«Паттӑр пулса ҫуралмаҫҫӗ, паттӑр пулса ӳсеҫҫӗ», — ҫапла каларӑш ҫӳреччӗ мар-ши халӑхра? Утӑн 11-мӗшӗнче хӑйӗн патне Женя ятлӑ арҫын ача чупса килсессӗн __Канаш районӗнчи__ __Вӑтакас Кипечри__ вӑтам шкулӑн 8-мӗш класс вӗренекенӗ Николай Константинов паттӑрлӑх ҫинчен мар шутланӑ. Пӑлханнӑ саспа шӑпӑрлан Кольӑна __Чулкӑмака__ ялӗнче пурӑнакан 12 ҫулхи Веня Васильев шыв-шурта путма тытӑнни ҫинчен пӗлтернӗ. Путакан иккен аслисенчен ирӗк ыйтмасӑрах тата тепӗр шӑпӑрланпа (Алеша ятлӑ) сулӑпа кӳлле ишме кайнӑ. Инкек сиксе тухнӑ вӑхӑтра шыв-шур таврашӗнче пӗр ҫын та курӑнман. Сулӑ шыв-шурта ҫаврӑнса ӳкне те вара икӗ арҫын ача та шыв ытамне лекнӗ: пӗр ачи ишме пӗлнӗ, Веня вара ҫук. Пулӑшу ҫинчен кӑшкӑрнине илтсенех Николай Константинов хӑйӗн кил-ҫурчӗпе урам урлӑ вырнаҫнӑ пӗве хӗрне вӗҫтернӗ. Шыва вал пӗр иккеленмесӗр сикнӗ, тӑнне ҫухатнӑ ачана тупса ҫыран хӗрне кӑларнӑ.

Турра шӗкер, инкек тухнӑ кун яла хунямӑшӗ патне хӑнана «Ф.Г. Григорьев ячӗллӗ Канаш районӗн тӗп пульницин» васкавлӑ пулӑшу пайӗнче фельдшер пулса ӗҫлекен Владимиром Степанов килнӗ пулнӑ. Вӑл путнӑ ачана тӑна кӗртме пултарнӑ, ҫапла вара клиникӑлла вилӗмрен ҫӑлнӑ. Хыҫҫӑн Владимир Степанов васкавлӑ пулӑшу пульницине шӑнкӑравланӑ.

Хальхи вӑхӑтра шӑпарланӑн сывлӑхне нимӗн те пӑшӑрхантармасть, вал майӗпен Шупашкарти пульницара сывалать. Сӑмах май, Веня ҫемьере пӗртен-пӗр ывӑл иккен.

Николай Константинов «Хӑвна паттӑр теме пултаратӑн-и?» ыйтӑва ҫапла хуравланӑ: «Ҫук, енчен те ҫакӑн йышши инкек татах та тухсан эпӗ иккеленмесӗрех ҫӑлма васкӑп».

Николай Константинов паттӑрлӑхӗ чӑнахах та мухтава тивӗҫ. Ҫак ӗҫ ыттисемшӗн те ырӑ тӗслӗх пулмалла.