарнă хыççăн çулталăкран тепре авланчĕ. Алик, чăнах та, нумай асăнчĕ Чиперккене, хăй СПИДпа чирлине пĕлсе Мускаври пĕр чаплă больницăра чунĕ тухичченех...

Ашшĕпе амăшĕ ватлăх енне сулăнсан çут тĕнчене килчĕ Натали. Аслă ачисем тахçанах çитĕнсе çитсе тăван йăваран вĕçсе тухса кайса пĕтнĕччĕ ĕнтĕ. Маюк аппа, çие юлнине пĕлсен, малтанлăха аванмарланса çӳрерĕ. Больницăна кайма та шутланăччĕ хырăм пăрахма, упăшки, Ваççили пичче, чарчĕ: «Çурат. Тен, Турри хамăра ватлăхра пăхма парать пулĕ пепкене …» Вăхăт çитсен, мăшăрне юнашар ялти участок больницине лашапа леçрĕ. Тухтăрĕ вырăнта пулман пирки санитарка йышăнчĕ çăмăлланма хатĕрленекен хĕр арăма. Хăй вара темшĕн мăкăртата-мăкăртата вырăн хатĕрлет: «Тĕнче пĕтет пуль ара…Ваттисем аташа пуçларĕç, намăса та пĕлмеççĕ, ача çуратаççĕ…» Маюк аппа чăтрĕ-ха малтанах, каярахпа вара: «Апла ман каялла киле каяс-ши ĕнтĕ?»-терĕ шăппăн. «Вырт, килнĕ-тĕк,-» лаплаттарса хучĕ хыттăн санитарка, анчахран вара тек чĕнмерĕ…

Пĕчĕкçĕ сарă çӳçлĕ Натали çемьере пуринчен те ытларах юратакан ача пулчĕ: кĕçĕнни вĕт, пылакки. Ашшĕ маччаналла çĕклетчĕ те ăна: «Манăн тĕпренчĕкĕм, чиперккеçĕм»,- тетчĕ ачашшăн. Пиччĕш-аппăшсем те саватчĕç йăмăкне, хуларан ун валли парне илмесĕр килни пулман-тăр пĕрин те. Шăнкăрав пек уçă сассипе пӳрт тулса ларатчĕ, пусăк кăмăл та çĕкленетчĕ. Кăн-кăвак куçĕсем, каçăртарах пĕчĕк сăмси, тулли тутисем, чăнах та, ун сăнне илем кĕртетчĕç. Ахăлтатса кулнă вăхăтра сулахай пит çăмарти çинчи путăк татах та чипертерех кăтартатчĕç ăна…

Шкулта аван вĕренчĕ, тĕрлĕ концертсенче яланах юрласа-ташласа савăнтаратчĕ ял çыннисене. «Çав Ваççили хĕрĕ маттур та вара. Чиперкке çитĕнет», - тенине темиçе те илтнĕ ашшĕпе амăшĕ. Пĕчĕккĕнех хушма ят пулса тăчĕ çак сăмах Наталишĕн- «Чиперкке».

Хăй илемлине час туйса илчĕ хĕр ача, унпа усă курма та вĕренчĕ. Урок пĕлмен чухне утмăл турат тĕслĕ куçĕсемпе айăплăн пăхатчĕ те вĕрентекесем çине, вăрăм куç хăрпăхĕсене антарса: «Ăнланманччĕ эпĕ иртнĕ урокра çак темăна»,- тетчĕ çепĕç сасăпа. Учителĕн «иккĕ» паллă лартма алли çĕкленмесчĕ паллах…

Каччăсем час куç хыврĕç Чиперккене. Тин çеç пĕве кĕме пуçланă хĕр ачана хăйĕнчен чылай аслăрах йĕкĕтсем ăсататчĕç каçсерен килне. Аслă классенче вĕреннĕ вăхăтра уншăн çунакан каччăсем йышланчĕç, юратуллă сăмахсемлĕ çырусем час-часах киле-киле выртатчĕç почта ещĕкне. Çамрăксем уншăн тӳпелешсе илкелени те пулкаларĕ пулмалла. Натали чĕринче çеç юрату çуралмарĕ, никама та савмарĕ вăл…

