Ака уйӑхӗн 13-мӗшӗнче республикӑн хӑш-пӗр вырӑнти хӑй тытӑмлӑх органӗсене суйламалли кун пулчӗ. Сасӑлав 11 районта иртрӗ. Чӑваш Енӗн Тӗп суйлав комиссийӗ пӗлтернӗ тӑрӑх, суйлав 44 кандидат хутшӑннӑ. Ку вӑл пӗр вырӑншӑн вӑтамран 3 кандидат кӗрешнӗ пек пулса тухать. Кашни округрах «Пӗрлехи Раҫҫей» парти кандидачӗсем ҫӗнтернӗ.

__Элӗк районӗнчи__ __Шӗмшевӗш__ ял тӑрӑхӗн пуҫлӑхӗ пулас тесе кӗрешӗве тӑватӑ ҫын тухнӑ. Вӗсенчен виҫҫӗшӗ хӑйсем тӗллӗн кандидатурӑсене тӑратнӑскерсем, тӑваттӑмӗшӗн Анатолий Семеновӑн, ятне маларах асӑннӑ парти сӗннӗ. Юлашкинчен асӑнни ҫӗнтернӗ те. __Канаш районӗнчи__ __Атнаш__ ял тӑрӑхне ӳлӗмрен Сергей Михайлов, __Комсомольски районӗнчи__ __Шурута__ Елена Козлова, __Сӗнтӗрвӑрри районӗнчи__ __Шуршӑла__ Владимир Алексеев, __Вӑрмар районӗнчи__ __Кавала__ Василий Адюков ертсе пырӗҫ.

Элӗк районӗнчи __Ехремкасси ял тӑрӑхӗнче__ вара вырӑнти депутата суйланӑ. Халӑх тарҫи пулма кӑмӑл тунисенчен пӗри либерал-демократсен партийӗн членӗ пулнӑ, тепри, Александр Корнилов, — «Пӗрлӗхлӗ Раҫҫейӗн». Кам ҫӗнтернине ӑнлантӑр ӗнтӗ. __Патӑрьел районӗнчи__ __Аслӑ Чементе__ вырӑнти ял тӑрӑхӗн депутатне суйланӑ. Ун валли Эльвира Медведевана ҫитекен ҫук тесе йышӑннӑ. __Пӑрачкав районӗн__ Депутатсен пухӑвӗн депутачӗ пулман Василий Новчикова шаннӑ. __Шупашкар районӗнче__ харӑсах икӗ ял тӑрӑхӗн депутатне суйланӑ: Лапсарӑнне тата Сарапакассинне. Малтан каланин депутачӗ Владимир Валентинов пулса тӑнӑ, тепринче — Наталия Димитриева. __Ҫӗмӗрле районӗнчи__ __Вырӑс Улхӑш ял тӑрӑхӗн__ депутатне Наталья Паненкована суйланӑ, унти Тӑванкассинче — Раиса Арюхинӑна, Етӗрне районӗнчи Йӑванскинче — София Плетеновскаяна, Елчӗк районӗнчи Лаш Таяпара — Светлана Канжелевана. Юлашкинчен каланӑ районти Депутатсен пухӑвне тата тепӗр ҫынна суйланӑ. Кунта Ираида Васильева кандидатури ҫӗнтернӗ.