Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Пĕри манран ыйтрĕ, «Ăçти пултăн эсĕ?»

«Пĕлетĕн-и – терĕм – Кольцовка енне?»

«Юлташăм, ан кул-ха, ăна та пĕлмесĕр.

Тăхта-ха. Тен, эс Коротков тăванех?»

«Ăçтан эс?» - тесессĕн, «Пĕлетĕр-и, – терĕм –

Кушлавăш текен вун ик ялăн уйне?»

Умри чăвашсем алă тытрĕç, «Элкерĕн

Ентешĕ эппин. Тен, ун тăванех?»

Ытти халăхсен хушшинче те чылайăн

Ыйтаççĕ манран, «Сан килӳ ăçтарах?»

«Илтсе-и эсир Андриян Николаев…»

«Тăхта-ха. Тен, эсĕ те Шуршăлтанах?»

Таçти кĕтесре те мана питĕ лайăх

Пĕлеççĕ пулсан та, паллашчăр тепре,

Элкер, Коротков, Николаев

Манпа пĕр тăван. Эпир – пĕр тĕпрен!

Эсĕ кайрăн инçе, Çĕпĕре.

«Сывă юл. Çыру çыр, ан ман»,- терĕн.

Еплерех хам юратнă хĕре

Пуçăмран хывăх евĕр вĕçтерĕп?

Çыру çырăп, анчах та чĕре

Хут çинчи йĕркепех лăпланаймĕ.

Вăл манран Çĕпĕрти çĕн çĕре

Юрату шевлине илсе кайрĕ.

Кун-çулри хуйхăм, савнăçа

Яланах санпала эпĕ пайлăп.

ĕмĕртен ĕмĕре, пурнăçа

Юрату кӳтĕр чыслăх, сăпайлăх!

18. 03. 1966.

А. Г-на

Пĕр маншăн кăна эсĕ,

Маншăн çуралнă

Чăваш çĕрĕнче

Сиккасси ялĕнче.

Анчах эп санран аякра çав,

Уралăн

Ват чулллă вăтам тăвĕсем патĕнче.

Çук, ватă Урал ман таса юратушăн

Пулаймĕ чăрмав. Шутласам, мĕн вăл ту?!

Тĕнче хĕрринче те сана, савнă тусăм,

Тупап, ма тесессĕн эпир – юрату!!!

1966, чӳк

Чăвашăн çĕвĕ-тĕрринче

курма пулать çĕр-çĕр тĕнче.

Пĕри ансат. Ун çук çĕнни.

Тепри – айван çын пĕлменни…

Ман ĕмĕр – тĕрĕллĕ тĕнче.

Иртет-ши вăл халь хăшĕнче.

Яш чух тĕллевĕ те пĕрре,

саватăн çав ухмах тĕрре.

Юрать ку тапхăрĕ кĕске,

пуçлатăн ăнланма кĕске.

Чи кăткăс тĕрĕ - конĕлли,

е – çанă вĕçĕ çырулли.

Çапла тĕрлет хăй ĕмринче

этем тени чылай тĕнче.

Йĕс йĕп йĕрлет – çип хăвалать…

Хăй тĕррине çын хăварать.

Элĕк, 12.08.2007

Çӳлĕ ту çинче çĕлен шăхăрать,

Хыт-хурасем çине таянса.

Ир те кĕтрĕм, чунăм, каç та кĕтрем,

Хапха юпи çумне таянса.

Ир те кĕтрĕм, савни, каç та кĕтрĕм,

Уй хапхийĕ çумне таянса.

Ӳсес çук пахчара сарă чечек,

Татас çук тăкăнса пĕтиччен.

Манас çук эп сана нихăçан та

Хамăр ĕмĕр вĕçне çитиччен.

Акăшĕ ăçта? - Атăлта.

Чĕпписем ăçта? - Тинĕсре.

Атăлпа тинĕс пĕрлешнĕ чухне

Асилет-ши акăш чĕппине.

Асилет те пуль, асилмест те пуль, -

Ун юратнă чĕппи урăх пур.

Унталла-кунталла эп кайсассăн,

Асилет-ши мана чун савни.

Асилет те пуль, асилмест те пуль

Хăй юратнă, ай, чун савнине.

Асилет те пуль, асилмест те пуль,

Ун юратнă сар хĕр урăх пур.

Ас илет те пуль, ас илмест те пуль,

Хăй юратнă сар хĕр çумĕнче.

Крымски калпак - кăвак калпак,

Тăхăнатăп ăна юлашки.

Ах, савниçĕм, кăвак куçăм,

Калаçатăп санпа юлашки.

Ах, савниçĕм, кăвак куçăм,

Эп куратăп сана юлашки.

Вуникĕлле явнă чĕн чăпăркка

Мĕншĕн сӳтĕлмелле тунă-ши.

Уйрăммăн çуралса, пĕрле ӳссе,

Мĕншĕн уйрăлмалла пулчĕ-ши.

Уйрăммăн çуралса, пĕрле ӳссе,

Мĕншĕн уйрăлмалла пулчĕ-ши.

Çĕнĕрен эп çуна тăваяс çук.

Тусан та - киввине манас çук.

Çĕнĕрен савни тупаяс çук,

Тупсан та киввине манас çук.

Çĕнĕрен эп савни тупаяс çук,

Тупсан та эп сана манас çук.