Вăтам шкул пĕтернĕ хыççăн- университет, экономика факультечĕ. Тетĕшсемпе аппăшсем хăйсем патне пурăнма чĕнетчĕç пулин те, студентка общежитине вырнаçрĕ. Тин çеç çунат сарма пуçланă хĕр ачан хăй пеккисемпе пĕрле пурăнса курас килчĕ пулмалла. Ялтипе танлаштарма çук кунти йăла-йĕркесене. Йĕри-тавра çамрăксем, общежити каçсерен вĕресе кăна тăрать. Театр-кино, дискотека, кафе-ресторан… Каччăсем çаврăнкалаççĕ çеç Натали çывăхĕнче. Тăваттăмĕш курса вĕренекен Алик ăна утăм утма памарĕ пĕччен: е кинона чĕнет, е ташă каçне, хушшинчен чечек çыххи те йăтса килет, е конфет-шоколад парнелет. Хăй тата сăмахлама питĕ ăста, унпа юнашар чухне тунсăх таçта тарса пытанать, кулянни-хуйхăрни те иртсе каять. Шӳт çине шӳт унăн, ăçтан тухать тĕр сăмахĕ. Аванах килĕштерсе ячĕç Аликпе Натали. Ăмсанса пăхатчĕç вĕсем çине ытти студентсем. Пĕррехинче, ресторанта тутлă эрех тутанса курнă хыççăн общежитине таврăнсан, каччă хĕре хăй пурăнакан пӳлĕме илсе кĕчĕ. Пуçласа чуп турĕç вĕсем тĕттĕмре. Каччă тути ачашшăн сĕртĕнни Чиперккен пуçне çавăрчĕ, таçта аякка-аякка техĕмлĕх авăрне чăмнă пек туйрĕ вăл хăйне. Хăлха çумĕнче çепĕççĕн «Юрататăп сана» тесе пăшăлтатни татах та асамлă тĕнчене илсе кайнă пек чуна çĕклерĕ. Вăйлă та çепĕç алăсем кĕпе айнелле кĕреççĕ, пĕлсе те хăвăрт тăваççĕ вĕсем хăйсен ĕçне. Хăш вăхăтра тумтирсĕр тăрса юлнине те сисмерĕ хĕр. Шалти сыхăлăх туйăмĕ вăйсăррăн «Çук » теме хистет, хĕрсе кайнă кĕлетке вара туртăнать юратнă çын ытамне…Хирĕçлеме пултараймарĕ хĕр, парăнчĕ…

Ирихине Натали именсе-вăтаннипе вырăн çинчен час тăмарĕ. «Намăс мана»-, пăшăлтатрĕ вăл . Темшĕн-çке пĕтĕм общежити унпа мĕн пулса иртнине пĕлнĕ пек туйăнать. Хайне чирленĕ пек тытрĕ вăл. лекцисене каймарĕ. Юлташĕсем тухса кайсан, тĕкĕр умне пырса пит-куçне тимлĕн тишкерчĕ: «çакăн» хыççăн унăн сăнĕ çине паллă туса пичет лартса янăнах туйăнать ăна. Нимĕнле улшăну та курăнмасть, çав Чиперккех куç кĕски умăнче.

Кăнтăрла иртсен Алик çĕмĕрттерсе çитрĕ. Савăнăçлă каччă, аллинче- чечек çыххи. Йĕрсе янă хĕрĕн куççулĕсене чуп туса типĕтрĕ, лăплантарчĕ, шантарчĕ ĕмĕрех юратма пулса Наталие…

Нумай каччă çыпăçрĕ Чиперкке çумне, çулăмлă юрату сăмахĕсем самаях илтрĕ вăл яшсенчен. Тĕл пулма чĕнетчĕç, çырусем çыратчĕç, тӳпери çăлтăрсене антарса пама та шантаратчĕç. Алике пăрахмарĕ хĕр, ăнах юратрĕ, уншăнах çунчĕ ун чĕри. Каçсерен ун патне çунатлă вĕçен кайăк пек тухсе вĕçетчĕ, уйрăлнă самантсене юратмастчĕ. Каччăпа сăмах пуçаракан кашни хĕр ун чунĕнче кĕвĕçӳ туйăмĕсем çурататчĕ. Ун пек чухне мăртлататчĕ вăл, Аликпе калаçман пек тăватчĕ, анчах та хăех нумаях чăтаймастчĕ: ун пӳлĕмĕн алăкне кайса шаккатчĕ…

