cap.ru сайтри сӑн

Шупашкарта тата республикӑри округсенче ака уйӑхӗн 20-26-мӗшӗсенче наци кухнин «Чӑваш апачӗ» гастрономи фестивалӗ иртӗ. Мероприятие ЧР Экономика аталанӑвӗн министерстви «Артель Гостеприимства» АНО пулӑшнипе йӗркелет.

Фестиваль вӑхӑтӗнче республикӑри заведенисенче наци апачӗсене тутанма май пулӗ. Шкул ачисем валли видеороликсен конкурсӗ иртӗ. Муниципалитетсенче вара пикниксем йӗркелӗҫ.

Тӗп пулӑм – поварсен, баристӑсен, экскурсоводсен професси тупӑшӑвӗ. Конкурссем ака уйӑхӗн 24-мӗшӗнче Шупашкарта иртӗҫ. Фестиваль Пысӑк Чӑваш Пикникӗпе, ӑсталӑх класӗсемпе, концертсемпе вӗҫленӗ. Ун чухне хӑнасемпе хула ҫыннисене «Амазония» паркра кӗтеҫҫӗ.

«Контактри» сӑн

Удмурт Республикинчи Ижевск хулинче Раҫҫейри халӑхсен музыка инструменчӗсен фестивалӗ иртнӗ. Унта чӑваш тӑмрипе та паллаштарнӑ.

Фестивале Самар, Сарӑту, Свердловск облаҫӗсенчи, Чӑваш, Мари, Пушкӑрт, Тутар, Удмурт республикисенчи тата Ханты-Манси автономи округӗнчи ансамбльсем, музыка инструменчӗсем ӑсталакансем хутшӑннӑ.

Пирӗн республикӑран унта И.Н.Ульянов ячӗллӗ Чӑваш патшалӑх университечӗн искусство факультечӗн халӑх инструменчӗсен оркестрӗ тата тӗрлӗ инструмент ӑсталакан Данила Данилов хутшӑннӑ. Пирӗн ентешсем фестивале пухӑннисене чӑваш культурипе паллаштарнӑ. Уяв хӑнисем чӑвашсен тӑмрине итлесе киленнӗ.

Тӗрӗссипе каласан, ӗлӗкхи пурнӑҫ историре юлмалла. Пирӗн таврапӗлӳҫӗсем ӗлӗкхи пурнӑҫра чакаланма юратнине эпӗ пӗрре те кӑмӑлламастӑп. Хам шухӑша эп яланах ҫирӗплетсе калатӑп: пирӗн ӗлӗкхи ҫине мар, пуласлӑхалла пӑхма вӗренмелле. Ӗлӗкхине эпир улӑштараймастпӑр. Вӑл пулнӑ, иртнӗ. Шывӗ юхса кайнӑ. Тавӑраймӑн. Пуласлӑха вара эпир хамӑр тӑватпӑр, вӑл мӗнле пуласси пирӗнтен килет. Ҫапла май пуласлӑх тӗлӗшпе ытларах вӑй хумалла. Ку ман кредо.

Апла пулин те, иртнӗ вӑхӑта, XIX ӗмӗре, хӑрах куҫпа та пулин пӑхса илме май пурри ҫав-ҫавах питӗ кӑсӑклӑ. Ӗлӗк ҫынсем мӗнле пурӑннине пӗлме интереслӗ. Ҫавна май хам та час-часах таврапӗлӳ енӗпе пӗлӳ шыракалатӑп. Уйрӑмах маншӑн хам ҫуралса ӳснӗ тӑрӑх кӑсӑклӑ. Статьясенче тӗл пулакан йӑнӑшсене юсани те пит кирлӗ ӗҫ тесе шутлатӑп — пӗри ҫырнӑ хыҫҫӑн ҫав йӑнӑш ҫӗнӗрен те ҫӗнӗрен кӗнекене куҫса пырать. Авторсем йӑнӑшсене ним шухӑшламасӑр копилесе илеҫҫӗ.

