Ӗнер республикӑра Космонавтика кунне халалланӑ мероприятисем иртнӗ. Андриян Николаев ҫуралнӑ тӑрӑхра, __Сӗнтӗрвӑрри районӗнчи__ __Шуршӑл__ ялӗнче, савӑнӑҫлӑ митинг пулнӑ. Унта сумлӑ хӑнасем ҫитнӗ: ЧР Элтеперӗ __Михаил Игнатьев__, Сӗнтӗрвӑрри район пуҫлахӗ В.И.Морозов, район админитсрацийӗн пуҫлахӗ В.И.Григорьев, ЧР Патшалах Канашӗн депутачӗсем Е.Н.Николаева тата А.Н.Никоноров, «Байконур» тата «Плесецк» космодромсен ветеранӗсем Е.Н.Южалин, Е.В.Шашкин тата ыттисем те.

Михаил Игнатьев Чӑваш ҫӗрӗн мухтавлӑ ывӑлӗ космоса парӑнтарса чӑваш халӑх ятне ҫӳле ҫӗкленине палӑртнӑ, шуршӑлсене Андриян Николаевӑн ятне манманшӑн, ҫамрӑксем хушшинче патриотлӑха сарнӑшӑн тав тунӑ. «Байконур» космодром ветеранӗ Е.Н.Южалин пӗрремӗш ракетӑсене янине, Юрий Гагаринпа тата Андриян Никоаевпа ӗҫленӗ вӑхӑта аса илнӗ. Чӑваш Республикинче ҫамрӑк космонавтсен юхӑмне йӗркеленӗ Р.Н.Ракова та сӑмах илнӗ. Кӑҫал ҫамрӑк космонавтсен слечӗ 10 ҫул тултарнӑ. 10 ҫул каялла унта 145 ҫын кӑна пулнӑ тӑк халӗ — 2,5 пин ытла ҫын.

Хусанти А.Н.Туполев ячӗллӗ наци тӗпчев техника университечӗн аслӑ шкул умӗнхи хатӗрлев управленийӗн пуҫлӑхӗ Д.Д.Габидуллин Чӑваш Енре асӑннӑ университетӑн филиалне йӗркелесси пирки каланӑ. Ку ҫамрӑк космонавтсен юхӑмне тата аталанма пулӑшӗ.

Хаклӑ хӑнасем умне Шуршӑл шкулӗнчи ҫамрӑк космонавтсен отрячӗ, Ӗсмелти (Октябрьскинчи) кадет класӗ стройлӑ плац-концертпа тухнӑ. Митинг вӗҫленсен Андриян Николаевӑн вил тӑпри ҫине чӗчексем хунӑ.

Мемориал комплексӗнче кунӗпех экскурси ӗҫленӗ. Культура центрӗнче «Космослӑ Чӑваш Ен» курав уҫӑлнӑ.