Çавраçиллĕ студент пурнăçĕ питĕ хăвăрт шăвать иккен, сисмесĕрех пĕр çул иртрĕ, унтан- тепре. Каникулсем вăхăтĕнче те хĕр ялта питех тытăнса тăмасчĕ, ик-виçĕ кун иртсенех каялла хулана тухса каятчĕ юратнă каччи патне. Тепĕр чухне ăшĕнчи шухăшĕсем те канăç памасчĕç ăна: «Мĕнле-ха капла иксĕмĕр хушшинчи хутшăну? Юхха пулса тăмарăм-ши эпĕ? Качча илĕ-ши вăл мана?»…

Альберт Станиславович Сильвестров (Алик ĕнтĕ) алла диплом илчĕ. Пысăк заводах экономист пулса ĕçлеме вырнаçрĕ. Пĕлĕш-тăванĕсем Шупашкарта чылаях çӳллě вырăнсенче ĕçлеççĕ унăн. Хĕр патне час-часах пырса çӳрерĕ вăл малтанах. Кайран темшĕн çке сайрарах курăна пуçларĕ общежитинче. Сăлтавне вара ĕç нумаййи çине яратчĕ, вăхăт çитменни пирки те аса илтеретчĕ. Ĕçĕ сахалах пулман-тăр унăн, пысăк заводăн комсомол организацийĕн секретарьне суйласа лартрĕç ăна. Кам комсомол ĕçĕнче вăй хуни кăна ăнланать, чухлать секретарь пурнăçне. Çывăрма та вăхăт сахал юлать. Пуху-канашлу, тĕл пулусем, план, отчет, информаци, çамрăксемпе тĕл пуласси, тĕрлĕ ăмăртусемпе конкурссем, хаçат-журнал тата ытти те. Пурнăç вĕресе кăна тăрать. Пĕр çулталăк вăй хунă хыççăн обкома чĕнтерчĕç те Мускава вĕренме ярасси çинчен пĕлтерчĕç. Çакăн хыççăн Наталипе Алик хушшинчи çыхăну татăлчĕ.

Хĕр çакна питĕ йывăррăн чăтса ирттерчĕ. Шухăшĕсемпе яланах каччă патне туртăнатчĕ вăл. Çывăрса каяймасăр аптратчĕ, каçсерен минтер ун куççулĕпе йĕпенетчĕ. Апат çиме те пăрахрĕ, начарланса кайрĕ. Пĕре пурăнакан хĕр-юлташĕсем чухлатчĕç-ха çакăн сăлтавне, май килнĕ таран лăплантаратчĕç ăна. Хăй çине алă çĕклесрен шикленнипех пулĕ, пĕчен пăрахса хăварман Наталие пӳлĕмре. Вăхăт темле сурана та сиплет теççĕ те, тĕрĕсех те пулĕ. Икĕ-виçĕ уйăх иртсен Чиперкке тантăшĕсемпе пĕрле урама уçăлса çӳреме те тухкалакан пулчĕ, ташă каçĕсенче те кайкаларĕ. Вĕренме аван вĕренетчĕ-ха вăл, яланах стипенди илсе тăнă. Укçа-тенкĕ енчен аптрасах тăман, кĕçĕн йăмăкне аслисем май килнĕ таран пулăшатчĕç. Ялтан çĕр улми, пахча çимĕç, аш-какай çителĕклех парса ярса тăратчĕç ашшĕпе амăшĕ. Çыпăçуллă, хăйне килĕшекен кĕпе-тумтир илме пултаратчĕ хĕр. Кулакан-шӳтлекен пулчĕ. Урама тухсан каччăсем ун еннеле яланах çаврăнса пăхатчĕç, куçĕсемпе яштака та илемлĕ хĕр кĕлеткине пăталатчĕç. Паллашма, тĕл пулма чĕнекенсем нумайччĕ. Анчах та Натали халь тинех никама та çывăха ямарĕ, юрату çулăмĕпе ĕнсе курнăскер, чĕрине пушă тытрĕ. Халь уншăн пĕтĕм арçын –ултавçă та путсĕр çын. Курайми пулчĕ тесен, тĕресех те мар пулĕ,кăсăклантарма пăрахрěç ăна вěсем.