Чӑвашсем хушшинче ҫырулӑх ӗлӗк вӑйлах сарӑлман (сӑмах XIX тата маларахри тапхӑрсем пирки пырать), ҫавна май вӑл е ку летопись ҫине таянса хамӑр историне пире пӗлме йывӑртарах.

Малалла...

Ҫӑлкуҫ: https://obr-bel.ru

Нарӑс уйӑхӗн 28-мӗшӗнче Слакпуҫ шкулӗнче ӑслӑлӑхпа практика конференцийӗ иртнӗ. Ӑна чӑваш чӗлхипе литература вӗрентекенӗсем валли йӗркеленӗ. Ку мероприятие Раҫҫей халӑхӗсен пӗрлӗхӗн ҫулталӑкне, ҫавӑн пекех Яков Ухсай ҫуралнӑранпа 115 ҫул ҫитнине халалланӑ.

Уяв хӑнасене саламланинчен пуҫланнӑ. Шкул ачисем сӑвӑсем каланӑ, юрӑсем юрланӑ, ташланӑ. Ҫакӑ пурне те хавхалантарнӑ.

Вӗрентекенсем хӑйсен ӑсталӑхне кӑтартнӑ, Ухсай сӑввисене вуланӑ. Чӑваш чӗлхипе культурине аталантарнӑшӑн вӗсене Ҫутӗҫ тытӑмӗн Хисеп хучӗсемпе чысланӑ.

Конференцире чӑваш чӗлхине вӗрентес ыйтусене сӳтсе явнӑ, Яков Ухсай пултарулӑхне тишкернӗ. Вӗрентекенсем пӗр-пӗрин опычӗпе паллашнӑ. Хушӑнакансем кун пек мероприятисем чӑваш халӑхӗн культура еткерлӗхне сыхласа хӑварма тата аталантарма пулӑшнине палӑртнӑ.

ogirk.ru сайтри сӑн

Нарӑс уйӑхӗн 26-мӗшӗнче Иркутскри Мӑшӑрлану керменӗнче 80 мӑшӑр ҫемье ҫавӑрнӑ. Вӗсенчен пӗрисем – Жигаловӑри София Бузикова тата Денис Шевченко. Каччӑпа хӗр Мӑшӑрлану керменне чӑваш наци тумӗпе килнӗ.

Иркутскри Мӑшӑрлану керменӗнче чӑваш туйӗ мӗнле иртнине кӑтартнӑ. Каччӑпа хӗрӗн ашшӗ-амӑшӗ ятарласа Жигаловӑран килнӗ. Хӗрӗн амӑшӗ Лилия Бабокина каланӑ тӑрӑх, ҫамрӑксем пӗрлешме шутласан туя мӗнле тӑвасси пирки иккӗленӳ пулман – чӑваш наци тумӗпе кӑна. Мӑшӑрлану керменне тӑванӗсем те чӑваш тумӗпе килнӗ.

Официаллӑ пай хыҫҫӑн чӑваш туйӗнчи йӑла-йӗркене кӑтартнӑ. «Чӑвашсен туй йӑли-йӗрки 2 уйӑх тӑсӑлать. Эпир паян ҫак илемлӗ йӑлан пӗр пайне кӑна туса кӑтартӑмӑр», — тенӗ ун чухне Иркутскри «Юлташ» чӑваш наци культура центрӗн председателӗ Вероника Тимофеева.

Зинаида Михайлован Контактри страницинчен илнӗ сӑнӳкерчӗк

Красноармейскинчи тӗп вулавӑшра Пӗтӗм тӗнчери тӑван чӗлхе кунне халалласа «Тӑван чӗлхеҫӗм, янӑра!» темӑпа калаҫу ирттернӗ.

Унта хутшӑннӑ Трак шкулӗн 5-мӗш класӗнче вӗренекенсем (класс ертӳҫи - Ирина Федорова) Петӗр Хусанкайпа Юрий Сементер чӑваш халӑх поэчӗсен чӑваш чӗлхи ҫинчен калакан сӑввисемпе паллашнӑ.