Эпир Ăстампула каиччен,

Акмасăрах тырă пулать, тетчĕç,

Вырмасăрах кĕлте тулать, тетчĕç.

Эпир Ăстампула кайсассан,

Аксассăн та тырă пулмарĕ,

Вырсассăн та кĕлте тулмарĕ.

Эпир Ăстампула каиччен,

Шыв вырăнне юхать сĕт, терĕç,

Çиес çăкăр хуплу пулать, терĕç.

Эпир Ăстампула кайсассăн,

Сĕчĕ çеç мар, шыв та юхмарĕ,

Хуплăвĕ мар, çăкăрĕ те, ай, пулмарĕ.

Силпи ялĕнче

Пуш уйăхăн вĕçĕнче

Хĕвел пăхрĕ ăшăтса,

Силпи чăваш ялĕнче

Юр ирĕлчĕ васкаса.

Тусем, сăртсем хуп-хура

Юрĕ кайса пĕтнĕрен,

Тухать курăк çăп-çăра

Хĕвел хытă хĕртнĕрен.

Сивĕ, хаяр хĕл иртет,

Каять йĕрсе, хурланса,

Сивĕ куççулĕпе йĕрет

Иртнĕ куншăн хуйхăрса.

Путăксемпе, варсемпе

Çĕмĕрĕлсе шыв кĕрлет.

Анчах мĕнле йĕрсен те,

Хĕвел хĕртнĕçем хĕртет.

Хĕл куççулĕ шавласа

Юхса кайрĕ çырмара.

Ачи-пăчи выляса

Чупса çӳрет урамра.

Килчĕ ырă çуркунне,

Килчĕ, ячĕ ăшăтса.

Хĕвел савать тĕнчене

Хĕл ыйхинчен вăратса.

Тĕттĕм вăрман чĕрĕлет,

Ешĕл тумтир тăхăнать,

Çеçен хир те ешерет,

Илемĕпе мухтанать.

Тĕрлĕ-тĕрлĕ чечексен

Ырă шăрши сарăлать,

Пур çĕрте те кайăксен

Лайăх юрри янăрать.

Çӳлте, пĕлĕт айĕнче,

Тăри юрри илтĕнет,

Çемçе курăк çийĕнче

Путек-сурăх сиккелет.

Хăй кĕтĕвĕ патĕнче

Ача шăхличĕ калать,

Хырăмĕ пит выçнипе

Силпи ялнелле пăхать.

Малалла

Ашшĕпе амǎшĕ ватлăх енне сулăнсан çут тĕнчене килчĕ Натали. Аслă ачисем тахçанах çитĕнсе çитсе тăван йăваран вĕçсе тухса кайса пĕтнĕччĕ ĕнтĕ. Маюк аппа, çие юлнине пĕлсен, малтанлăха аванмарланса çӳрерĕ. Больницăна кайма та шутланăччĕ хырăм пăрахма, упăшки, Ваççили пичче, чарчĕ: «Çурат. Тен, Турри хамăра ватлăхра пăхма парать пулĕ пепкене …» Вăхăт çитсен, мăшăрне юнашар ялти участок больницине лашапа леçрĕ. Тухтăрĕ вырăнта пулман пирки санитарка йышăнчĕ çăмăлланма хатĕрленекен хĕр арăма. Хăй вара темшĕн мăкăртата-мăкăртата вырăн хатĕрлет: «Тĕнче пĕтет пуль ара…Ваттисем аташа пуçларĕç, намăса та пĕлмеççĕ, ача çуратаççĕ…» Маюк аппа чăтрĕ-ха малтанах, каярахпа вара: «Апла ман каялла киле каяс-ши ĕнтĕ?»-терĕ шăппăн. «Вырт, килнĕ-тĕк,-» лаплаттарса хучĕ хыттăн санитарка, анчахран вара тек чĕнмерĕ…

Пĕчĕкçĕ сарă çӳçлĕ Натали çемьере пуринчен те ытларах юратакан ача пулчĕ: кĕçĕнни вĕт, пылакки. Ашшĕ маччаналла çĕклетчĕ те ăна: «Манăн тĕпренчĕкĕм, чиперккеçĕм»,- тетчĕ ачашшăн. Пиччĕш-аппăшсем те саватчĕç йăмăкне, хуларан ун валли парне илмесĕр килни пулман-тăр пĕрин те. Шăнкăрав пек уçă сассипе пӳрт тулса ларатчĕ, пусăк кăмăл та çĕкленетчĕ. Кăн-кăвак куçĕсем, каçăртарах пĕчĕк сăмси, тулли тутисем, чăнах та, ун сăнне илем кĕртетчĕç. Ахăлтатса кулнă вăхăтра сулахай пит çăмарти çинчи путăк татах та чипертерех кăтартатчĕç ăна…

Малалла

Мĕн-ши вăл телей? - пĕлесчĕ,

Тĕл пулсан ăна пĕрре -

Илĕртесчĕ те кĕртесчĕ.

Ĕçтересчĕ, çитересчĕ,

Çул çинчен мунча кĕртесчĕ,

Хаксăр хаклă хăнана

Юрама пĕлсе çитесчĕ.

Хĕлхемне парас пулсассăн,

Тав туса хĕве чикесчĕ,

Перекетлĕн ас тивесчĕ.