Çамрăк чĕре чылай вăхăт хушши пушă пулма пултараймасть пулĕ çав, çутçанталăк та хăйĕннех тăвать. Тăваттăмĕш курс вĕçленĕ вăхăтра , çуркунне, строительство факультетĕнче вĕренекен Петĕрпе паллашрĕ Натали. Паллашрĕ тени тĕрĕсех те мар пулĕ, паллаштарчĕç хĕр-тусĕн çуралнă кунĕнче унпа. Именчĕк каччă, вăтаннипе хĕрелесе каять тепĕр чухне. Хăнана пырать те общежитине, нимех калаçмасть . Натали ăна уçăлса çӳреме хăй сĕтĕрсе тенĕ пекех илсе тухатчĕ урама. Кино, концертсене те билет туянса хăй илсе каятчĕ пуçарса. «Мĕн тупрăн эсĕ çав çулламан пăру çумĕнче?»- тĕлĕнетчĕç пĕрле пурăнакансем.- Кашни сăмаха тракторпа сĕтĕрсе кăлармалла вĕт унран»… Темле каласан та, вăтанчăк каччă хĕр кăмалне кайрĕ курăнтать, час-часах тĕл пулма пуçларĕç вĕсем пĕр-пĕринпе. Петĕр те тăваттăмĕш курс пĕтерчĕ. Каникул вăхăтĕнче хăй шапаша каясса пĕлтерчĕ. «Укçа кирлĕ пулать мана чылай»- терĕ те тек нимĕн те каламарĕ…

Юлашки курсра Петĕр Наталине хăй ăна юратнине пĕлтерчĕ, качча тухма ыйтрĕ. Сăмахпа мар паллах, çырупа. Пӳлĕме пырсан, чылай вăхăт хушши чĕнмесĕр тăчĕ, тем каласшăн хăй- паллă мар. Çамки тарланă, куçĕсем выляççĕ. Юлашкинчен кĕсйинчен тăваткал хуçлатнă хут кăларса пачĕ те хĕре, тухса кайрĕ васкаса . Натали хумханса та юратса çырнă çырăва вуласа тухнă хыççăн нумайччен шухăша путса ларчĕ. Тем тумалла? Пуçне каллех Алик сăнарĕ килсе çапрĕ. Тарăхса кайрĕ хĕр. Вăл паллах, Мускавра, урăх савни тупса янă. Ман пирки аса та илмест. Ватта юличчен, качча кайни лайăхрах пулĕ. Тепĕр тесен, хĕр те мар ĕнтĕ вăл текех…

Раштав типпи иртсен кĕрлеттерсе туй турĕç студенсен столовăйĕнче. Çуллахи каникул вахăтěнче Мускав çывăхěнче дача хăпартнă çěрте ěçлесе тунă укçа Петěршěн чухах пулчě. Анатри чăвашсем, хĕр енчисем, тури чăвашсемпе (каччă тăванĕсем) хăта-тăхлачланчĕç. Ялтан килнĕ туй маткисем Мăшăрлану керменĕ умне сурпан çыхса, хушпу тăхăнса, тевет çакса пынă. Автобус çинчех кăштах хĕрнĕскерсем, урамрах юррра-ташша пуçларĕç, мĕн ирчченех тенĕ пек столовăй кĕрлесе кăна тăчĕ. Мишша пичче купăсçă тăрăшсах юрă-кĕвĕ шăратать , вăл ывăнсан, магнитофон кĕрле пуçлать. Савăнать ялти халăх. Пĕрле вĕренекен студентсем, урăх хуларан килнĕ тĕрлĕ халăх ывăлĕ-хĕрĕсем, малтанлаха чăваш хĕрарăмĕсем такмак каласа ташланине çăварĕсене карса пăхса тăчěç. Ара, тĕлĕнмелли нумай вĕсен. Кĕпе айне сăра-лимонад кĕленчисен тимĕр пăккисене çĕлесе хунă та темиçе хивре хĕр арăм, тăпăр-тăпăр туса ташша сикеççĕ, кĕвве май кĕленче пăккисем чăнкăр-чăнкăр туса илемлĕ сасă кăлараççĕ. «Ну бабки, ну металлистки, молодцы!»-чунтанах тĕлĕнеççě студентсем. «Йӳçě, йӳçě!»- кăшкăраççě хорпа. Наталипе Петěр, имене-именех ура çине тăраççě, пěр-пěрне куçран пăхма вăтанса чуп туса илеççě. «Пěрре, иккě, виççě…»- шутлаççě хăнасем, «пиçмен пашалу, пиçмен пашалу…»