«Хамӑн «Чун уҫҫи» сӑвӑ кӗнекинчи тӑван чӗлхе темипе ҫырнӑ сӑввӑма вуласа патӑм. Калаҫу-тӗлпулӑва Тӗп вулавӑш ӗҫченӗ Светлана Гурьева йӗркелесе пычӗ», — хыпарланӑ халӑх тетелӗнчи хӑйӗн страницинче Красноармейскинчи шкулта ӗҫлекен Зинаида Михайлова.

Телеграмри t.me/chuvashenkalasat каналтан илнӗ сӑнӳкерчӗк

Пирӗн республикӑра чӑваш тӗррин конкурсӗ иртӗ. Ӗҫсене Чӑваш тӗррин музейӗ чӳк уйӑхӗн 1-мӗшӗччен йышӑнӗ.

«Пурӑн, чӑваш тӗрри» ҫӗршыв шайӗнчи конкурса хутшӑнакансен пиҫиххи тӗрлемелле. Пултарулӑх ӑмӑртӑвне Раҫҫейри халӑхсен пӗрлӗхӗн ҫулталӑкӗпе ҫыхӑнтарас тенӗ.

«Туслӑх пиҫиххийӗ» номинацие хутшӑнакансем ытти халӑх пиҫиххине те тӗрлеме пултараҫҫӗ.

«Контактри» сӑн

Питӗрте пурӑнакан чӑвашсем Сурхури уявне паллӑ тунӑ. Вӗсем ку мероприятие «Хамӑрӑн йӑла-йӗркене упратпӑр» проектпа килӗшӳллӗн йӗркеленӗ. Уява вырӑнти чӑвашсен наципе культура автономийӗн хастарӗсем, артистсем, ӳнерҫӗсем хутшӑннӑ.

Пухӑннисем Сурхури уявӗ пирки калаҫнӑ. Ирина Кондакова Сурхури сӑввисемпе паллаштарнӑ. Екатерина Павлова тата «Юрату» фольклор ансамблӗн солисчӗсем вара халӑх юррисемпе савӑнтарнӑ.

«Чӑваш Ен» ПТРК тунӑ видео скринӗ

И.Н.Ульянов ячӗллӗ Чӑваш патшалӑх университечӗн чӑваш тата вырӑс филологийӗпе журналистика факультечӗн студенчӗсем экзамена чӑваш наци тумӗпе килеҫҫӗ. Ку йӑлана вӗсем пилӗкмӗш ҫул ӗнтӗ тытса пыраҫҫӗ.

Студентсем вӗренме килсенех пӗлеҫҫӗ: семестр вӗҫӗнче вӗсен экзамена наци тумӗпе пымалла. Пурте ку шухӑша хапӑлласа йышӑнаҫҫӗ.

Студентсем хӑйсем ҫуралса ӳснӗ вырӑнти чӑваш наци тумне тӑхӑнма тӑрӑшаҫҫӗ. Кунсӑр пуҫне вӗҫем экзамен тӗлне хӑйсен ялӗнчи фольклора пухаҫҫӗ, унтан хатӗрленӗ материала хӳтӗлеҫҫӗ.

«Контактри» сӑн

Чӑваш наци музейӗ йӗркленнӗнпе 105 ҫул ҫитнӗ май акци пуҫарнӑ: унта ҫемье реликвийӗсемпе этнографи япалисене йышӑнаҫҫӗ. Нарӑсӑн 12-мӗшӗччен наци тумне, савӑт-сапа, теттесем, капӑрлӑхсем тата ытти япаласем илсе килме юрать.

Япаласене ӗҫ кунӗсенче 9:00-17:30 сехетсенче ҫак адреспа йышӑнаҫҫӗ: Шупашкар, Хӗрлӗ тӳрем, 5/2 ҫурт. Ыйтса пӗлмелли телефон: 8 (8352) 62-41-24). Экспонатсене нарӑсӑн 17-мӗшӗнче «Ҫемьепе пӗрле» куравра кӑтартӗҫ.

Япала парнеленӗ кашни ҫынна музей хӑй те парне тӑвӗ: ҫулталӑк тӑршшӗпе ҫӳремелли абонемент парӗ.