Ҫак кунсенче __Канаш районӗнчен__ тухнӑ ҫынсене пӗрлештерекен __«Канашсем»__ ентешлӗхӗн президиум ларӑвӗ иртнӗ — унта тӗрлӗ ыйтусем сӳтсе явнӑ, ҫав шутра __Чӑваш наци конгресӗн__ ҫитес Аслӑ пухӑвне кама ямаллине те.

Лару хыҫҫӑн хатӗрленӗ протоколта (шел те, ӑна вырӑсла ҫырнӑ: е Анатолий Кипеч протокол ҫырма чӑваш чӗлхине кирлӗ шайра пӗлмест тесе шутлать, е ҫыруҫи, Юрий Тарасов, чӑвашла лайӑх пӗлмест — калама ҫук) ЧНК хӑйӗн ӗҫне япӑх пурнӑҫлани пирки асӑннӑ. Халӑхра та имӗш, чӑваш наци конгресӗн ӗҫӗ-хӗлӗпе кӑмӑллах мар. Чӑваш халӑхӗн интересӗсене хӳтӗлеме йӗркеленӗ организаци ларӑва хутшӑннисен шухӑшӗпе концертсемпе илемлӗх конкурсӗсене ирттерекенсен шайне анса ларнӑ. Конгресӑн чаплӑ ятне тавӑрас тесен ӑна малашне тивӗҫлӗ ҫын ертсе пымалла — «Канашсем» ентешлӗх вӑл ҫын вырӑнӗнче ЧАП партийӗн ертӳҫи пулнӑ Лукианов Николай Егоровича курать. Ҫак кандидатурӑпа вӗсем ытти ентешлӗхсене килӗшме сӗннӗ.

Аса илтеретпӗр, ЧНК Аслӑ пухӑвӗ юпа уйӑхӗн 26-мӗшӗнче иртмелле. Унта, сас-хура пӗлтернӗ тӑрӑх, ҫӗнӗ Президента суйламалла.

Пӗлме: «Канашсем» ентешлӗхе чӑваш ҫыравҫи, Чӑваш Енӗн тава тивӗҫлӗ культура ӗҫченӗ __Анатолий Кипеч__ ертсе пырать. Ентешлӗх президиумне ҫавӑн пекех Алексеев А.Ю., Семёнов В.П., Викторов Н.А., __Лидия Филиппова__, Лукианов Н.Е., Тарасов Ю.А., Гурьев В.В., Паавлов В.М., Клементьева И.В., Мардарьев С.Н. кӗреҫҫӗ.