Петĕр туйра аванах хĕрчĕ. Шап-шурă кĕпепе, хура костюмне хывса пăрахнă. Натали çине куç илмесĕр, çисе ярасла пăхать. Хушшинчен хăлхинчен вăрттăн юратуллă сăмахсем калать. Ир енне туй халăхĕ çамрăксене ĕлĕкхи йăлапа хĕве хупма шутларĕ. Ăна-кăна чухлакан хĕр арăмсем вырăн хатĕрлерĕç, тӳшек айне таçтан-муртан сĕтĕрсе килнĕ вут сыпписем чике-чике хучĕç. Юрла-юрла, хăваласах тенĕ пекех,Петĕрпе Наталине пушă пӳлĕме кĕртсе ячĕç…

Çак каçа Натали нихăçан манса каяймĕ. Чěмсěр Петĕрĕн ӳсĕрĕлсен эсрелě вăранчĕ курăнать. Ярса илчĕ те Чиперккене тӳшек çине печĕ. Ăна-кăна уямасăр хĕрĕн туй кĕпине çатăрах çурса ячĕ. Аялти кĕпе-йĕм те çĕтĕк пулса кĕтесселле сирпĕнчĕç. тутисенчен çырта-çырта чуп тăвать вăл мăшăрне, кăнттаммăн тыткалать ун кĕлеткине. «Тахçанах кĕтнĕ эпĕ çак куна, эсĕ манăн пуласса…»- пăшăлтатать хăй. Чылайччен лăскарĕ, нушалантарчĕ сассăр йĕрекен çамрăк арăмне. Кайран, вăйран кайса юнашар йăванчĕ : «Эсĕ мĕн, хĕр мар иккен»…- терĕ те çывăрса кайрĕ. Наталин ыйхи килмерĕ. Тумтирне тирпее кĕртнĕ хыççăн сĕтел хушшине ларчĕ те ĕсĕклесех макăрса ячĕ. Шутламанччĕ вăл çапла пулса тухасса. Лăпкă кӳлĕре шуйттан пурăнать тенĕ çав ваттисем …

Тепěр кунхине те, урăлсан, Петěр каллех унчченхи пекех шăпăрт, нимěн те пулман пек тыткаларě хăйне.Хушшинчен çеç Натали çине темěн каласла шухăшлăн пăхса илет те, шарламасть. Туять –ха хěр вăл мěн каласса, ыйтасса…

Çапла çěр çěмěрттерсе иртсе кайрě туй. Çамрăксем уйрăм пӳлěме пурăнма куçрĕç,

студсоветпа профком пулăшрěç тин çеç чăмăрттаннă çемьене. Петěр ěçе те вырнаçрě: каçсерен хурал тăрать ача сачěнче. Тепěр чух çурçĕр иртсен персе çитет çамрăк арăмĕ патне общежитине: ара, чуп-чуп уйăхĕ пырать вĕт-ха вĕсен. Ярса тытать те Наталине ним сăмах чĕнмесĕр-тумасăр вырăн çине сĕтĕрет. Çамрăк арăм хирĕçлеме хăяймасть ăна. Пĕрре çапла Чиперкке килĕшмерĕ те ун кăмăлĕпе… Петĕр питрен çупса янă пек сăмахсемпе çапла лаплаттарса хучĕ: «Мĕн, унчченхи каччуна кĕтсе выртатăн-им каçсерен эпĕ ĕçре чух? Ăна хирĕçлесестĕн пулĕ-ха эсĕ…» Нимěн те калаймасть Натали, чăтать.

Шăнкăр-шăнкăр юхать çурхи шыв студентсен хули çывăхĕнчи паркра. Папка кăларнă вĕренесемпе тирексем пĕтĕм хавалĕпе кунран-кун ăшăрах пăхакан хĕвел еннелле туртăнаççĕ. Куç умĕнче тенĕ пекех ешĕл тум тăхăнса пырать вăрман. Кăкăр туллин сывласа илетĕн те уçă сывлăша хĕлле пуçтарăнса çитнĕ пĕтĕм тасамарлăха ăшран хăваласа кăларса яратăн. Çут çанталăкпа пĕрле шавлă студент çамрăкĕ те хĕллехи тума хывса печĕ. Кĕске юбка тăхăннă хĕрсем янăравлăрах та чĕнерех кулнăн туйăнать.